Ua toe taulimaina e tama o le au lakapi fitu a le atunuu nisi o siakitupe mai foai a pisinisi ma kamupani faapea tagata lautele sa tuuina atu meaalofa tupe e tauia ai le manumalo o le au fitu a le atunuu i le taamilosaga talu ai nei, ma o le aofaiga o ia foai tupe e $34,000 tala lea ua aofia ai ma le 12,000 tupe Niu Sila na ma‘au i ai le mamalu o Samoa i Aukilani ina ua toai taunuu i ai le au ina ua mae‘a le taamilosaga.
O le alii Palemia o ia foi o le taitaifono sa tauaaoina atu lea vaegatupe faatasi ai ma sui o le komiti faafoe o le iuni lakapi aoao a le atunuu i le Aso Faraile, 18 o Iuni 2010.
O le aofaiga atoa o le tupe ua tauaaoina e le ‘au e $512,000 poo le silia i le afa miliona tala Samoa.
Ua lipotia se faasea a se tasi o tama o le ‘au sa faaleoleo i le lē fetaui o le faasoaina o ia seleni, ona o ia sa tele vae o le taamilosaga sa taaalo ai, pe a faatusa i se isi tama o le ‘au, ae ua sili atu tupe ua maua e lea sui o le taitoafitu a le Manu Samoa nai lo ia.
Faaalia e le taitaifono o le iuni lakapi a le atunuu, e lē mafai lava ona tuua ni faasea faapea mai tama i o latou alauni ae o se mataupu ua mae‘a ona soalaupule ma fofo i totonu lava o le lotoifale o le ‘au.
O tama e toalua sa faaleoleo e lei maua ni a la seleni i le tufatufaga o le $34,000 mulimuli ae sa faailoa e Tuilaepa ua saunia e le Iuni Lakapi a le atunuu ni meaalofa tupe mo i laua.
O le alii o Paul Chan Tung sa laumanuia i molimau e faapea o ia lea na tusi i le taitaifono o le iuni ma ave i ai lana faaseā i le lē fetaui o lona faamanuiaga tau tupe, auā o ia e tele vae o le taamilosaga sa taalo ai e fua i le tasi o tama o le ‘au.
E lei mafai ona tali mai le kapeteni o le au lakapi fitu le susuga Lolo Lui ina tuusao i ai se fesili faasamasamanoa a le tusitala i lenei tulaga a o faatali le taimi e tuuina atu ai a latou seleni mulimuli.
Peitai sa agiga i lipoti a leitio ma nusipepa le iai o se faanoanoaga i lea tama o le ‘au ona ua lē fetaui le aofaiga o tupe ua ia maua pe a fua i lona taimi sa taalo ai mo le ‘au taitoafitu a le atunuu.
O le vaiaso nei o loo fuafua e malaga ai i Amerika Samoa le ‘au lakapi fitu mo le valaau faaaloalo a le faigamalo i Sasae, lea o le a toe faaopoopo ai foi nisi faamanuiaga tau seleni o le a latou maua.
