Sa saunoa le Alii Palemia i le taimi na tuuina atu ai le siaki e faapea: “o lo‘u fiafiaga, o le isi lea faalapotopotoga pito i fou a le Malo a o lea ua muai faataitai le aumai o tufatufaga o tupe faasili (dividend); ou te manao ina ia fai ma faataitaiga mo isi Faalapotopotoga a le Malo le ata lea (o loo tuu atu i luga), ma amata ona gasolosolo ma i lo‘u ofisa e aumai a latou dividend.”
E fiafia le Kamupani o Puleaga a le Faaputugatupe Teufaafaigaluega o Mavaega tausi a Samoa (o le “Kamupani o Pulega), o le Faalapotopotoga Tumaoti a le Malo o loo nafa ma le puleaina o le Faaputugatupe Teufaafaigaluega a Samoa (UTOS), e faalauiloa le lē faia o se tufatufaga o ana tupe faasili e $468,650.50. O lenei tufatufaga o tupe faasili na faamaonia e le Komiti o Faatonu i lana fonotaga faalemasina i le aso 22 Tesema 2014. O le Malo o Samoa ua faamanuiaina i lenei tufatufaga ona ua na o ia o loo umia uma sea i totonu o le Kamupani o Pulega.
O le faalauiloaina o lenei tufatufaga o tupe faasili o loo atagia ai le tulaga lelei o le tala o tupe a le Kamupani mo le tausaga faaletupe ua faaiuina i le aso 30 Iuni 2014 e pei ona iai se tupe faasili e $937,301.
O lea tufatufaga o tupe faasili o loo ogatusa ma faiga faavae a le Malo mo le totogiina atu o le 50% o tupe faasili e pei ona aiaia i lalo o le vaega 28(3)(a) o Tulafono mo Faalapotopotoga a le Malo (Faatinoga o Galuega ma le mafai ona Tali Atu ) Tulafono 2001.
Ua fiafia le Komiti o Faatonu ma Pulega ona ua oo atu le Kamupani i le tulaga e mafai ona fesoasoani ai i le tala faatatau o tupe a le Malo, aemaise ai o le tausaga lona 4 lenei talu ona faatūina le Kamupani.
E faapena foi ona fiafia le aufaigaluega ona o lea ua tulaga lelei vaega tau tupe a le Kamupani ma ua mafai ai ona totogi atu le agalelei ma le lagolagosua a le Malo i le faatuina o le UTOS mo le manuia o tagatanuu o Samoa, ina ia mafai ona iai lenei avanoa fou i totonu o Samoa nei, e teu ma faafaigaluega ai a latou tupe.
Ua lē o toe maua mai nei se fesoasoani tau tupe a le Kamupani mai le Malo talu mai le $1.8m tala na faamatuu mai le 2013. O lea ua mafai lava e le Kamupani ona faatupeina ana lava galuega fai ma galuega faatino, ma ua toe faaopoopo i ai ma le alualu pea i luga o ana tupe faasili e pei ona faailoa mai i le faia o le tufatufaga e pei ona faalauiloaina.
