O le tiute o le tulafono e ala i le tautua a leoleo ua sulufai i ai le pulega o le Esetete Tausi e ana eleele o loo finauina e Satapuala, ina ia mafai ai ona faatino le galuega a fua fanua a le Malo mo le fuaina o le 10 eka e fausia ai le falemai faaitumalo e faatupe i se fesoasoani a le Malo o Amerika.
O se finagalo o se tasi o sui o le Komiti faafoe o le Faalapotopotoga o le Esetete Tausi, o loo umia faaletulafono ia eleele na ia faailoa mai ai le ave o le mataupu i leoleo.
O le lua vaiaso ua mavae na agai ai fua fanua e faatino le latou galuega peitai na oo i ai matai ma nisi o le nuu o Satapuala ma taofi le galuega. O le latou mau seiloga e faatino e le Malo upu o le latou feiloaiga ina ua solomuli ese ma fanua i ni nai tausaga e lei mamao atu, ae se‘i saili se auala e tali ai le Malo i le manaoga o le afioaga.
O le finagalo o le alii pule o le Esetete Tausi ua ia tautino ai, o eleele o loo finauina nei e le o ni fanua o Satapuala ae o fanua o le faalapotopotoga e aia uma i ai tagata o le atunuu ae umia e le Malo.
O le finagalo faaalia o le faipule o Ana Alofi Numera 3 o se matai o lea afioaga, le Afioga Toesulusulu Cedric Schuster, afai ua iai se taofiga a lo latou nuu, o lona uiga e mafua ona e mananao matai e feiloai ma le Malo e soalaupule le latou faigaupu muamua.
O le faigaupu lea na faia a o soifua Toalepaialii Toesulusulu Siueva le afioga i le Sa‘oalii ua tuumalo. Le taimi lea na nofoia faamalosi ai e le nuu se vaega o eleele o loo faafeasagai ma le malaevaalele, a o eleele foi ia sa nofoia faamalosi e le aiga o Saipaia o Satuimalufilufi lea na poloaina e le faamasinoga maualuga e solomuli ese ma eleele.
Talu mai lea taimi seia oo ina toe aliali mai i luma finauga i le va o Satapuala ma le Malo i eleele ia, ua faailoa e le Palemia susuga Tuilaepa L Sailele Malielegaoi, o le faaiuga e faia i ni mataupu faapea o le faaiuga foi lea e faia i isi nuu o loo iai a latou talosaga i eleele o loo i o latou tuamaota ma laoa.
E oo mai i le taimi nei e lei faia se gaioiga a leoleo i le eleele ua taofia e Satapuala ona fua. O le molimau mai se tasi e latalata i le mataupu lenei, e le faigofie ona agai leoleo e faatino o latou tiute ona e soalaupule muamua ma matai o le afioaga ona faato‘ā gaioi ai lea.
