O tala ole loto mafatia ona o sauaga na oo iai le olaga oni tina sa matuu lo latou lagona e fia faamatala o latou mafatiaga ile suesuega ale komisi suesue filifilia oloo auai ile sailiiliga o sauaga i totonu o aiga ua faasolo ile atunuu atoa.
Ole tina muamua na faia lana molimau ile suesuega na ia fofola ile komisi ma le au faafofoga o sui mai le atunuu na auai ile uluai aso o suesuega lagona mafatia na oo ia te ia, a’o taumafai e saili se fesoasoani ile sauaina o ia ele tamaloa sa la mafuta.
“O lagona e le mafai ona outou silafia le matuitui o ona ooooga ona oute iloa ailoga e iai se isi o a tou afioga na oo iai”. Ole molimau lea ale tina (taofia le suafa) a’o faamatala le lē maua ose fesoasoani mai nisi o faalapotopotoga na sulufai iai.
“E oo lava ile ofisa o leoleo na ou alu ma logo iai le fasi o a’u e lo’u toalua ma le faamata’u o a’u i upu, ae sa le maua ai se laveai”. Na faamatala le tina pe ana leai le Toomaga mo ē Puapuagatia ose faalapotopotoga ua sulufai nei iai le au mafatia i sauaga, e le maua sona fesoasoani.
Na fesili se tasi ole komisi suesue ile tina poo le ā se fofo o ona silafia auā o lea na maua lona fesoasoani mai le Toomaga, ae na tali le tina, “Na ou sau ile suesuega ma lo’u talitonuga e maua atu ai se fofo, ae oute lei sau ma se fofo”.
Ole suesuega oloo faagasolo nei i vaega uma o Samoa oloo aoao mai ai ma finagalo faaalia o matai o nuu ma afioaga e fesoasoani ile suesuega, ma e faapea foi i nisi o faafeagaiga o ekalesia kerisiano ile atunuu oloo iai ma lo latou sao ile tuuina atu oni o latou lagona i sauaga ma le latou pitolaau oloo faatino e fesoasoani e fofo ai lenei faaletonu.
Na maua le avanoa ose tasi o matai mai le afioaga o Lepea le tofa Vaitagutu Viliamu e faailoa ai foi sona finagalo.
Na fetalai le tulafale i lana folasaga ma ia faailoa ile komisi o lo latou nuu e matuā leai ni sauaga e aafia ai totonu o aiga auā e mamalu pulega a matai.
Ole isi mafuaaga ole le tutupu oni sauaga i Lepea e pei ona faaalia e Vaitagutu Viliamu ona o eleele oloo nonofo ai le nuu o eleele e faasino ile Pule ale suafa Sa’o le afioga ile Tupufia le Faumuina.
“Ole isi lena mafuaaga auā a saunoa mai lava le Faumuina e tapena ese ma eleele pe a iai ni faaletonu faapea e aafia ai tagata ole nuu, e leai lava so latou loto e faia”. Na molimau se isi matai mai le nuu o Lotofaga Safata le susuga Lau Pepese Tu’ua ma ia faailoa ile komisi o lo latou nuu e mamalu tele pulega.
A iai se sauaga tau feusuaiga e aafia ai se alii ma se tamaitai ole nuu ae mulimuli ane ma’ito le tamaitai e faasala uma ele nuu le alii ma le tamaitai ua ma’itaga. Ose tasi lea o molimau na tele iai fesili a sui ole komisi suesue sa ese ai lava foi lana folasaga mai isi matai sa valaauina ele komisi.
Ole afioaga o Nofoalii na see iai le suesuega ile Aso Faraile na tea nei lea sa maua ai le avanoa ole atunuu e amata mai Falelatai e oo ane i Nofoalii e auai e faafofoga i molimau ma tautinoga mai matai ma nisi o tina sa sauaina. Ole Aso Faraile ole vaiaso nei e toe foi mai ai i Apia le suesuega lea ole a molimau ai nisi ole itupa o alii sa latou faatino ni sauaga.
Ole a lē mafai ona faafofoga le atunuu ma le au tusitala i ia folasaga ona ole puipui ole suesuega i aafiaga o ia tagata pe a faasalalau ma iloa poo ai i latou.
