O se po matagofie ma lagilelei le afiafi o le Aso Tofi 25 o Setema, a o gasolo atu uso, tuagane ma aiga o le tina ia Ruta Papalii i le Dream Centre i Manukau e fiafia faatasi ma faamanatu le atoaga o le 70 tausaga o lona soifua.
Sa faatasi atu foi ana paaga masani o nai tina o loo latou nutimea faatasi i totonu o lona aiga faapea lana aulotu i lona faamoemoe. Sa malaga mai foi nisi o ona aiga mai i Ausetalia ma Ueligitone.
O le susuga ia Faleu Futi sa amataina le polokalame i le tatalo, ma o ia foi sa fai ma fofoga o le po ma faafeiloai le mamalu o le auvalaaulia. Na molimau foi le tina i le alofa o le Atua i lona soifua faapea lana faafetai i le tamā o le aiga ma lona aiga atoa ona o meaalofa ua saunia mo ia ma lona aso fanau.
Sa sosoo ma le taumafataga na tapenaina lava e le aufaigaluega a le Dream Centre a o pesepese le fa‘ili a le susuga ia Lapi Marrner. Na taualuga polokalame o le afiafi i meaalofa a le tina mo nai ana uo matutua na auai atu ma momoli ai foi ma le faafetai a le fofoga o le po le susuga ia Faleu Futi i le auvalaaulia, e tusa ma le faatasi atu i le faamanatuina o le aso soifua o le tina ia Ruta.
