Ua uma ona tapuni faavaitaimi fale‘aiga ona ua maua atu e iai faaletonu o loo tulai mai ai ae ua oo atu nei le faasologa a le Matagaluega o le Soifua Maloloina i faleaoga. Ua faagasolo nei i le masina talu ona amata aoaoga a fanau ma o le aoga lea ua faamautu le tapunia i le vaiaso atoa o le Kolisi maualuga a le Itu o Asau. Ua tapunia ona o le faaletonu i fale lē ta‘ua poo faleese.
Ua oo mai ripoti e faapea e lē na o le pau lea o le aoga ua tapunia ae ona pau lea o le aoga ua faamautu mai le tapunia. Faaalia e le tamaitai pule, Makereta Tumua ua leva lava ona logo le komiti faaitumalo a le Aoga, o i latou tonu nei e nafa ma le faaleleia o le aoga. O lea lava la ua iu ina oo atu le asiasiga a le Matagaluega o le Soifua Maloloina e leai lava ma se galuega ua faia i fale nei e tua i ai le fanau aoga.
Faaalia e Tumua e sili atu i le to‘a 455 tama ma teine aoga e aoaoina i le Kolisi lenei i lea itu o Savaii, ma o le tausaga na tea nei na faapea ona siitia mai i le aoga faaitumalo i le avea ma Kolisi.
O fanau mai i afioaga amata mai i Falelima seia paia Asau o loo aoaoina ai i le kolisi lenei. E to‘a 16 faiaoga o loo faatautaia le vasega 9 seia oo i le vasega 13.
O se aoga toatele ma e manaomia tele fale nei, ma o le faia o le faatonuga lenei a le Matagaluega o le Soifua Maloloina na faaalia e lenei tamaitai ua ia faaaogāina ai nei le seleni o pili ua ao atu a le fanau mo le kuata muamua lenei o aoaoga, ina ia fausia ai fale lē ta‘ua ua moomia.
E iai lava foi ma le faafitauli faaauau o le utiuti o le suavai, ma na ta‘ua e le tamaitai pule o loo iai tanevai a le aoga ma e tele lava ina uma i le faaaogāina mo vai taumafa mo le fanau, ma o le ā lava le suavai e totoe ua faasoa i suavai mo fale lē ta‘ua.
O le isi la faafitauli tele ona sa sua atu lava le paipa peitai na ta‘ua e le tamaitai pule ua tele ina pe le paipa i le 11 i le taeao poo le 12 foi i le aoauli, ma o inā lea e tulai mai ai le isi faafitauli i tanevai ma le maua pea o lea foi punaoa tāua i le faaleleia o fale lē ta‘ua.
O le vaiaso lenei na ta‘ua e le tamaitai pule ua iai le faamoemoe e mae‘a uma ai galuega toe faaleleia i lenei vaiaso ma e lē mafai ona toe amata aoga a le fanau seiloga ua lelei atoatoa nei fale.
O le toe faatumu o tupe a le fanau na totogi ai o latou pili ina ia fausia ai fale lē ta‘ua na ta‘ua e le tamaitai pule o le a tuu atu i le Komiti a le Aoga mo le sailia o lea seleni ae o le taimi lenei ua ave le faamuamua ina ia faaleleia ai fale lē ta‘ua nei mo le fanau ae talanoa mulimuli isi vaega o le aoga o loo moomia ai pili aoga e pei ona aoina.
O le soifua maloloina o le fanau na ta‘ua e le tamaitai pule ua ave iai le faamuamua.
