O le Aso Lulu o le vaiaso nei, le aso 1 o Aukuso 2012 e faamanatu ai le atoaga o le 50 tausaga o le Feagaiga Faauo (Treaty of Friendship) i le va o Niu Sila ma Samoa talu mai le tausaga 1962. Na o Samoa lava le atunuu o loo iai lea feagaiga ma Niu Sila.
I faamaumauga o talafaasolopito, o loo faapea o lenei Feagaiga Faauo e mafua ona o le tele o tausaga na mafuta ai Niu Sila ma Samoa e amata mai lava i le vaitaimi a o pulea faakolone Samoa e Niu Sila mai le tausaga 1914.
O le aso 29 o Aukuso 1914 na taunuu saogalemu i uta ma tulaueleele i Apia le Vaegaau faapitoa a Niu Sila ma ua latou nofoia loa le motu ma ua sisi ai foi ma le fu‘a a Peretania.
O le aso lava lea na amata ai loa le pulea o Samoa e le Malo Niu Sila, ae faatea loa le pulega a Siamani sa pulea Samoa mai le tausaga 1900. E 48 tausaga o pulea faakolone e Niu Sila Samoa ma faato‘ā maua le tutoatasi o Samoa i le aso 1 o Ianuari 1962.
O maliliega lava o le faigamalo a Samoa ma Niu Sila na mafua ai ona faavae le Feagaiga Faaleuo (Treaty of Friendship) lea na sainia e le afioga Fiame Mataafa Faumuina, le Palemia o Samoa, ma le alii o J. B. Wright, le Hai Komesina o Niu Sila.
Ua faamautu i lea feagaiga le manatu e lelei le faigauo a Niu Sila ma le faigamalo a Samoa.
O lea feagaiga ua malilie ai o le a fesoasoani Niu Sila i mea e talosagaina ai le faigamalo a Samoa, ma o le a tumau pea lea feagaiga seia vaganā ua tusi mai le isi faigamalo i le isi faigamalo e faaleaogāina loa lea feagaiga.
Na saunoa le Palemia o Niu Sila o Keith Holyoake i lena vaitaimi faapea o lea feagaiga faaleuo ua pine ai le umi o iai fesootaiga a le malo Niu Sila ma tagata Samoa.
Peitai ane, o le tausaga 1982 na toe teuteuina ai le Feagaiga Faauo ina ua sainia e Jim McClay, le Minisita o Tulafono a le Malo a le National i Niu Sila ma le afioga ia Tofilau Eti Alesana, le Sui-Palemia o Samoa se maliliega fou e toe faaofi ai se tulafono i Niu Sila “The Citizenship (Western Samoa) Act 1982”, ina ia taofi ai le sitiseni o tagata Samoa na soifua i Samoa i le vaitaimi a o pulea faakolone Samoa e Niu Sila.
O lea toe teuteuga o le Feagaiga Faauo ona ua manumalo le faamasinoga a le tina ia Falema‘i Lesa mai le faamasinoga maualuga o Peretania (Privy Council) ma maua ai lona sitiseni Niu Sila.
Sa ia finau o ia na fanau i le tausaga 1946 a o pulea faakolone Samoa e Niu Sila, ma e tatau ona avea ai o ia ma tagata sitiseni a Niu Sila.
Na talia atoatoa le talosaga a Falema‘i Lesa e le faamasinoga ma faamanuia uma ai i latou na soifua mai lea tausaga i Samoa i sitiseni Niu Sila.
Peitai ane na toe soloia lea faaiuga, ma teuteu ai le Feagaiga Faauo i le sainigalima a le Malo Niu Sila ma Samoa i le aso 21 o Aukuso 1982 e taofi ma faasā le tatala o le sitiseni Niu Sila i tagata Samoa uma, ma faamamaluina loa lea teuteuga i le aso 13 o Setema 1982.
O lea teuteuga na o latou lava o loo iai i Niu Sila i lea taimi ae e lei oo i le aso 14 o Setema 1982 e mafai ona nofomau ma maua latou sitiseni Niu Sila pe a talosagaina.
A o tagata o loo i Samoa e tumau pea latou sitiseni Samoa, e leai so latou nofomau e maua i Niu Sila, e ui e toatele na soifua mai i le vaitaimi o pulega faakolone Samoa e Niu Sila.
E tele foi nisi faaletonu na tulai mai i le pulega o Samoa e Niu Sila. O le tausaga 1918 na taunuu ai le vaa o le Talune i Apia ua pesia i se faama‘i mai Niu Sila.
Na pesi pei se mala lea faama‘i ma e lē gata i le toatele o tagata Samoa na mama‘i ai, ae e faitau selau afe tagata na maliliu ai foi. Ua manino nei i faamaumauga, sa mafai lava ona puipuia Samoa, ae o le faatamala o le pulega a Niu Sila na mafua ai le pesi o lea faama‘i.
O le aso 28 o Tesema 1929 na tupu ai se faalavelave matuia i le Mau. A o gasolo mai le savali filemu a le Mau, ua taumafai Leoleo Niu Sila e pueina mai ma saisai faapagota se tasi o lea solo, ma tulai mai loa le misa i le va o Leoleo ma le solo a le Mau.
O le taimi lava lea na faia ai ma le faatonuga ina ia faapā le fana, ma e limasefulu i latou na manunu‘a, ae maliliu
ai le toaiva, e aofia ai ma se tasi o taitai iloga o le Mau, le afioga ia Tupua Tamasese Lealofi III.
E toatele foi nisi o tamalii o Samoa na faatea ma o nisi ua faatafea i isi atumotu o le Pasefika, ae o isi na faaaunuua ma falepuipui mo ni tausaga e tele i Mt Eden i Niu Sila.
Ona o le tele o sese ma faiga sauā a Niu Sila i vaitaimi o pulega faakolone o Samoa, o lea na faatoese ai le tamaitai Palemia a Niu Sila o Helen Clark i le Malo o Samoa i le tausaga e 2002.
O le fesili, afai ua fa’atoese Niu Sila mo sese sa latou faia, pe ua lē tatau ia Niu Sila ona fai se taui mo Samoa? Afai e tatau, o le ā se taui? Pe ua lē tatau ea ona toe teuteu le Feagaiga Faauo ma Niu Sila ina ia toe iloilo ai se taui mo tagata Samoa i le tele o sese na faia e Niu Sila a o pulea Samoa mai le tausaga 1914 seia paia le 1962?
O le a malaga le taitai o le Itu Agai ma sui o isi vaega faaupufai faatasi ma le Palemia i Samoa mo sauniga faamanatu o le Feagaiga Faauo.
Se‘i tatou talitali ia, poo fea o iai le finagalo a le Malo Niu Sila, poo le ā foi sa latou faaaliga i le Aso Lulu.
