E lua aso na faasolo ai polokalame faaleaganuu, a le tofa ia Maulolo Leaula Tavita Amosa, o le po o le Aso Tofi ma le Aso Toonai, ona o le lolofi atu o le mamalu lasilasi o le atunuu, i le fia malamalama atili, poo le ā sina faasoa e maua mai i lenei alo iloga, ua mauoloa le soifua a‘oa‘oina, ma le tomai e lē na o le faasamoa, ae faapea foi mataupu faasaienisi, lea na tautua ai i le malo i le tele o tausaga.
O Maulolo sa ia tusiaina le tusi, “Fausaga o lauga”, atonu ua toatele ni faleupolu, ua latou taulimaina lenei foi taiala aogā auā lava le faiva o lafolafoga. “Toe silasila i lau aganuu Samoa, poo fea o i ai”.
Aisea ua fesili ai faapea le tofa a Maulolo? Samoa e, ona ua manumanu o ia i la ta aganuu, ia ta tu ma agaifanua, ia ta measina ua tauau ina maumau, ma faatafea i vasa o le aufaomea, ma vanu o le auatigu ma le aulilivau.
“Pe moni ua taugata tele le faa-Samoa?” Na faatusa le tali o lenei fesili i taimi o maliu.
Manaia tele le faamatalaina o le aganuu e faatatau i lenei mataupu tāua.
O lea ua manino le mata o le vai, i le tele naua o le faa-Samoa, ua tatou faaopoopoina ona o viiga faaletagata.
Ua ala ona taugata le faa-Samoa ma tatou matitiva ai, ona o o tatou lava finagalo fuatiaifo.
E tele isi mataupu na faasoa i ai le tofa ia Maulolo, ma e mautinoa, na faamalieina le mamalu o Samoa na opogiina lenei faamoemoe, ona o le loloto o le silafia ma le a‘oa‘oina o lenei faiaoga o le aganuu.
Na mafai ona faataunuuina nei polokalame a‘oa‘oina, ona o le lagolagosua a le Fono Aoao a Samoa i Niu Sa Uelese, aemaise le galue punouai a le aao tusitusi o Peti Siitia Moaga.
O le a faaauau ai foi le tautua matavela a le Fono e pei o le latou lagolago atu i le Festival ua faaigoaina, o le “New Warrior” i le Aso Toonai, 24 Setema i le Casula Power House.
O le a faia ai foi se aso faapitoa mo Samoa i Sydney i le Aso Gafua, 3 Oketopa i le Granville Oval.
E lua tauvaga ua faataatia mo lea aso, tauvaga lauga mo le tupulaga 13-19 tausaga, tauvaga siva Samoa/mauluulu.
E tele polokalame mananaia mo lea aso, ae sili lava le faafesootai o Peti i le telefoni 0402 177 657.
E pei o le upu ua masani ai, e lele le toloa ae maau i le vai.
Tusa pe malosi mai suiga faaonapo nei, ia tatou naunau ma teufatu ia tatou measina, auā Samoa mo a taeao.
