O le alii o Terence Jnr Tiumalu, poo Young Meko e pei ona lauiloa ai, o ona tuaa, o le tamā ia Panisa Pauli Tiumalu Leuelu mai Salelologa, Faala Palauli ma Fasitootai, ma lona tinā o Laina Tiumalu mai Saleilua Falealili. Ua faamanuiaina tele Terence i le lelei o lona siufofoga e ala i le musika ma le ta piano ma ua mautu foi lana DJ.
Ua mae‘a nei ona lauiloa i Brisbane ma Ausetalia le CD Vol 1 & Vol 2 a lenei alo talavou o le atunuu faato‘ā 19 ona tausaga, ae o lana CD lona tolu poo le Vol 3 la lea o le a agai mai i tua i le vaiaso fou ua faaigoaina o le SEKI A OE. O le tausaga e 2009 ma le 2010 o loo umia ai pea e Terence le talita na manumalo ai i lenei lava taleni o le musika i le faasinoti a le Ekalesia Metotisi a Kuiniselani.
O le alualu i luma o le taumafai ua mafai ai ona ia tāina pesepesega ma faaevagelia i mafutaga tuufaatasi a autalavou i Sinoti e pei o Sini ma Melepone.
Na pueina lana CD muamua (CD Vol 1 “Life thru my Eyes” e na o pese rap uma peitai sa fautuaina o ia e lona tamā ina ia taumafai e usuina pese, ia lē gata mo le autalavou ae mo nai tagata matutua.
Ma o le taimi nei ua mautinoa le tele o le atunuu ua fiafia e faatau CD a le alii o Terence.
Sa pueina lana CD numera 2 e ia lava ma o ‘i foi e iloa ai le sogasogā o tele o lenei alii e ala i le mautu uma o ana mea pu‘e pese ma vaega e faaaogā i le pueina o CD.
Sa talosagaina se avanoa e momoli ai le agaga faafetai tele o Terence i nai ona mātua e tusa ai ma le tutu faatasi ma ia e faataunuuu ana CDs ua tau ai lau o lona faamoemoe, aemaise i latou uma o fia faafofoga i ana fātuga.
Faafetai faapitoa ia Rev Faleitu & Enid Toelau mo talosaga, Rev Faleu & Talapauna Futi (NSW), uo ma aiga o nai ona mātua faapea lenei nusipepa o le Samoa Times ua faalauiloa atu ai lenei lava taleni. Faafetai tele lava.
