O le Aso Lua na tuanai atu na toai taunuu ai i laufanua o le aai o Melepone poo le setete o le tamaitai o Vitoria, le faigamalaga mamalu a sui o le Palemene o le malo o Samoa.
Na taitai malaga le afioga i le fofoga o le maota fono, le afioga ia Laauli Schmidth, faatasi ma sui a faipule e toasefulu ma le lua, atoa ma sui o le ofisa o le fono e toafā.
O le malaga mamalu na fili mai i le fuifui e fai ma sui o lo tatou malo i nisi o fonotaga ma sui o le Palemene o le faigamalo a le malo tele o Ausetalia, faapea foi ma faigamalo faasetete, e lei faapito augafa i se vaega faaupufai se tasi, ae na faimalaga faatasi mai sui a faipule o le HRPP ma le Tautua Samoa.
O le mae‘a ai o la latou fonotaga ma le Palemene o le Setete o Vitoria, na maua ai se feiloaiga ma le mamalu o le tapuaiga a Samoa i le aai o Melepone, o le malu o le Ekalesia Katoliko i Fawkner na fai ai le feiloaiga.
O le ekalesia malosi a le AOG Church of Samoa ma le latou faleono na taunuu i ai le malaga, faatasi ai ma le lagolagosua a nisi o ekalesia e pei o le LMS Toefuataina faapea le Fono Faufautua mo tagata Samoa i Vitoria, a o le tapuaiga malu a tupu ma tamalii ma Samoa atoa.
Na sii taulaga faatasi i le sauniga puupuu na taitaia e le susuga i le taitai o le faleono le susuga ia Apouani Tapuala Unasa, ona alo lea i le alii taeao pei ona masani ai i feiloaiga mamalu faapenei.
Na mae‘a le ‘ava o le feiloaiga ona saili lea o se gafa o le fale, tasi le faafitiga o le fetalaiga ia Namulauulu Unasa na fetalai faafeiloai, tali fuaitau lea o le afioga i le minisita lagolago o le matagaluega o le ofisa o le Palemia le afioga ia Lafaitele, ona pati ‘ava lea ma alo loa i le taumafataga matagofie na maau i ai le paia o le faleono.
O valevale alofa o afioaga ma itumalo ia latou lupe faalele i upufai o Samoa na sasaa uma i lea po e ala i faaaloaloga, ae na uigaese le maualuga o faaaloaloga a le faleono i le ta‘iina o sua mo le aumalaga atoa i le seleni paia, aemaise o faaaloaloga mo faafeagaiga uma na iai ma le tele lava o tamalii.
Na faaali le agaga faagaeetia o le malaga mamalu i la latou meaalofa mo le faleono, o le tanoa faapea le tele o fue ma tootoo aemaise o auupega Samoa pei o nifo‘oti ma talavalu. O le saunoaga faaiu o le mafutaga ma luluaao ai ma faatofa ma le mama ua lomi ma le vaa ua goto i faaaloaloga ua maualuga.
Momoli ai le faafetai tele i le susuga i le taitai o le faleono le susuga ia Apouani ma le faletua, aemaise o le vasega i faafeagaiga uma ma faletua ma le mamalu eseese o ekalesia e ono ona o la tou taulaga siitia, talitonu ua faafofoga Ieova ma talia. Viia ai lona suafa paia.
