O amataga o tausaga fou taitasi e talosia lava e le atunuu ia sologa manuia lona amataga ma ia alofia ni faalavelave ma ni faaletonu e aafia ai le soifua o tagata.
Peitai e moni ma faamaoni le agana masani, e sui lava fuainumela ma fou le tausaga ae lē suia ai mea e tutupu i amioga ma uiga o tagata.
Pe a fua i lipoti amata mai le Matagaluega o Leoleo ma Falepuipui mai le aso mulimuli o le tausaga ua mavae atu nei e oo mai i aso amata o le tausaga fou 2013, e fai lava si maofa i faalavelave na tutupu ai ma aafia ai le soifua o nisi, aemaise foi o le molia o se alii seila o le vaa la‘upasese o le MV Lady Naomi i le faamalosi o se teineititi o se tasi o le pasese sa malaga ai i le vaa agai i Amerika Samoa.
O lea alii seila o Feagaiga Siilata ua tuuaia i lona faamalosi o le teineititi e 15 tausaga le matua. Ua molia foi lea alii seila i nisi moliaga se tolu, e aofia ai le faaoolima i se gaioiga tau feusuaiga poo le sexual assault, le faia o se gaioiga solitulafono ua aafia ai le puipuiga o le saogalemu o le teineitiiti, ma le moliaga o le faia o se gaioiga tau feusuaiga poo le sexual abuse.
E lei maua mai se faamatalaga i le pulega o le Faalapotopotoga o Vaa a le Malo o Samoa o loo umia le Lady Naomi ma faafaigaluega ai le alii seila ua molia e leoleo i totonu o Amerika Samoa.
Peitai ua faaalia e se molimau mai Amerika Samoa o loo nofo taofia le alii seila o Feagaiga i le vaaiga a leoleo o le teritori a o faagasolo ai suesuega.
O le vaiaso nei ua faatulaga e tatau ona valaau ai ona moliaga ma tulai i le faamasinoga maualuga a le teritori.
E lē o se taimi muamua lenei ua aafia ai nisi sa galulue o ni seila i le vaa la‘upasese o le Malo o faia malaga i le va o Apia ma Pago Pago i ni tuuaiga o ni solitulafono.
E lei leva atu foi ni tausaga na tuuaia ai ni alii seila i le aafia i le feaveaiina o maruana sa faaulufale i le teritori.
E lei leva atu foi nai tausaga na molia ai e le Malo o Amerika Samoa le Lady Naomi i le avatu i se tasi o ana malaga o ni alii talavou o se aulakapi e leai ni pemita.
I isi tala mai leoleo e lua ni faalavelave na lipotia e leoleo i Apia na aafia ai le soifua o ni alii talavou.
O le tasi o faalavelave na aafia ai se alii talavou o le nuu o Vailuutai i se pulufana ma o loo faia suesuega i le mafuaaga, ae o se isi faalavelave o se misa na aafia ai se alii talavou i ni manu‘a mai se mea ma‘ai o loo talitonu leoleo o se agaese.
