O Samoa o le atunuu ua mae‘a ona tofi, e lē o se atunuu e saili i le soifua o tagata, tulou. O le i‘a e iviivia, e auaugata, o le Fue e Lavelave, o le Vaofilifili e faatusa i ai ona Upu, Agaifanua ma ona Gafa.
O le mau ma le tofa saili ma le faautautaga loloto a le Autalaia ua lagomau mai ti‘asa ma tuugamau, “O Samoa lava ia e taofi eseese i ona talatuu, e ese le mau a Upolu, ese le mau a Savaii, ese le mau a Tutuila ma Manu‘a.”
O le Aso Tofi o le vaiaso talu ai sa auai atu ai le mamalu o le atunuu i le maota o le Radio Samoa 1593AM i Manukau i Aukilani i Saute, mo le tatalaina aloaia o le Tusi ua faaigoaina “O le Vaofilifili o Samoa”, lea sa tuufaatasia e le polokalame a le Aoao Malu Manogi o le Lolo.
O le susuga i le Faafeagaiga ia Lui Ponifasio sa ia taitaia le sauniga lotu ona sosoo ai lea ma le lauga faafeiloai sa fofoga i ai le Tofa i le Nofoa, le fetalaiga ia Tupuana‘i Matautu Falefia Te‘omatavu‘i Lata II mai le afioaga o Vailele.
O le afioga ia Tuaopepe Faumuina Aulaea Aperila Faumuina sa ia saunoa e tusa ma le tala o le galuega, a o le Tofa Lofipo Niuafolau Taputu Sineva Peilua sa fai ma fofoga o le aso, ma o i latou foi ia e pei ona ta‘ua i luga sa nafa ma le taumafaiga o lenei faamoemoe.
Sa avea le afioga i le Konesula ia Faolotoi Reupena Pogi e fai ma saunoaga autū o le aso, a o le susuga ia Rev Alesana Fuimaono McCarthy sa ia faapaiaina le Vaofilifili o Samoa.
Na saunoa Tuaopepe ma ia ta‘ua ai le tele o tausaga talu ona fuafua mai lenei galuega, seia oo lava ina ua siitia mai le galuega i Manukau ma faaigoaina ai loa le polokalame o le Aoao Malu Manogi o le Lolo.
O le tofa ia Faleao Lavea Pouniu Evile, o se tasi foi o toa sa iai i le polokalame o le Aoao Malu, sa tulai mo le Sivaloa auā Pule ma Tumua, ona tasi ai loa lea o faafitiga o aleaga i le Afioga i le Peaalii ia Leilua Piliae Kose, e tali faitau auā le Aufaigaluega Paia a le Atua ma le mamalu o le atunuu sa auai i lea aso.
