Ua amata faamaopoopo le aulakapi a tamaitai o le atunuu aua sauniuniga mo le Taamilosaga o le Ipu a atunuu o le Psefika, le Ipu o le FORU – lea e saili ai ni avanoa o nisi o au o lenei itulagi mo le Taamilosaga o le Ipu o le Lalolagi i le taitoafitu a tamaitai i le lakapi.
O Rusia lea ua talimalo i lea tausinioga tele ma o lea ua amata atu tapenaga a le aulakapi a tamaitai o le atunuu mo lea foi faamoemoe. O vaega o nei sauniuniga tele o le lava o le malosi, lava le tomai i le taaloga ma ia lava le mānava.
O le mafuaaga lea ua tapa ai le fesoasoani a le Asosi o Piiga i Samoa e le aulakapi a tamaitai le Manu Sina.
E tasi le aso o le vaiaso ua faatautaia ai toleniga faapitoa a le Manu Sina ma le alii o le Asosi o Piiga, Iutana Iutana – o lana fesoasoani ua faaauala mai i toleniga o le mānava.
Faaalia e lenei alii o le eseesega tele lava o tamaitai ma alii i lea itu o sauniuniga mo taaloga, e lē malosi le fatafata o tamaitai ma e mautinoa i le taaloga o le lakapi e tu‘itino, e moomia le lava o le mānava ma ia malosi le fatafata o le tamaitai e faafetauia osofaiga i taimi o le taaloga.
Faaalia e Iutana e tele lava ina mole gofie le tamaitai i taimi e pue pe taia ai foi i taaloga nei ma o le sauniuniga la lea ua taulai i ai lana fesoasoani.
E le faigofie toleniga ae ua vaaia le vave o le tali o tamaitai i taimi uma e maua ai le avanoa lea ma le alii o Iutana Iutana ona o le naunau lava ia malosi se au a le Manu Sina e masii atu mo tausinioga o le FORU Cup. O le masina o Aukuso lea e talimalo ai Fiti i lea taamilosaga tele. O au a Niu Sila ma Ausetalia o au ia i le pito i luga o lenei taaloga i le lalolagi, e le o moomia le tau saili o ni avanoa mo le taamilosaga lea i Rusia, o loo ua faapea ona sao sa‘o atu lava i le Ipu o le Lalolagi.
O Samoa la lea o le a tauva ma Fiti ma isi atumotu o le Pasefika i le sailiga o se avanoa mo Rusia.
O tamaitai ua filifilia i le au sauniuni lenei a Samoa ua faapea ona tofia mai i kalapu eseese i totonu o le atunuu. Na faatautaia ni taamilosaga i totonu lava o Samoa latou aua le sailiga o tamaitai o le au tele lenei a le atunuu.
Toe foi mai i le unaiga o le lava o le mānava, e foliga mālie toleniga ma auala o le taaloga o piiga ua saili ai lea malosi, ae e le o tuumāmāina foi e tamaitai o le Manu Sina.
E talie lava ma taumafai e faatino le ta o le fiti aemaise o isi auala ina ia saga faamalosia ai le pito i luga o le tino lea o loo taulai ai le unai o le malosi e mafai ona maua e le fatafata ma e mautinoa e mae‘a le mafutaga (camp) lenei ua maua se malosiaga faaopoopo o tamaitai ma ua lava sauni e tali atu i soo se luitau i totonu o le malae aemaise o le faatautino ai i taimi o taaloga.
O le tausaga foi lenei ua vaaia ai tamaitai o le lakapi ua maua avanoa e aoaoina ma faamautu ai i le nofoaga ua faafailele ai le lakapi le (HPU) i Tuanaimato ma o le Iuni Lakapi a Apia lea ua faagasolo faatasi lava taaloga lakapi a alii ma tamaitai i le taumafaiga ina ia saga unai tamaitai e tausinio i lea foi faagatama.
