O tuua‘iga ua leva o laumanuia faasaga i le afioga Seve Tony Hills a o avea ma Komesina o le Tineimu ma galuega laveai i taimi o faalavelave faafuasei, ua alu alu lava taunuu i le faamasinoga se tasi o tuua‘iga mai se tamaitai faigaluega o le tineimu. O ia tuua‘iga o le faaoolima matagā ma le faaoolima poo le common assault.
O le tausaga e 2007 e oo mai i le 2011 na laumanu‘ia ai ia tuua‘iga a le tamaitai o Sefulu Siaosi e pei ona sa ia faamatala i luma o le faamasinoga a o suesueina moliaga e faapea, o se tasi o galuega a le ofisa na malaga ai ma lē ua molia, ma faapea ona faatino ai e Seve ni amioga matagā ia te ia (se‘i tulou). O se tasi foi o galuega sa faatonuina ai o ia e lē ua molia a o avea ma pule o le fuimu ina ua mae‘a le afā o Eveni la te malaga e tusitusi uma mai mea na faaleagaina. O le la asiasiga lea na faia ai foi e lē ua molia se gaioiga e pei ona ta‘ua muamua atu.
O le alii loia o Patrick Fepuleai sa tulai mo Seve Tony Hills lea sa ia fesiligia le tamaitai o Sefulu pe aisea na lē faaulu ai lana tagi i leoleo i le 2007 ina ua uluai tupu mai le gaioiga faapea le 2008, 2009, 2010 ma le 2011, ae na faatoa faaulu lana tagi i leoleo i le tausaga nei i le masina o Me ina ua lē toe avea lē ua molia ma komesina o le tineimu.
Sa tali lē na tagi sa maualuga ia te ia lona loto onosai, ae na suia lona lagona ina ua faia e Seve ni faamatalaga i luma o le aufaigaluega na ia faapea atu ai ua tele tausaga o faigaluega ae na te lei iloa lava fai se galuega. O tala ia na oso ai ona lagona ua matamuli i le aufaigaluega ma manatu ai o se gaioiga a lē ua molia e faamasiasi ai o ia ona o lona lē talia o le manao o Seve. Sa teen e le tamaitai o Sefulu le fesili a le alii loia pe o iai nisi poo se tasi o i tua o nei mea uma sa tauanauina o ia e faaulu lana tagi.
O le Aso Faraile na tea nei na aumai ai le faaiuga a le faamasinoga faaitumalo e pei ona sa faatautaia le suesueina o molimau e le tamaitai faamasino le afioga Mata Tuatagaloa. Ua faamaonia ai le moliaga e tasi o le faaoolima matagā ma na faatonuina ai lava e le tamaitai faamasino le ave o Seve e taofia i le vaaiga a leoleo i le falepuipui i Tafaigata e faatali ai le lauina o sona faasalaga i le Aso Faraile o le vaiaso nei.
O le taulotoaiga o le tausaga nei na faamuta ai e le Malo le avea o Seve ma Komesina o le Tineimu ina ua maua ane i se suesuega a le Komesina o Sulufaiga, ni faaseā a le aufaigaluega i ni faaletonu i le faatinoga o ona tiute. O le tasi lea o faaseā na suesueina e le Komesina o Sulufaiga o tuua‘iga o le faia o ni uiga matagā i se tamaitai faigaluega o le ofisa.
