‘Ona ou faalogo atu ai lea i le siufofoga o le Alii ua faapea mai, O ai ea ou te auina atu o ai foi e alu atu mo i matou? Ona ou faapea atu lea, O a‘u lenei ina auina atu a‘u.’
O le Aso Toonai na tuanai atu na tali ai le faletua ia Temukisa i le valaauina o ia mai le Alii, i le mae‘a ai o tausaga sa a‘otauina ai lona soifua ma tapena ai mo le galuega faafaifeau, ona faataoto ai lea o lona faauuga e pei ona faataunuuina i le Aso Toonai.
Na aofia potopoto uo ma paaga aemaise o tauaiga ma le paia i le aufaigaluega o le Ekalesia a le Uniting Church i le pitonuu o Geelong, e patipatia ma molimauina le faapaleina o le faletua e avea ma faifeau faauuina a le Ekalesia Uniting Church.
O le faletua ia Temukisa poo le susuga i le faafeagaiga taulagi sa tausinuu ma lona alii le susuga i le faafeagaiga ia Rev Sani Vaeluaga, o le taitai aoao o le koneferenisi Samoa a Ausetalia, o se taitai faaitumalo foi o le Ekalesia i le pitonuu o Geelong, o ia foi na taitaia le sauniga ma faapaiaina le tofi faifeau ua faaee atu mo si ona faletua.
O le Ekalesia papalagi lea ua valaau faaaloalo e fai ma nuu ma Ekalesia muamua a le faafeagaiga. E lē taumate ua lava tapena le susuga i le faifeau, mo le faafaileleina o soifua faaleagaga o le lafu mamoe, poo ā foi luitau o le valaauina, e faamoemoe tasi i le faasinomaga a le silisiliese, aemaise foi o se fesoasoani a le tamā o le aiga ua lava le silafia i le galuega.
O ou māmā na lau susuga a le faafeagaiga, ia tele ni agaga e manumaloina mo le Atua ma lona finagalo.
