E to’a 13 Minisita o le Kapeneta, ae to’a 24 minisita lagolago ua filifilia e lagolago i Matagaluega ma faalapotopotoga a le Malo ua tuuina atu le vaaiga i minisita filifilia na tusi aao i ai le Palemia ina ua mae’a le faiga palota tele ia Mati o le tausaga nei 2011.
O le toafā o faipule fou na filifilia mai i faiga palota laiti sa faatautaia i le aso 29 o Iulai, ua mae’a nei ona faatauto ma avea ma minisita lagolago.
O le toatolu o i latou ua toe filifilia i Matagaluega sa seei ai tamalii sa manumalo mai i tofi faipule i le palota tele, seia vaganā le faipule o Vaisigano Numera Tasi o se itumalo faafaipule ua faaopoopo atu nei i le vaega faaupufai a le HRPP ina ua manumalo lea vaega faaupufai i le nofoa sa umia e le Itu agai le Tautua Samoa i le mae’a o le faiga palota tele.
O le afioga Vaai Papu Vaelupe sa taitaia le Tautua Samoa na toe soloia lona tofi faipule ina ua faamaonia moliaga o faiga faaalatua i le palota tele.
O le Aso Lua 23 o Aukuso i le ‘afa o le 12 i le aoauli na faatauto ai sui faipule fou i o latou tofi minisita lagolago poo Associate Ministers.
Ua faailoa mai e le failautusi a le kapeneta le afioga i le tamaitai Pule Sili o le Matagaluega a le Palemia ma le Kapeneta, Vaosa Epa, matagaluega ua tofia i ai i latou.
O le Afioga Tufuga Gafoaleata Faitua, ua galue i le Matagaluega o Punaoa Faalenatura ma le Siosiomaga, faatasi ai ma le faipule o Aleipata Itupa i Luga Fagaivalu Kenrick Samu.
O le afioga Alo Fulifuli Taveuveu ua avea ma minisita lagolago o le matagaluega o Tupe Maua faatasi ai ma le faipule o Aiga i le Tai Lofipo Filisi.
O le faipule fou o Satupaitea Lautafi Fio Selafi Purcell, ua avea ma minisita lagolago o le Matagaluega o Faatoaga ma Faiga Faiva, ma ua toalua ai ma le isi faipule o nofoa e lua o Vaimauga i Sisifo, Lenatai Victor Tamapua.
E pei ona silafia e 36 nofoa na manumalo ai le HRPP i le palota tele, peitai na soloia ona nofoa e tolu i faaiuga a le faamasinoga ona o tagi o faatosina o le palota.
O itumalo e tolu na soloia e aofia ai Satupaitea, Aleipata Itupa i Luga, ma Anoamaa i Sasae.
O le Tautua Samoa e tasi le nofoa na soloia, lea sa tauaveina e le afioga Vaai Papu Vailupe.
Ua toe maua e le HRPP ma lea nofoa ma ua faaopoopo ai le numera o itumalo ua lagolagoina lea vaega faaupufai poo le itu a le Malo, mai le 36 i le 37.
O lona uiga e 24 minisita lagolago ua filifilia o lona uiga o faipule uma e lei tofia i le kapeneta ua tofia ma filifilia i tofi minisita lagolago.
O le Aso Lua na faatauto ai minisita lagolago fou na usuia ai foi ma le fonotaga masani a le kapeneta, ona o le Aso Lulu 24 o Aukuso 2011 na tuua ai le atunuu e le alii Palemia mo le auai atu i le tatalaina aloaia o taaloga a le Pasefika o loo faia nei i le atunuu o Niu Kaletonia.
O taaloga ia sa talimalo ai Samoa i le tausaga e 2007.
