A poto lava le tina ma le tamaititi, poo le teineititi e fesaua’i lanu eseese o pepa sa faatau mai ai kofe (coffee mix), poo taga na fafao mai ai pamper o tamaiti, o le aulelei foi lena o le ato ma anagata, ae fua foi i ai le tau. O le taunuuga lena o a’oa’oga o faia nei i nuu i tua, mo le faatamaoaigaina o soo se tagata.
O le tausaga mulimuli lenei o le polokakame faatamaoaiga o Nofotane i Samoa a le Toomaga mo e Puapuagatia ma lagolagoina e Malo Aufaatasi. Ae ua see atu ai nei i le faaaofia ai ma fanau pei ona molimaunia mai i le poloakalame i le afioaga o Nuu Fou Faleata.
Ma molimauina ai le malosiaga o le fafine ua iai lona silafia ma le tomai e faatino ai le pisinisi ma tufa atu ia latou fanau. Ua avea ai nei o se taualuga o lenei polokalame ua lua ai tausaga talu ona faataamilo i Upolu nei ma Savaii.
Ina ua savalia ai le lona 24 o polokalame faataamilo o le laasaga mulimuli, ma manuia ai le aulotu Ekalesia Faapotopotoga Kerisiano Samoa i Nuu Fou.
Talimalo ai le faafeagaiga ia Letaulau ma le faletua ia Tina Pesaleli. I faamaumauga mai le pepa o faamatalaga a le Toomaga mo e Puapuagatia, e lē na’o le tupe maua ma le tamaoaiga na taula’i iai le tilotiloa a le polokalame lenei.
Ae sa mata’ituina ai foi ma le tausia pea o le pisinisi ma faaputuputu tupe i le faletupe e le tina ua manuia ae o lona aiga. Faatasi ai ma le faatumauina poo le faaauau ai pea lea o le pisinisi. Na mata’itu foi e le Toomaga, le faaaogāina lea o lona mafaufau i auala e su’e ai le tupe ma ‘oa ai pea ona lima.
O iina tonu lava lea e maua ai e tina ta’itasi ma o latou auaiga, le lototele e faaauau, afua mai i le lagolago o loo ia maua. I le polokalame faai’u lava ia i le nuu o Nuu Fou, e lata i le 100 i latou na auai i le aoaoga, e aofia ai e autalavou, ma faifeau a ekalesia i le nuu, ae latou faletua, faatasi ai ma fafine nofotane.
Ua maitauina foi e le Toomaga, o le faalauteleina atu o lenei polokalame faa’oa tina, tama ma fanau talavou, e tāua ma talafeagai ai lea, i le laasaga faaauau ai pea o le faatamaoaigaina o Nofotane. Aemaise ai lava o le fausia lea o oloa ma maua mai ai tupe, ma maua ai foi le loto malie male manaoga poo le naunau e faifai pea.
Talanoa ai le tina ia Siliniu Lina Chang, Peresitene o le Toomaga, ua fetaui lelei lava le polokalame lenei i totonu o Nuu Fou, ma le tuua o aoga.
Ua a’oa’o atu iai le faaaogāina o lapisi plastic ina ia toe faaaogā lelei e toe fausia mai ai ni oloa, pe tasi pe lua ni oloa eseese e a’oa’oina e le tamaititi, o se fiafiaga foi lea. O nisi o nei fanau ua mafai ai nei ona o latou fesoasoani i latou tina nofotane e gaosi le oloa taulima.
O le isi laasaga na matuā sili ona faafiafiaina ai le taunuuga o le polokalame faai’u lenei a Nofotane, ona ua oo lava i faletua o faafeagaiga mai aulotu i Aele Fou ma Vaitele uta, ua latou faaaogāina uma lava le avanoa lenei, e aooga ai i le faapisinisiina lea o taumafa na a’oa’o ai le kukaina, pei o donuts, keke puaa, ma isi.
Ma saga tatala atu ai lava faamanuiaga i fanau talavou a ekalesia e le’o faigaluega, e aoao ai e faletua o faifeau le faiga o kuka mo oloa e faigofie ona faatau ma taugofie foi lo latou gaosiga.
O talanoa Siliniu, ua amata ai nei foi ona faaofi mai fanau e le’o aooga ma leai ni galuega e maua, mai le nuu o Toamua uta i le polokalame.
O le auga lava ina ia tuuititia ai le ola faalagolago o tatou tagata, pei ona amata mai ai i Nofotane ae ua aofia atu ai ma fanau i le laasaga mulimuli pei ona faagasolo ai nei.
O lea manaoga o Siliniu e fesoasoani i soifua manuia o tagata o Samoa, e aofia ai ma lona fausia lea o se faleaoga faaopoopo i totonu o le lotoa a le Toomaga i Tuana’imato, e a’oa’o ai meataulima e fanau ua fili mai a aiga, o le atunuu, o mana’omia le tamaoaiga aemaise lava i itu tau auala e maua ai tupe i le lumana’i ma faatu ai pisinisi laiti e amata ai.
E uma ane le polokalame lea i Nuu Fou, e 16 i latou na lesitala mo le amataina o a latou foi pisinisi laiti, e aofia ai ma le aoga Aso Sa ma le Autalavou a Nuu Fou.
