“Ua ou matuā fiafia tele ma ou faafetaia le Atua ona o lenei avanoa tāua ma le lelei ua ou maua, auā ua tusa nei ma le 20 tausaga talu ona ou galuega i le galuega a le Atua i le avea ai o a‘u ma si o‘u toalua e fai ma meafaigaluega a le Atua.”
“Sa ou galue foi i Hawaii ma Amerika ma lo‘u lē iloaina o le a valaauina faapitoa ma‘ua e le Atua e faaauau lana galuega tala‘i i totonu o Niu Sila nei. O lea la ua aumaia e le Atua lenei avanoa faaauro ma ua avea ai ma‘ua ma faifeau e faavaeina ma tatalaina aloaia ai lenei lotu fou i lalo o le faamalumaluga a le Ekalesia Church of God of Prophecy.”
O le saunoaga lea a le susuga i le faifeau, Pastor James Bryce na faaalia ai lona loto faafetai ma le agaga fiafia tele ona o lenei ua faamanuia le Atua i la laua galuega ma si ona faletua le tina ia Patsy Alefosio Bryce aemaise foi o la alo e toafā lea ua galulue ai nei i le Ekalesia i totonu o Manurewa, i le vaaiga ma le taitaiga a le susuga i le faifeau, Susuga Bishop Asalemo Kuka Moelolo.
O le Susuga lava ia Bishop Asalemo na taitaia le sauniga i le Aso Sa lea na tatala aloaia ai ma faapaiaina aloaia le faatuina o le aulotu muamua lenei a le Ekalesia i Aukilani. Matagofie le upu folafola na tomatauina ai le galuega a le susuga ia Pastor James ma le faletua, ma faamanuia ai foi le taitai auā le faaauauina pea o le galuega tala‘i mo Aotearoa nei.
Sa faapena foi ona saunoa faafetai ma faamalosi atu le taitai i le paia ma le mamalu o tagata lolotu o le aulotu auā lava le tautuaina o le finagalo o le Atua aemaise ina ia o atu ma tala‘i atu i nisi o fia mauaina le alofa faamaoni o le Atua, ina ia maua pea nisi agaga se tele mo le Atua.
Na mae‘a le sauniga ona tali foi lea o le sua i susuga i faafeagaiga ma o latou faletua, o le auvalaaulia na auai atu e molimauina lenei faamoemoe tāua aemaise foi o le mafutaga matagofie sa faia e tusa ma le faapaiaina o lenei galuega mo le Atua.
Ona ta‘ape ai foi lea o le fuamanusina ua lē gata i le faatumulia o le agaga i meaai faaleagaga e tusa ma le upu folafola o le aso, ae sa faapena foi ona faamalieina i le tausiga o le laualo i le matagofie o le taumafataga na saunia lelei e le susuga i le faafeagaiga ia Pastor James ma le faletua ia Pasty aemaise o le paia ma le mamalu o matafale uma o le aigalotu i lea aso.
