E silia i le to‘a 100 alii ma tamaitai o loo ua finauina nei le sailiga siamupini o le taaloga o le aau i atunuu o le Oceania i Samoa nei ma o le sailiga siamupini lona valu lea ua faatautaia i totonu o le itulagi.
O atunuu e 12 o le Pasefika ua tausinio ua aofia ai Ausetalia ma Niu Sila faapea Hawaii ma Guam aemaise o atumotu laiti e pei o Samoa, Fiti, le Atu Kuki, Niu Kaletonia, Tonga, le Atu Malesala, Papua Niu Kini faapea ai ma Palau.
O se tausinioga tele lenei ua toe vaaia ai le tumutumu o le fale aau a Samoa i Tuanaimato ma le faamoemoe e saga unai ai foi taumafaiga a le au a Samoa e fou i lenei tausinioga i lona tulaga faavaomalo. O le toatele o le au a Samoa o loo tausinio, o fanau mai i fafo faapea ai le fanau ua silia nei i le lima tausaga o galulue lava i le taumafaiga o le taaloga lenei i le atunuu.
O le afioga i le Minisita o Aoga Taaloga ma Aganuu, Fiame Naomi Mataafa na tatala aloaia lenei tausinioga faavaomalo ma le unai i fanau e faaaogā soo se avanoa e maua i taaloga auā le atina‘e o le tagata lava ia aemaise foi le faaeaea ua ave i o latou atunuu.
O Niu Sila lava ma Ausetalia na amata loa taaaloga manumalo i pine auro ma pine siliva o nei tausinioga ae o loo aofia ai foi i lenei tauvaga fanau a le Pasefika na maua pine auro mai i Taaloga a le Itulagi lea na faia i Samoa nei. Faaalia e le Asosi o Feausiga i Samoa ua ese foi lenei tauvaga ona ua faaopoopo le uumi o tuuga ma ua iai tauvaga siva i le vai aemaise tausinioga ua faia i le sami lea na amata mai i Fasitoouta ae faatini i Tufulele.
O le tele lava o tausinioga ua faia i le faleaau tele i Tuanaimato ma o tausinioga nei ua taumafai le Pulega o Taaloga i Samoa e aumai i Samoa nei e faaaogā ai fale taalo tetele faavaomalo ia ua fausia mo atina’e o taaloga i le atunuu.
O le Alii Palemia o Samoa Tuilaepa Sailele Malielegaoi le Peresetene o le Komiti o loo faatautaia lenei taligamalo tele ma ua galulue faatasi ma nisi o pisinisi i totonu o Samoa le Malo aemaise le Matagaluega o Leoleo ma Tagata Tafafao Maimoa mai i Fafo ina ia mautinoa e saogalemu nofoaga uma o loo faamautu ai au eseese ua oo mai mo lenei tausinioga.
O loo faapea foi ona iai le faamoemoe ina ia avea le oo mai o alii ma tamaitai o loo tausinio i lenei taamilosaga ma auala e faamaimoa ai i vaega eseese o Samoa ma saga faalauiloa ai le atunuu e ala i atina‘e tau tagata asiasi mai.
