“O le tautua lea e faatino e outou e matuā tāua lava i soo se atunuu temokalasi, auā foi o le vae lona fa lea o pulega o soo se Malo faatemokalasi”.
O le finagalo o le Minisita Lagolago o le Matagaluega o Fesootaiga ma Faamatalaga Faatekonolosi le tofa Lealailepule Rimoni Aiafi, ina ua ia saunoa i le aso o le saolotoga o tusitala ma le aufaasalalau i Samoa ma le lalolagi e pa’u tonu i le aso 3 o Me o tausaga uma e pei ona aloaia e Malo Aufaatasi. “O le pitolaau lenei o loo mafai ona manino ai soo se mataupu e nunumi i pulega a le Malo poo faalapotopotoga faapea totonu o pulega a nuu ma ekalesia”. Peitai na faaalia e Lealailepule o se tautua e ao foi ona faia ma le faautauta auā e leai se saolotoga e tuu talaloa auā e iai tulafono ma taiala e lima taitaiina ai.
O le tausaga nei ua ave le faamamafa o lenei aso faamanatu i le mataala o tusitala ma le aufaasalalau i faasalalauga pepelo poo fake news lea ua auala mai i luga o fesootaiga televavave faaonapo nei le social media.
E talitonu le Minisita lagolago o le tasi lea o popolega ua iai i soo se Malo o le lalolagi ona ua faaaogā le saolotoga e faaali ai lagona ma manatu i luga o ia auala o fesootaiga, ua sau ai ma tala e lē moni ae o ni tala ua faatupu e faafoliga o ni mea moni. “O le tasi lea tulaga ua silasila pea iai le Malo ona e tatau ona iai se auala ma se faiga e taofia ai”.
O le facebook e pei ona silafia, o loo faia suesuega a leoleo ma le ofisa o le Loia Sili a le Malo ia i latou o loo faia faasalalauga sese i le fesootaiga o le Ole Palemia. Ua faaalia ai e le Palemia susuga Tuilaepa Sailele Malielegaoi i se tasi o ana feiloaiga ma tusitala talu ai nei, o lana molimau i faasalalauga i luga o lea fesootaiga o se taumafaiga e taitai sese ai mafaufau o tagata ma faatupu ai le loto ita ma le feitaga’i o tagata faasaga i le Malo.
Peitai o le itu sili ona faanoanoa ai o faasalalauga taufaasese ma le talapelo faasaga i tagata o aiga ma nini atu ai ma fanau.
O le lapataiga tele lea ua ave i tusitala ma le aufaasalalau i Samoa ia mataala ma faaeteete i le soona faaaogā o ni faamatalaga e maua i luga o le facebook ma isi fesootaiga ina ia aua ne’i talitionu gofie iai, ae sailiili mae’ae’a pe moni ia faasalalauga.
O le molimau a le minisita lagolago o le saoasaoa o le faaaogāina e le atunuu aemaise o tupulaga o le facebook, ua taofia ai le faalogologo i le leitio, matamata i televise ma faitau nusipepa o loo lima taitaiina a latou faasalalauga i taiala ma tulafono.
