Mo Samoa lava ia ua silia nei ma le 20 tausaga talu ona faamautu le faigauo a lo tatou malo ma tagatānuu ma le malo ma tagatānuu o Saina. Ua lē o toe po malaē i le mau fesoasoani ua mafai ona maua e Samoa i atinae eseese ona o lenei malo tele.
O le fono lona lua i le va o atunuu o le Pasefika ma lea malo tele na faatautaia i Saute o Saina i le amataga o lenei masina ua toe faamautu ai foi nisi atinae ua manatu lea malo e tatau ona aumai e lē gata ia Samoa ae faapea foi isi nuu tuaoi o le Pasefika.
O le alii Palemia o Samoa le susuga Tuilaepa Lupesoliai Sailele Malielegaoi lea sa fai ma sui o Samoa i le fono lona lua a malo o le Pasefika ma le Sui palemia o le malo o Saina i le vaiaso ua tuanai. O lea fonotaga na toe faamautu ai le fesoasoani a Saina ua ofo mai i atunuu laiti o lenei itulagi.
O le vaaiga ua iai i lenei vaitaimi ua mafanafana le mafutaga a lea malo tele ma atumotu laiti o le itulagi, ae ua talafeauga foi lea tulaga i le tele o atunuu o Europa ma isi malo sa masani ona faalagolago i ai atumotu o le Pasefika ua iai le faagaulemalie i nisi o atunuu laiti i le faasoaga o fesoasoani e aumai i ai. O lea la ua atili ai le malosi o le sao o Saina i malo laiti nei.
O loo faaauau le va galulue faatasi o Samoa ma atunuu e pei o Niu Sila ma Ausetalia, ae ua telē le suiga i lenei vaitau i le vaaia ai o le tele o galuega ua faatautaia e le malo o Saina aemaise i le itu tau i fale tetele e pei o le falema‘i fou lea ua iai nei.
O fale taalo ia na fausia mo taaloga o le Pasefika i Saute, o se isi fale fono fou o loo fausia i le taimi lenei i Tuanaimato mo taligamalo o le tasuaga fou, o ofisa fou o le Malo ma faleaoga.
O nei galuega uma ua faaopoopoo i le agai i luma e pei ona faalauiloa i lenei fonotaga ma le faamoemoe o le a faaopoopo i ia fesoasoani le atinae o faatoaga ma faigafaiva, o le atinae o vaomatua atoa ai le siosiomaga ma atinae o malosiaga e mafai ona faaaogā e atumotu laiti i le lumanai ma faaitiitia ai le faalagolago i le faatau mai o le suauu mai i fafo.
Ua iai nisi ua laga foi le masalosalo i lenei agai mai o lenei malo tele ae ua manino lava i le vaai a atumotu laiti, o le tasi lenei o malo tele ua mafai nei ona ofi mai i le Pasefika ma e mautinoa le umi o se taimi o faifai mea faatasi ma atumotu laiti o le itulagi.
