E toalima ua molia ile tagi ale afioga Peseta Vaifou Tevaga faasaga i nisi o faatonu ole latou kamupani nonu ole Local Partners and Associates i Vaitele. Ole toalima lea e aofia ai le susuga Laaulialemalietoa Leuatea Polataivao Fosi Schmidt, Heather Schmidt le faletua o Laauli, Martin Schwalger, Apulu Lance Polu, ma se tagata faigaluega ole kamupani o Tuitui Aiolupo.
E lei tuuina atu ni tali a ē ua molia ona e lei mae’a ona faamautu moliaga a leoleo ole mafuaaga lea ole toe tolo atu ile aso 10 ole masina fou o Oketopa. O moliaga muamua na faia e leoleo ole maua oni tupe mai ni auala solitulafono, ma le umia oni faamaumauga tau faasese peitai e faatoa manino uma moliaga faasaga ia i latou nei e toalima pe a toe valaau le mataupu ile masina fou. Ua faatonuina e le faamasinoga le taofia o tusifolau mo i latou uma ua molia.
Ole tagi ale afioga Peseta Vaifou Tevaga ua faatutu ia i latou e toalima e mafua i feteenaiga na aliali mai ile va o Peseta ma faatonu ole kamupani nonu. O faaletonu e mafua mai ile faaaogāina o tupe ale kamupani a’o avea se tasi o atalii o Peseta ma faisea ma faatonu ole kamupani na mafua ai le feteenaiga o lea tamalii ose faipule ole Palemene ma faatonu oni faisea foi ole kamupani le susuga Laaulialemalietoa Leuatea, o Martin Schwalger ma Apulu Lance Polu.
Na faifai tetele le feteenaiga ma oo ai i aao o leoleo le mataupu lea na noatia ai le avanoa mo Peseta e oo ile lotoā ma le ofisa ole kamupani i Vaitele. O noataga ia na le mafai ai foi ona silasila lea tamalii i faamaumauga o tala o seleni maua ma seleni faaalu ale kamupani. Na finau Peseta ile faamasinoga ma tofia ai se tasi nate tauaveina le vaaia ole kamupani a’o tāadlia le faamasinoga o Peseta i ona moliaga ole faia oni faamaumauga sese ma le aafia ini gaioiga faaalatua.
Na faia le faamasinoga o Peseta Vaifou ma aumai ai le faaiuga e le faamaonia moliaga. Na liliu lea tamalii ma faaulu lana tagi e totogi atu e isi faatonu se vaegatupe tele e faitau miliona ona ua faaleagaina lona tagata ile latou tagi o moliaga solitulafono aemaise e le o mafai lava ona tuvae Peseta ile lotoa ma avanoa foi ona silasila i faamaumauga tau tupe.
Oloo talia nei se faaiuga ale faamasinoga i lea finauga, ae o lea ua amata faagasolo taualumaga ale faamasinoga i moliaga faasolitulafono ua molia ai isi faatonu ole kamupani ma se tagata faigaluega lea ole a toe valaau ile masina fou.
