E tatau ona iai se isi tauvaga e ese mai i le tauvaga a Samoa lava latou, ina ia aloaia ma laina tutusa ai tamaitai uma mai Niu Sila, Ausetalia, Amerika, Amerika Samoa, Hawaii, ma Samoa foi e sailia ai se Lalelei mo le Tauvaga tele a le Pasefika
E foliga mai o le agaga lea o Teeva sa mafua ai ona fai lana faaiuga e taofia ai le toe tauva o le Miss Samoa Niu Sila, i le tausinioga a Tausala Samoa o le a faia i le Teuila 2011. E talitonu Teeva, e lē fea ma e lē talafeagai le toe tauva o le Miss Samoa Niu Sila, ma tamaitai faato‘ā tauva o Samoa. O le tauvaga a Samoa, e laina tutusa ma le tauvaga sa faia i Aukilani i Niu Sila.
‘E lē fetaui la le toe alu atu o lē na faauuina i Niu Sila, ae toe tauva faatasi ma tamaitai o loo tau sailia ni tulaga i le tauvaga faapitoa a Samoa lava latou ia. E talafeagai le mae‘a o le tausinioga a Samoa, poo ai lava o le a manumalo, ona faato‘ā tauva faatasi lea ma le tamaitai filifilia a Niu Sila ma isi atunuu e pei ona ta‘ua. O lona uiga e tatau ona iai se isi tauvaga, ina ia sailia ai se toatasi, mai sui sa manumalo i tuufaatasiga sa faia a atunuu uma o loo tauaveina le igoa Samoa.’
‘O le fea ma le sa‘o lena, ma ua tatau lava ona faatino i le taimi nei. E lē fefe le mea moni, ma e lē tatau foi ona tuu le finauina o lea mataupu, auā e lē iloa poo afea e faia ai, ae o loo taofia ai pea aiā tatau a tamaitai faapaleina a Niu Sila ma isi. Sa taumafai foi ina ia tutū faatasi ma lagolago mai isi tamaitai e pei o Ausetalia, Hawaii ma Amerika, peitai ia e pule lava i latou, a o Niu Sila e lē toe faatali.
‘O le matou tusi sa ave i le Matagaluega o Turisi i Samoa, e lē tau faia i ai sa latou faaiuga, auā sa ta‘u sa‘o lava i ai, o le a lē tauva le Miss Samoa Niu Sila, mo le tauvaga o le a faia i le Teuila 2011. Ua mae‘a foi ona tali mai Sonya ma faapea mai, E lē aiā mai Samoa ia Niu Sila ma lana ia faatatau, e pule lava Niu Sila.’
O le finagalo lea na faaalia e Teeva i se talanoaga sa faia i luga o le telefoni, peitai sa fuafua se feiloaiga mulimuli ane, ona sa manaomia le fia tuuina i ai o nisi o fesili agai lava i lea mataupu. E tele ni itu tāua ma nisi o vaega sa tulai mai, ma sa fesiligia e le toatele ina ua mae‘a faalauiloa le faaiuga a Teeva i le uluai taimi. Ae ui i lea sa toe faalēaogā mai e Teeva le feiloaiga sa fuafuaina i le vaiaso talu ai.
Tali mai le Palemia o Samoa i le lē tauva o le Miss Samoa Niu Sila i le tauvaga o le Teuila 2011
Ua mae‘a ona faalauiloa faalauaitele le tali mai a le afioga a le alii Palemia o Samoa, Tuilaepa Lupesoliai Sailele Malielegaoi, e uiga i lea mataupu sa tau fesilisili ai le toatele.
O le tali a le afioga i le Palemia, ua faamanino ai le tulaga o le lē toe aloaia e le malo o Samoa o le Tausala Samoa i Niu Sila, sa manumalo i le sailiga sa faatautaia i le masina o Me o le tausaga nei, aemaise o le tauvaga e pei ona faia i tausaga taitasi, o loo faafoeina e le Miss Samoa NZ Trust.
Sa manino i le tali a le alii Palemia, le tapunia o se avanoa e toe aloaia ai le tamaitai Niu Sila pe a malaga atu i Samoa. E lē gata i lea, ae ua tapunia ai foi ma le avanoa e mafai ona agai sa‘o ai le tausala Samoa Niu Sila i le tausinioga ma le sailia o se Lalelei o le Pasefika e pei ona tulimatai e tamaitai o atunuu uma.
Saunoa Tuilaepa, ua mafua lea faaiuga, ona o le finagalo sa faailoa atu e le pulega a Niu Sila, o le a lē tauva ai lē na manumalo i le tuufaatasiga i le Teuila. Afai ae malaga atu le tausala Niu Sila i Samoa, o le a malaga atu lava o se tagata tafao, ae lē aloaia o se tausala Samoa mai Niu Sila.
E ui ina e lei auiliiliina nisi o vaega o le tali a le alii Palemia, peitai sa maua e le Samoa Times nisi o lipoti e uiga i mea taitasi e ono aveesea ma lē toe amanaia ai e Samoa le Miss Samoa Niu Sila ma lana tausinioga.
Nisi faafitauli e ono fetaui ma le pulega ma le tamaitai Miss Samoa Niu Sila
O se feiloaiga ma se tasi o tamalii ua loa o galue i le Matagaluega o Turisi i Samoa sa ia faamanino ai vaega taitasi e ono oo i ai se faaiuga e faamatuuina i se taimi.
1. E lē aloaia tiute o le Miss Samoa Niu Sila
O le a lē toe mafai ona faataunuuina tiute o le Tausala i Niu Sila, i soo se sauniga faalemalo e faia i Niu Sila. O le a lē toe amanaia e Samoa le tofi ma le pale o le Miss Samoa Niu Sila.
2. Avanoa se isi kamupani ma nisi latou te faatulagaina se isi tauvaga mo Niu Sila
Afai e lē toe amanaia e Samoa le vaega ma le pulega o loo iai nei, o le avanoa ua matala mo se isi faalapotopotoga ma nisi tagata latou te faatinoina se isi tauvaga i Niu Sila, i le faamoemoe lava e tasi e pei ona sa sau ai. O se avanoa o le a mafai ai ona faatino e soo se tasi lava, a lē o lea o loo iai foi le lālā o le Matagaluega o Turisi i Aukilani e mafai ona latou faatautaia.
3. E ono aveesea ma leai ni kamupani e lagolagoina le faamoemoe (sponsorship)
E ono aveesea le agaga lagolago o kamupani mo le faamoemoe i Niu Sila, aemaise lava o le kamupani vaalele a le atunuu le Poly Blue. E tasi le mafuaga sa tuu i ai le lagolago a le PolyBlue, ona o se faatosina lelei tele le malaga o le toatele i Samoa i le taimi o le Teuila. O le tauvaga a Niu Sila, o se auala lelei mo le maketiina o le kamupani vaalele, auā e fesootai lelei ma le gasolo o tagata tafafao i Samoa.
4. Leai se avanoa e malaga tuusa‘o ai i le Tauvaga tele a le Pasefika
E tasi le faitotoa e auala uma ai tamaitai tauva i le Tauvaga o le Tausala o le Pasefika poo le Miss Pacific, e na o le malo lava o Samoa. Afai ua lē agai i Samoa le Miss Samoa Niu Sila, o le a leai foi sona avanoa e agai sa‘o ai mo lea tausinioga.
O vaega e pei ona faamalamalamaina e lea sui, ua mautinoa o loo ua sosolo ai lava le faaiuga e pei ona saunoa i ai le alii Palemia o Samoa. O loo ta‘ua i luga le tulaga sa tali mai ai Tuilaepa ona o le faaiuga sa faamatuuina e le pulega o le Miss Samoa Niu Sila.
O le aliii Palemia, o le Minisita o le Matagaluega o Turisi, o ia foi o le Taitaifono o le pulega o le kamupani vaalele a le atunuu. O nisi ia o itu sa taulai i ai le finagalo o le sui o le Matagaluega, ma sa ia mautinoa e lē mafai ona alu ese ai se faaiuga e ono faia.
O le saunoaga a Tuilaepa, o se faamaoniga lea o mataupu sa afea i talanoaga ma le suesuega sa faia e le Samoa Times lava latou ia.
O fea a agai i ai le Miss Samoa Niu Sila? O le ā le isi laasaga?
O fesili ia sa taumafai e toe tulituliloa ai le tamaitai Faatonusili o le Miss Samoa Niu Sila, Teeva Tagaloa Leniu. Peitai e lei manuia taumafaiga ma e manatu o le a iai lava se isi avanoa mo se feiloaiga i se aso o i luma. Aemaise ai e foliga mai i le saunoaga a le alii Palemia sa faasalalauina, o loo tuu avanoa pea mo Niu Sila i le tausaga fou. O le a maua se tali mai ia Teeva i se taimi o lenei vaiaso mo le faaauauina o lenei mataupu.
