O le masina o Aperila ua fuafua e faatino ai mo le uluai taimi i Sini nei se aso faapitoa ua faaigoaina o le Poly Fest Sydney.
O lenei aso o faaaliga siva, laei ma taleni a le Atu Polenisia ua faia i Hawaii, Niu Sila ma isi atunuu o le Pasefika, ma o se taimi muamua lea ua auaufaatasi ai alii faiaoga ma sui tusitala ma leitio Pasefika i Aoga i Sini nei e fafau se polokalame mo Aperila.
O le alii faiaoga o Taaloga (P.E.) a James Meehan High School ia Fou Atonio na ia valaauina mātua ma sui o le Pasefika e aofia ai le sui o le Samoa Times ma leitio. O le susuga Fou Atonio o Fagalii ma Macquarie Fields sa aotauina i Avele a ua galue nei i le aoga a James Meehan.
Na auai i lea fono sui mai aoga a Casula, Ingleburn High, Sarah Redfer, Airds High School, Canberra High. O nai isi faiaoga Samoa e pei o Timo Time mai le Casula na fesiligia mātua ma faiaoga aemaise tama ma teine aoga i nisi o itu e finagalo e faaopoopo i le polokalame sa fafau.
O se tasi o manatu lelei na saunoa i ai le Amepasa o fanau aoga Pasefika i Sini nei ia Bruce Fusimalohi, o le sisva faatasi lea o fanau i soo se atunuu ae aua le sisiva lava na o fanau Toga i siva Toga faapea foi tamaiti Samoa i Siva Samoa.
E manatu le alii Amepasa o ia foi e mai Toga, “E tatau ona suifefiloi ma tamaiti ina ia iloa ai ma teu fatu e tamaiti le matagofie o isi agaifanua e ese mai lava ia latou tu ma aga faapea le femalamalamaai.
Na faaalia foi le fiafia tele o le alii sui Pule o James Meehan ia Mr Wawszkowics i lea manatu o le a molimauina i le Poly Fest Sini. Na vaaia lava i lea aso le maoae o le taumafai a fanau i le fia aoaoina atili o le gagana Samoa, Tonga ma Fiti faapea isi atumotu.
O le alii o Talavou Lipine na faafeiloaia mātua ma faiaoga i le gagana Samoa faapea le valaaulia mo le taumafataga tele na sosoo ai. O siva Samoa ma atumotu Pasefika na toe vaaia ai foi le talenia o fanau i siva.
E le gata i lea o le gaseseina o taumafa Samoa i le umu auā ua faia faapitoa lava la latou ogaumu i se vaega o le lotoā a James Meehan e ta‘ua o le Pasifika Garden. O le fuefueina o taumafa ma apa fafano ma le solo na faatino uma lava e le fanau e iloa ai ua aogā lenei tapenaga ua toe faamanatu ai.
O le toe taliu atu la i aoga pe a toe amatalia, o le a faamautu ai loa se aso ia Aperila auā lenei faamoemoe tele.
