Ua mae‘a nei se faatalatalanoaga i le va o le Fono a Ekalesia Soofaatasi o Samoa le National Council of Churches ma le tamaitai Ofisa Sili o le TV1, Galumalemana Faiesea Matafeo i le toe foi lea o le faasalalauga o faiga lotu i afiafi o Aso Sa i luga o le televise.
O se feeseeseaiga na tulai mai i le lua tausaga talu ai, na faapea ona lē toe agai ane ai faiga lotu nei i luga o le televise ae o se auaunaga na faia lava talu ona faavae mai lenei televise i lalo o le pulega a le malo ma faasolo mai ai ina ua umia o se kamupani tumaoti le televise lea e i lalo o le pulega a le Samoa Quality Broadcasting Ltd (SQBL).
Faaalia e le afioga Galumalemana Matafeo, o le talosaga na ave i le amataga o le lua tausaga talu ai i le NCC ina ia alolofa e fia maua se avanoa e faasalalau ai faiga lotu a lotu e lē o i totonu o le Fono lenei, e pei o lotu a le Faalapotopotoga a le Atua (Assembly of God), lotu a le Worship Center poo le nofoaga Tutotonu o Tapuaiga, lotu a le Peace Chapel ma isi ekalesia e lē o i totonu o le NCC, ae o se faaiuga na faaali ai le faagaulemalie o le Fono a Ekalesia Soofaatasi ma faapea mai ua mae‘a ona faataatitia polokalame o faiga lotu o le tausaga ma e lē malilie i le faaiuga a le Televise.
O lea na agai ai lava le TV1 ma faasalalau faiga lotu a “lotu laiti” nei e pei ona ta‘ua ai ma ua tulai ma iu ai ina agai ese le NCC ma le faamatalaga ua manatu muamua le TV1 i le tupe ae ua lē faamuamua le auaunaga sa faia i tausaga e tele. O le manatu o le TV1 e lē o iai ni mau tupe o maua i nei auaunaga ae e lei taofia foi le NCC e agai atu ma a latou faiga lotu ma e lei iai foi se polokalame poo se faagasologa o faiga lotu na oo atu i le taimi na talosagaina ai le suiga e pei ona iai nei.
O le taimi lenei o a lava aulotu e iai le manaoga e fia faasalalau a latou faiga lotu, o loo tatala lava i ai le avanoa ma e aofia ai ma aulotu o loo i lalo o le NCC ae ua mananao lava e faasalalau a latou faiga lotu.
E lē o toe iai la ni faiga lotu a le NCC ua toe faia auā o lotu lava a le Ekalesia Faapotopotoga Kerisiano Samoa ua faasalalau i luga o lana televise le EFKS TV, e faapena foi le Ekalesia Katoliko, ae o le TV3 o loo agai lava foi i sauniga a le Ekalesia a Iesu Keriso o le Au Paia o Aso e Gata Ai ma isi faiga lotu a isi sui o le NCC e moomia le faasalalau.
O lea la ua mae‘a feutagaiga muamua talu mai lea feeseeseaiga ma e foliga mai ua iai se manaoga o le NCC e toe agai i luga o le TV1 mo ia faiga lotu, ma o loo tālia nei foi se faaiuga e sau mai i le Komiti o Faatonu a le TV pe talia lea tulaga pe leai foi.
Faaalia e le EFKS TV o faiga lotu a aulotu lava ia a le Ekalesia ua faamatuu ese lava e le ekalesia se tinoitupe e faatautaia ai, ona o le tulaga e tatau ona iai o le totogi o le auaunaga auā o le tele o taimi e galulue tagata faigaluega i le Aso Sa e faatino ia sauniga ma o se tulaga lea e tatau lava i le Fono a le Ekalesia Soofaatasi ona silasila i ai.
E iai le tupe sa totogi mo ia faasalalauga ae o le faamuamua lava sa ave i le auaunaga, ma na ta‘ua e le TV1 e lē o le tupe na ala ai ona agai i lotu nei e lē o i totonu o le NCC, ae o le lagona e faasafua le auaunaga i soo se tapuaiga Kerisiano i le atunuu.
