Radio Samoa: Malo faafetai. O le upu o le tusi, ‘Tatou te lē filifilia o ia, o ia na te filifilia i tatou.’ Faafetai foi i le pale ma le onosai o lau afioga i le Palemia, o lea lava ua tali faaaliali le Alii, ia ma ua toe pale mai le Tamaaiga Afioga Tui Atua Tupua Tamasese, o lea ua toe avea ma Ao o le Malo.
Lima tausaga talu ai, i le paeaiga foi e pei ona faagasolo mai ai ma suia ai foi le faavae e pei ona filifilia le tai lima tausaga, aemaise foi le taimi na filifilia ai le vaiaso na tea nei.
O le a foi se tali mai a le Itu agai, aemaise foi le lua mafutaga mai lenei lima tausaga seia oo mai lenei foi aso, ma le faatautoina o le Aso o le Malo? Sei saunoa i lea tulaga faamolemole Tuilaepa?
Palemia: O le lima tausaga lea sa faataoto mai e le tatou faavae, e fai ma filifili ai se isi e umia le tofi. O le uiga la o le filifiliga, talu ai ona o le matou vaega foi lea e pito toatele, i le faapuupuuga o le tagata e tusi aao i ai le matou vaega, o le tagata lena.
O le tatou faavae foi ma aiaiga o iai, sa tusia i le taimi e leai ni vaega, ma e iai foi le talitonuga e lei iai ma se mafaufau na iai i o tatou tuaa na latou aiaia le faavae, e iai le taimi e alu alu ona iai lea o vaega faaupufai e lē toe moomia ai le tulaga o tagata taitoatasi e faatuina se suafa o se isi, o lea ua filifili faavaega.
O lona uiga o le vaega a e toatele, o le vaega lea e tu malo, o i latou na e faia le faaiuga. O le ala foi lena e tāua ai ona ta‘ua ai ma le Itu agai, ona e le o faavaea i le tulaga o le tulafono faavae se fuafuaga o le a iai ni pati.
I le faapuupuuga la, o lē a e tusilima i ai le malo, o le tagata lena. Matou foi filifiliga sa fai, sa faa-Taiti na fai. Manatua foi o le faa-EFKS, e palota a oe i le tagata e musumusu ia te oe le agaga paia, ona tusi a lea o le igoa ae leai ni sui faatutū.
O le tulaga lena na faatino ai le matou faiga palota faalilolilo, ma i totonu a o le matou foi faafaletui, o faipule o le HRPP ma maua ai loa le tasi.
E tulua Fiame i le faiga palota, ae tutolu Tuimalealiifano. Faapuupuuga la lena o le matou faiga palota, sa faalilolilo, ia ma ave ai loa i luma o le Palemene.
E ui a la na ou valaau ai foi i le Itu agai, e lelei ona tuu ifo lona igoa e faapipii i le matou pepa lena ona tasi ai lea, e faafaigofie ai auā e maimau ai fua le taimi e faatoatele vale ai fua sui ma igoa, ae o le mea a e fai atu le Malo e fai, o le mea a lena e fai.
Ua leva foi ona nofo tatalo le atunuu ma matou foi, tuu atu i luma o le Atua. Lona uiga e leai a ni talanoaga na fai poo ai e pito agavaa, leai a ma se leo na oo i ai, o a aiaiga ua manatu o le tagata lea ua talafeagai, pau a le mea o le musumusuga lilo a le agaga paia. O lea la ua uma ona fai le faatautoga o le Ao o le Malo.
Radio Samoa: Pe ua toe maua se tou faafaletui e toe lauliliuina ai tulafono tau faaofi foi nei e lua, o le tulafono o taaloga eseese ua ta‘ua o le casino, aemaise o lona teuteuina.
Palemia: Se‘i ou tali puupuu atu i le mea lena, ua uma ona pasi e le Palemene i le fonotaga lea na uma atu nei. Ae pei a le tulaga la e iai, o le tuufaatasiga o tulafono, auā na pasi i le 1991 le tulafono o isi gambling e tai pei o bingo.
A o lea la ua faatu atu le casino. Na pau a le mea na tuufaatasi ai, o le tulaga foi lele i le pulega, faaaogā pea le pulega lea e iai nei, e faaauau e na te pulea foi le casino. Tasi a le komiti e vaaia a ituaiga o taaloga nai lo le lua i le mea lea na iai. Ua uma foi la ona pasi e le Palemene lena mataupu.
Radio Samoa: E tusa ma le mataupu e pei ona feteenai ai le malo ma le afioaga o Magiagi, e pei ona faatonuina ai e le Malo poo lau afioga i le Palemia, ia oo atu i le faaiuga o Aukuso ua soo aiga uma i le mita foi lea e mafai ona totogi o le cash power poo le mita.
Palemia: O lea ua aumai le latou talosaga ia te au. La foi la ua uma ona ou toe tali i ai. Na ou faalogo na fono Magiagi ma teena le fuafuaga a le malo.
Aumai la le latou tali, o loo iai a latou talosaga mo taui o mea na faaleaogaina i paipa na faataoto mai i aso o Tupuola Efi.
O lea na ave i ai lau tusi, e sili ona fili mai ni sui se toatolu o outou e feiloai ma le Malo, e faamaape a tou mataupu i taui. O le mea lena, e ese a mataupu i taui, ese mataupu tau eletise.
E le aumaia fua le taui e taofi ai tama o le eletise e o atu e fua a latou mita ma sui foi a latou moli ia faa-cash power. Lona uiga a le totogi mai lau cash power lona uiga ua pe.
La la ua ou toe tali foi i ai, e lelei ona amata faatalanoa ma le malo a latou taui pe talafeagai. Ae o Aukuso e faataunuu ai le tulaga o le faa-cash power uma a. E lē moomia ai se latou ioega.
O le faiga faavae a ia, a lē totogia loa lau aitalafu ua tipi lou moli. O le faigofie ia o lenei mataupu. O la ua uma ona toe ave i ai lau tali e filifili mai ni nai a latou sui e faatalanoa ma le Malo a latou taui.
O le taui a e talafeagai e totogi, a o le taui e faaletonu, e lē totogia foi. E manino a faavae o le tatou malo e lē o ni faavae faatoa fai ananei, o faavae ua malamalama uma a i ai tagata.
Radio Samoa: Ua fesiligia e le atunuu, pe faatuina se komisi mo faasinomaga faaleaganuu. E talitonu foi, e lē tau faailoaina le tāua o measina a Samoa. E oo lava i ana faasinomaga faaleaganuu, ua tatau ona malupuipuia lelei mo le agai atu i le lumanai.
Palemia: O loo iai le faamoemoe faapea o lea e tapena, ina ia iai se komiti faapitoa latou te tilotilo i le mataupu lena.
Radio Samoa: Ou te talitonu na e māua foi se tasi foi o tamalii o le atunuu, le afioga ia Nanai Su‘a Tanielu, lea sa avea ma tofi foi sa tautua ai i le 9 tausaga o le faatonu aoao o le Ofisa Tutotonu o Faigafaiva a le Pasefika.
O lea ua māua ua lē toe filifilia e pei ona galue ai i le ofisa autu i Honiara, o le laumua lena o le Atu Solomona. Ae o loo sau le tala atua, e lē o sa‘o le filifiliga, sa tatau lava ona toe tulai mai le afioga ia Nanai Su‘a Tanielu. Pe na oo i ai sou finagalo?
Palemia: O le tulaga o Su‘a, o le aiaiga o le faavae, e tailua a nofoaiga ma uma. E lē o se tulaga foi lea o le sa‘o pe sese, ae uma loa lau second term, ona uma loa lea i lalo o aiaiga o le tulafono faavae o loo iai nei. E leai a la se isi i aso ua tuanai ua tolu ni ana nofoaiga, e uma loa le lua, sui.
Radio Samoa: Talitonu o le mataupu lenei, ua oo foi i ai le saunoaga ua faapena foi ona saili malo ai, o loo faapena foi ona tagisa atu ai le atunuu. O iai le faamoemoe o lea ua silafia e le mamalu o le atunuu aemaise foi lau afioga i le Palemia le Malaga a John Key ma le vaega, o le a faapena foi ona faataunuuina atu i Samoa i le vaiaso fou, mo le faamanatuina o le 50 tausaga o le la feagaiga foi lea o le Treaty of Friendship.
O lona uiga, atonu o le avanoa lea, e talitonu e lē faatonuina lau afioga i le Palemia. O le mataupu lava lea o le Quota a Samoa, e lē o mafai lava ona oo atu i le afe selau i tausaga uma.
Talu ai o le faamoemoe ona o pepa faigaluega, ou te talitonu, o le a avatu le faamoemoega foi mo lea avanoa, atonu o le a mafai ona toe fesootai i ai lau afioga i le Palemia, aemaise o le isi mau lea na tapu mai poo le 2006, a faapea e omai iinei nisi ulugalii ae fananau ai ni a la tamaiti, sa otomeki lava e maua le sitiseni ma le nofomau, peitai ua tapu le tulaga lena i le mau a Niu Sila, ia ma nisi mataupu o loo finagalo i ai lau afioga.
Ae pei o le Quota lava lena, pe mafai ona faagalo ia pepa faigaluega, a manuia i le se‘i, ia omai loa Samoa. Pe mafai ona e saunoa i ai a o faafofoga le mamalu o le atunuu auā o lena o le a maua le tou mafutaga.
Palemia: O lea o le a talanoa i mea uma a na, ae iai le mea e sili ona malamalama i ai tatou, o le isi lea faafitauli o feagai ma tatou, i le taimi lea e o atu ai le toatele ae lē maua ni galuega, auā e iai mea ua tutupu faapena, ona tausi lea e o tatou aiga iinā.
Ona tausi tausi lea ua fiu e tausi ua lē maua ni galuega, o tatou aiga lava e toe o ane logo faalilolilo le immigration e toe faafoi mai ua lē mafai ona tausi, ua tele tupe e alu ai.
O le tele ia o mataupu ia e lipoti mai, e tuuaia lava tatou. E iai isi e o atu iinā, e lē gata ina faaosooso e o tatou aiga iinā ia overstayer tagata, ae tigaina ai a e tausi isi ua o atu iinā, ona toe o a lea o tatou aiga na ua lipoti faalilolilo i le immigration.
O le tele ia o mea piopio e faamatala mai, se ta te ma, aemaise foi o isi tagata ua matutua, ua tele ina ou fesoasoani i ai e o atu iinā, ae o atu overtayer. Foi mai la iinei, ae lē umi ae tau mai ua oti le atalii lea sa overstayer ai. Ae toe tagi mai e fia o atu e fai le oti ae o lea na overstayer.
O tatou le isi atunuu e ese le piopio o tagata. Ou te manatua a le saunoaga a Tofilau, ua lē toe talitonuina o ia e Niu Sila talu ai, na tele ona ia faamaonia isi malaga e aofia ai faifeau.
Na ala foi ona ia faamaonia, ona o malaga e o atu o faifeau e o atu iina ma latou aumalaga ona usitaia lea. Ae o atu foi faifeau, e piopio foi faifeau latou.
Afai la o nisi tagata pito piopio o faifeau, piopio atu ma nisi o tatou ae lē o ni faifeau, o le matuā telē a o le faafitauli ia e faafeagai ma a‘u, i mea nei o feagaiga ma Niu Sila, e talanoa talanoa ae toe logo mai e Niu Sila, o tatou tagata a ia e mafua ai ona latou iloa mea leaga e fai e isi foi Samoa ma toe faafoi mai.
Radio Samoa: Ia faafetai tele lava mo mataupu i lenei po. Ae avatu ia sau saunoaga mulimuli aemaise foi o le o atu o le tatou atunuu mo taaloga a le Olimipeka lea o le a sauni. Poo le ā le mea ua lē oo atu ai i se sefulu ma ona tupu le autaaalo. Pe na o le valu ea lena e sauni mai?
Palemia: O le mea sili o lena ua valu. A o aso ua tuanai, e na o le tasi, lua, tolu. O le tulaga lena e masani ona iai i aso ua tuanai, o le mea sili o lea ua oo i le valu. Ia ona faaiu atu ai lea i lau faatofa atu ia outou i lenei po. Soifua ia.
