O le vaiaso muamua lenei ua amata ai le galuega tele o le toe faafouina o le Maketi o Fua o faatoaga i Fugalei.
O loo saofafai ai lava le au fai poloka i totonu o le maketi e faaali le tetee i le leai o se nofoaga mautu e agai i ai i totonu o le talafatai o le taulaga. O le toatele ua o ese ua agai i Vaitele i le maketi fou oloo iai.
O nisi ua agai ane i eleele ia e faafesagai ma le maketi i Fugalei, i fanua o le afioga i le faipule o Toleafoa Faafisi, ma fanua o le aiga o Vaai i Fugalei lava ma faatutu ai faleie auā le faatau atu ai o fua o faatoaga ma isi oloa sa mafai ona faatau mai i le Maketi i Fugalei.
E faagasolo uma lipoti o lea maketi ae ua faalauiloa nei foi e le Pulega o Eleele o Samoa – le Samoa Land Corporation ana foi fuafuaga mo le Flea Market lea e i Savalalo. O ina lea sa see ese ai le toatele na faatau muamua ai fua o faaeleeleaga ina ua faamalosia na o lavalava lava ma faleaiga vela o le a mafai ona faatau ai i Savalalo.
O lea la ua foliga mai o le a agai ese foi i latou i lea nofoaga ona o le manaoga o le Malo e “fausia nisi o nofoaga tetele i lea itu o le taulaga,” e pei ona saunoa i ai le tamaitai Ofisa sili o le Faalapotopotoga lea o Eleele a Samoa le SLC e pei ona silafia ai e le atunuu.
Faaalia e le Afioga Afoa Arasi, o se taumafaiga lenei ua leva ona talanoaina ma fuafua mai e le Malo ma o lea la ua oo i le taimi e faalauiloa ai. “O le fuafuaga alualu mamao foi a le Malo ina ia toe agai uma lava le au fai oloa i totonu o le Maketi i Fugalei ma le Maketi i Savalalo i le nofoaga lea ua amata fausia nei i le maketi i Fugalei,” o se faaaliga lea a le Afioga Afoa.
“O se galuega tele lea ua amata nei mo le maketi o fefaatauaiga i Fugalei, ma o le tausaga atoa ma le ‘afa e fausia ai lea nofoaga ma le faamoemoe la lea e ave uma i ai atinae tau i maketi lava ia aemaise mo le au faifaatoaga pe a mae‘a.”
O le faalautele ai o le Maketi i Fugalei o le galuega lea ua patino i le pulega o lea maketi o le Faalapotopotoga lea o Taui o Faalavelave faafuasei poo le Accident Compensation Corporation (ACC).
O le maketi lea e i Savalalo, o le meatotino lea a le SLC ma o le vaiaso na tea nei lea na feiloai ai lea faalapotopotoga lea ma sui o le aufaipisinisi o loo ua iai a latou fale poo poloka o le maketi i Savalalo e logo i ai fuafuaga nei a le Malo ma le manaoga ua iai nei ina ia amata loa ona saili se isi nofoaga e mafai ona faamautu i ai le aufaipisinisi o Savalalo mo a latou foi faatauga, ma e i totonu o le tausaga atoa o le a faatali ai le galueg ua faatautaia nei i le maketi i Fugalei.
E filemu lava le talanoaina o lea mataupu e pei ona ta‘ua e le Pule Sili o le SLC, Afoa Arasi auā na malamalama lava itu uma e lua i le faatalanoaina o lea mataupu.
“E le o faamalosia i le taimi nei le agai ese atu o le au faipisinisi ma le maketi i Savalalo, oloo matou galulue faatasi e sailia ni nofoaga e agai i ai le au faipisinisi nei ina ia sologa lelei pea a latou pisinisi.
O le fuafuaga mamao lenei a le Malo ma e le o mautinoa foi i le taimi nei poo le ā se poloketi o le a fausia i lea vaega. Na ta‘ua e Afoa e le o mananao e tulai mai se faafitauli e pei o le itu oloo lē mautonu ai le toatele o le au faipisinisi i le maketi i Fugalei.
“Na tali leleia lava e le au faipisinisi le sāvali ma o le ala foi lea ua tonu ai ia i matou le fesoasoani i ai mo sailiga o ni nofoaga e faamautu i ai, ma e faatali lava le amatalia o le galuega seia mae‘a ona agai ese uma i latou.
E silia ma le 80 le aofai o fai pisinisi taitasi oloo faaaogāina lenei maketi ma e taitolu i le fa poloka a le tagata e toatasi oloo totogiina mo ana oloa. Na ta‘ua foi e Afoa oloo faia foi se galuega i le Maketi i Vaitele mo le faalauteleina auā le toatele o iai, ona o le toe faaleleia o le maketi i Fugalei.
Na fesiligia ai foi nisi o faipisinisi i Savalalo e tusa ai ma lea mataupu ma e iai lava nisi ua lagona le faanoanoa ona itu lava tau maketi. O se tasi nei o tina faipisinisi na mafai foi ona faaalia lona faanoanoa tele, o Pele Kalolo na amata lana pisinisi i le vaega fou o le maketi lea e lei leva ona toe faaleleia.
“E manaia lava fuafuaga uma oloo manatu ai le Malo, ae peitai o le a faigata lava ia i matou ma a matou paaga faatau ona toe faaauau fefaatauaiga e pei ona masani ai,” o le saunoaga lea a Pele.
“Ua masani foi tagata e ui mai i le itu lenei ma e afe gofie. Afai ae maua se isi nofoaga o le a umi foi se taimi e tau faamasani ai ma tau toe amata ai.
O le Samoa Loko Style e lei leva foi ona tatalaina se tasi o ana lala i totonu lava o le maketi lenei, ma o le faanoanoaga foi lea a le sui a lenei kamupani. “Talu ona amata tatalaina la matou fale lenei, e lei ‘asa lava ma se faatau.
E toatele foi nai a matou paaga e tulituliloa mai inei mo faatauga, peitai ua faateia lava ina ua logoina mai e toe tapena foi i matou mo se isi nofoaga,” o le tali lea a Harold o le Samoa Loko Style.
“E lei iloa foi poo gafea o Apia o le a siitia uma ai, ae atonu o le a sili atu foi se manaia o le tupe maua i le nofoaga ua fuafua le Faalapotopotoga o Eleele a Samoa e faatu ai a matou pisinisi.
Maketi Fugalei
E lei ano lava le toatele o le au faipisinisi laiti i totonu o le maketi i Fugalei i le aveai na tuuina atu ina ia oo atu ia Iulai ua tapena uma ese.
O foliga lava o tiute ma galuega a i latou oloo faaaogāina le maketi i aso uma, na alia‘e foi i le Aso Tofi lea na fuafua e le toe vaaia ai se isi.
O nisi o i latou oloo faaaogāina faleoloa ua mae‘a tapena, oloo tapena pea lava isi ae o totonu lava ia o le maketi e leai ma se gaee. Ina ua fesiligai le tina ia Tina Manu na malomaloā ai lava i totonu ma faapea mai, “ou ke le kaikai oga alu ese ma le mea gei, kusa lava pe sau le masigi e sua i lalo ou ke gofo ai lava iigei i la‘u poloka.”
E leai lava se eseesega o le tali a le tina lenei ma le toatele o i latou oloo faaauau lava le faatauina o a latou oloa i totonu ma fafo o le maketi. E lei faaitiitia ai foi le lauina mai o meamata a le au faifaatoaga i le vaega o le maketi e masani ona faatauina ai.
O Galuafi Tonu na maua atu foi e tusa ma le ono taga talo oloo amata fola i fafo i le itu tauagavale o le maketi ma na faaalia ai foi lona faanoanoa tele i lea tulaga.
“E leai lava se isi mea matou te o iai pe a tapunia loa inei. A le aunoa ma le agai atu loa e faaaogā fafo o le maketi i‘a e leai lava se mea e toe maua e matou,” o le saunoaga lea a Galuafi.
“Ua fai lava si mamao o Vaitele ma e le toe iai foi se avanoa. O matou o le mea lava e agai i ai pasi o le nofoaga foi lea e faatau ai a matou meamata.”
O le faaiuga o le vaiaso nei lea ua fuafua nisi o i latou nei e tapena ese ai loa ma le maketi ma e moomia pea lava le fesoasoani a le Malo e pei ona latou faatagisia i le vaiaso ua mavae.