Ua atoa le 17 o tausaga talu ona tulai mai le igoa lea o le Uila Emo i tuuga tulula. O le auvaa lea na faapea ona siamupini i tuuga o tulula i lea tausaga.
O tuuga kulula e le faatautaia i tausaga taitasi o le faamanatu ai o le Tutoatasi o Samoa. O le mafuaaga foi lea o le tele o tausaga faato‘ā faalogoina foi se siamupini o lea faagatama i le tai.
Mo tamaitai o le Uila Emo – na tulai mai loa le avanoa e toe tausinio ai i lea ituaiga taaloga, e lei toe tuua se avanoa ae agai mai loa e faaulu le latou tulula i le tausinioga o le faamanatu ai o le Tutoatasi ma le 50 o tausaga o le tulai mai o Samoa o se malo e pulea lava e ona tagata.
O afiafi uma lava la i le tolu lenei o vaiaso, ua agai mai tamaitai e toaiva mai le afioaga o Saoluafata i le taulaga o Apia. I Vaisigano ua potopoto ai ia tamaitai ma agai loa i le sami mo toleniga i afiafi taitasi.
E tasi lava foi le faamoemoe o nei tamaitai, ina ia toe maua aso ia i le 1985 lea na manumalo ai le kulula o le afioaga i tausinioga o le tutoatasi.
O loo iai foi le fautasi o le Uila Emo o loo tausinio i tuuga fautasi i le faamanatuga o le Tutoatasi. O taulelea o le afioaga ua faapea foi ona vaaia le malosi o sauniuniga i gataifale o Apia faatasi ai ma isi auvaa o fautasi o loo tausinio i lea vaega o faagatama i le tai.
Faaalia e le tamaitai kapeteni o le Uila Emo, Gloria Samuelu, sa iai le kulula o le afioaga i tausaga ua mavae sa faaigoaina o Moso, ma sa sola ma le tuuga o le tausaga e 1985. I le tulaga i tapenapenaga a le auvaa, na faaalia e Gloria, ua tele lava le suiga nai lo le taimi na faato‘ā amata ai toleniga ona sa tau faamasani.
E na o le tasi le lotu i totonu o le afioaga o Saoluafata, o le Ekalesia Faapotopotoga Kerisiano Samoa. “O tapenapenaga e ala i auvaa e lua, ina ia tofu sao tamaitai ma alii i le faamanatuina o le 50 tausaga o Samoa i lenei tausaga,” o se saunoaga lea a le peresitene o le autalavou EFKS, Fu‘e Peepee Vaa.
Na ia ta‘ua foi, sa faatupe lava e le autalavou le fausia o vaa e lua ma sa lafo i alii ma faipule o le afioaga e ala i aumaga e faatinoina le aloina o le fautasi. Ua savali i le lua masina talu ona faia tapenapena a le afioaga ma o le agaga lava ina ia faamanuiaina ma maua se tulaga lelei i le tuuga o le Fu‘a.
O kulula ua mae‘a resitalaina mo le tuuga o le Tutoatasi e aofia ai le Teine o le Uila Emo (Saoluafata), Teine Malo tau I (Faleu Manono Tai), Teine Malo tau II (Faleu Manono Uta), Nuulopa I (Apai Manono Tai), Nuulopa II (Apai Manono Tai), Aiga Paia I (Mafutaga Tina Taufusi), Aiga Paia II (Taufusi), I‘a o le Vainuu (Komiti Tamaitai Faleu Tai), Lavilavi (Komiti Tamaitai Faleu Tai), Vaiavea o Lifa (Manono Uta), Teine o le Fatuanava (Salua Manono), Le Tolotolo o Teine Uli (Salelologa) ma le Teine o le Paepaetuitui (Faleula).
