Faatāua lou olaga talavou, e ui i luitau o feagai ai….
O le tapueina ma le faatāuaina o le eseesega o a tatou lanu, gagana ma aganuu o se tasi lea o matafaioi ua laugatasia ai aganuu eseese a atumotu o le Pasefika.
Ae o se tasi o faatautaiga e iloa gatā lona faatinoina ma lē tele foi le silafia i ai o le toatele o o tatou tagata, e ui o se faatautaiga e ese le tāua ma le aogā, o le taumafaiga lea a se tasi o faalapotopotoga ua ta‘ua o le PHAB Pasifika, ina ia tapueina ma tuufaatasia tupulaga talavou eseese mai le Pasefika, e lē atoatoa le malosi o le tino (disabled youth).
O le tautua a le PHAB us silia ma le 40 tausaga talu ona faavae mai i Egelani, seia oo lava ina faatūina lo latou ofisa i Niu Sila i ni nai tausaga ua mavae.
O le taula‘iga o la latou tautua i Niu Sila, o le faatinoina lea o polokalame e faatāua ma faatupu faamoemoe i tupulaga Pasefika, e aafia ma lē atoatoa le soifua maloloina i le tino. O le toatele o tupulaga e auai i nei polokalame, o loo faaaogāina nofoa faataavalevale (wheelchair) e feoai ai.
O se tasi o alo Samoa, le susuga ia Paul Lavea, o se tasi lea o faauluuluga o le faalapotopotoga, PHAB Pasifika o loo nafa ma le faafoeina o a latou polokalame.
O le kuata lona lua o la latou polokalame na amataina i le masina nei o Iuni, e iai nisi o faaopoopoga fou ua amatalia. E pei o tulaga o loo faatāua ai siva faaanamua ma faaonapo nei, mai le Pasefika, aemaise o Samoa ma Tonga.
O se tasi o a latou sui sinia le tamaitai o Brigitte Laumatia, o loo feagai ma le vaega tonu lea. Ua tele foi faafiafiaga ma faamoemoe faapitoa ua amata ona auai atu i ai la latou ausiva, e pei ona iai lo latou vaaaulia ina ia faafiafia i le Pasifika Festival i le amataga o le tausaga aemaise foi nisi o aso faapitoa e pei o le faaaliga o aganuu ma siva Maori o loo tapena atu i ai ia Iulai, ua ta‘ua lea o le “Matariki Festival” e amata atu i le aso 28 Iuni seia oo i le faaiuga o le masina fou.
O se tasi o alo talavou o loo faapea ona fesoasoani malosi i polokalame ma le faatinoina o taga eseese mo le ausiva lenei ua tuufaatasia e le PHAB Pasifika, o le alii o Lawrence Apelu mai le aoga a De La Salle College.
O loo tatala mai le avanoa i soo se tasi o loo fia fesoasoani pe o fia auai foi i polokalame a lenei faalapotopotoga. O le susuga ia Paul Lavea, e faafesootai i ai i le telefoni (09) 278 7717.
