O le afa o le 12 i le aoauli o le Aso Toonai na te’a nei na tapunia aloaia ai le tele o nofoaga ia na faamautu ai le atunuu i taimi o le afa o Eveni.
O nofoaga nei o lotoa a le Malo ae o loo faaauau ona tatala lotoa o ekalesia lotu i totonu o afioaga mo nisi o aiga.
O aoga ia ua tapunia ma na faatino nisi o foai a le Malo mo le mamalu ua taape nei i aiga aua le faamautu ai o aiga mo se taimi sei mae’a on fausia o latou fale ua leaga uma.
O le amataga o le afa na oo atu i le 235 nofoaga i totonu lava o Upolu na faamautu ai le to’atele.
Na aofia ai foi i nofoaga e pei ona ta’ua i lotoa o aoga ma lotu nisi o maota o afioaga, aemaise o le falemai tele i Motootua na faamautu ai nisi o aiga.
E mae’a vaiaso e lua ua faamalosia le tapunia o nofoaga e 18 ona o le le lelei foi o tagata na faamautu ai ma na fiu lapataiga ina ia tausi lelei le tumama i nofoaga faitele nei, peitai na to’atele lava ua le usitaia tulafono ma aiaiga o le tausi ai o le Soifua Maloloina i ia nofoaga ma tapunia ai loa ae faatonu aiga na nonofo ai e saili o latou aiga e agai iai.
O lea la ua tapuni ma nofoaga ia na ta’ua ma na ta’ua e le DMO o loo tofu lava tagata o loo ua faamautu i nofoaga nei ma aiga e mafai ona agai iai mo se taimi sei toe faalelei o latou maota.
Sa faamautu foi fesoasoani a ekalesia lotu e pei o le Ekalesia a le Aso Fitu, e le gata i lea o le Ekalesia a Iesu Keriso o le Au Paia o Aso e Gata ai, o le Caritas a le Ekalesia Katoliko faapea ai le Ekalesia Faapotopotoga Kerisiano Samoa ma le Ekalesia Metotisi mo o latou sui lotu ma le lautele o le atunuu.
O ili afi, o agaese, salu u’amea, salu, ta’inamu, ieafu, solo taele ma solo fafano, o to’i ma ipu ua faapea ona faaopoopo i le tele o taumafa ma faguvai mo nei aiga ma na ta’ua e le DMO o le a faaauau ona fesootai ma aiga nei ua taape i tua i le itu lea o le faaauau atu o fesoasoani tau taumafa faapea ai le suavai.
Ua iai le faamoemoe o le DMO ia vave ona faamautu fale o aiga ia ua faaleagaina ina ia vave ai foi ona agai ese ma lotoa o loo tatala pea e oo mai i le taimi lenei.
