O se tuufaatasiga tele sa faataunuuina i le aai o North Shore, sa tuufaatasia e le au faipisinisi ma sui taitasi o le asosi e lē gata i Niu Sila, a o isi foi atunuu o le lalolagi.
O lea aso tāua tele sa faamanatuina, sa lotolotoi ai foi ma le alii pulenuu o le pulega faaitumalo a lea aai, le susuga ia Andrew Williams.
O le sini autū o lea faamoemoe ona o le faatāuaina o tu ma aganuu a atunuu taitasi o loo iai i totonu o lea foi asosi, aemaise ai o le tulaga o fesootaiga ma faiga faauo i le vaega o pisinisi ma isi atunuu.
E silia ma le selau i latou sa auai ma faatasi ai i lea feiloaiga sa faataunuuina i le nofoaga autū o fesootaiga lautele ma atunuu eseese i totonu o le aai lava i North Shore. O le fuaninumera tele sa aofia faatasi ai ma sui o malo uma o le lalolagi o loo iai i totonu o le asosi.
O malo mai Peretania, Amerika, Ausetalia, Korea, Saina, Iapani, Taialani, Peleseuma, Malta, Oseteria, Italia, Filipaina, Bangladesh, ae filofilo ai ma Samoa.
O le afioga i le Konesula o le malo o Samoa, le afioga ia Faolotoi Reupena Pogi, sa fai ma sui o le atunuu i lea foi feiloaiga tāua tele. Sa auai foi se tasi o sui o le Palemene a Niu Sila, Darien Fenton i lea lava faatasiga, aemaise ai o sui mai faalapotopotoga eseese e pei o pisinisi ma alamanuia, o taaloga, a‘oa‘oga, o le vaega o puipuga ma le tele lava o isi mau faalapotopotoga sa auai uma i lea faatasiga.
E tele ni vaega o le aai sa asia e sui sa auai mai, o nofoaga o loo iai le malosi o Niu Sila i le tulaga tau a‘oa‘oga, taaloga alogavaa ma isi. O le naunau lava ma le fia silafia e sui mai atunuu o le lalolagi o nisi o vaega tāua o loo tautaua ai Niu Sila i le tulaga tau taaloga ma a‘oa‘oga ma isi atinae, o le isi lea autū o le feiloaiga ma le asiasiga.
O nisi o nofoaga sa agai ma asia e aofia ai le North Harbour Stadium, o le nofoaga o le Mellennium Insitutute, Takapuna Boating Club, Massey University, AUT Akoranga, ma le North Shore International Academy.
Sa faapea foi ona faia se faafeiloai faapitoa mai tagata Whenua, i le latou lava foi gagana, ma tu masani a Maori, auā o le tasi lea o itu o loo tautaua ai foi Niu Sila, ona o loo faaaogāina pea ma faatāua, aemaise o le amania tele aganuu ma faiga a tagata e ona le laueleele.
Na taualuga ma faaiu lea feiloaiga i le vaiaso talu ai, i se lauga a le susuga i le alii pulenuu o North Shore Andrew Williams.
O lana lauga sa ia toe faamanatu ai le tele o le sao o le aai o North Shore i le atunuu o Niu Sila, e ala i taaloga, a‘oa‘oga ma le tele lava o isi taleni, o loo faapea ona amata mai i tagata o le aai.
O se sao taua tele lea e le gata i le atunuu o Niu Sila, ae faapea foi so latou sao mo le asosi a le au faipisinisi a le lalolagi atoa.
