Talofa lava!
O le maukeni o le vaiaso lenei o le “Squash Orange Dawn F1” O le ituaiga o le auaiga o le squash lea e masani ona lanumeamata, ae o le lanu moli le maukeni lea. E pei lona tofo o le chestnut, e fua tele, e umi masina o taatia ae tuai ona pala. E matua i le 90 aso. E ono maua se tulaga o le maukeni lea i le lanu manaia (Best Colour).
O le faasilasilaga mo i latou ua ola latou maukeni, pe mafai ona pue sou ata ma lou togalaau maukeni ona upload mai lea i le facebook a le Samoa Times faamolemole. Ta‘u mai lou suafa ma le igoa o lau maukeni. Talu ai ona e lē mafai ona avanoa sui o le tatou nusipepa e asiasi atu e pue ata i nofaaga uma, e faamalulu atu ai ina ia fesoasoani mai ia tatou galulue faatasi ona o le pisi o lenei vaitaimi.
E talitonu ua tofu aiga ma telefoni feaveai ma masini pueata e tapue ai ata. O le avanoa lelei foi lea e faatino ai le agavaa o alo e pulupululima faatasi ma outou mātua e faatino lelei tapenapenaga auā se
tulaga i le tauvaga.
Afai ua matua fua o lau maukeni, faatali seia afu lelei laulaaau ua foliga magumagu ae ua lapopoa fua, ona faatoa tau ese lea o fua. O nisi maukeni e matua i le 90 aso pe afai na totō i le amataga o Novema, ma ua tatau ona latalata ina matua i le faaiuga o Ianuari. A matua fua o lau maukeni, fillifili ni fua e ave i le tauvaga ona faataatia lea seia iloa se aso i le faaiuga o Fepuari e fai ai le tatou tauvaga.
Nisi fautuaga mo le soifua maloloina: O le vaitaimi lenei o le tele o le lago ma le pefu, e fautuaina e vaai fruits o loo tuu i luga o laulau e fufulu muamua a o lei taumafaina. E faapena foi vegetables ma fruits e faaatau mai faleoloa, e fufulu muamua a o lei faaaogāina.
E faaeteete foi le teuina o vailaau e faaaogā i togalaau, poo vailaau e faaaogā i le umukuka e ono au i ai tamaiti laiti, ne‘i te‘i ua onā pe afaina ai o latou soifua.
Afai foi e tagofia palapala (compost) faaaogā ni totigilima ne‘i te‘i ua e afaina, leaga e iai faama‘i e maua i nisi taimi i totonu o compost.
O le taimi lenei e totō ai fualaau e pei o le Kapisi Saina, silver-beet, beetroot, broccoli, cauliflower, kamokamo, sukini ma celery. Ua tuai ona toe totō pi, kukama, isaraelu ma tamato i fafo ona e fetaui ma le malulu o po, ma o le taimi lenei o loo faaaogā ai fualaau na pe afai na totō i le tolu masina ua tuanai.
O le vaitaimi lenei ua taugofie meleni ma saga i faleoloa ma maketi i weekend. Toaga e suisui fualaau e taumafaina i vaiaso taitasi auā o Niu Sila e tele naunau ituaiga fualaau eseese o loo maua ai.
Toe feiloai i le vaiaso fou pe a aulia i le alofa o le Silisiliese ma tatalo pea ia e Limaola.
