Radio Samoa: Ae usi maia lau faafofoga Samoa, e pei ona silafia ai le faatalatalanoa i po o Aso Tofi, ae lelei lava le faafofoga ma le toto‘a i tulaga foi o le a saunoa i ai le afioga i le Palemia i mataupu i lenei po ma le agaga faaaloalo.
Faatalofa atu lau afioga i le Palemia, Tuilaepa. Malo le soifua manuia! O loo māua le tala o loo liki mai i tua foi le faiga malo a John Key ma lana vaega.
Talu ai o loo taumafai e suia tulafono aemaise lava o tulaga i femalagaiga. Ae talu ai le faamoemoe ua silafia e lau afioga i le Palemia ma le mamalu o le atunuu, o loo taumafai mai nai o tatou tagata mai Samoa i le Quota foi lea.
O loo iai le faamoemoe o John Key ma le vaega, o le a fai interview i le gagana Peretania. Afai lava o le a lē pasia o lona uiga, e oo lava i nai tagata matutua, o le a faapena ona laugatasia ai ma lē mafai ona oo mai. Afai foi o tupe faatulagaina, poo le 30 afe poo le 40 afe, a lē ausia, lona uiga ua leai lava tatou. Ae talu ai a faataotooto le tulafono i soo se atunuu o le lalolagi, e laugatasia a tagata uma …
Palemia: Se‘i ou talanoa atu i le vala lea, e lei mae‘a ona talanoa mataupu ia. Ae se‘i mae‘a ona lagā mai ai lea o ni manatu.
Radio Samoa: Talu ai e lē o auaoa foi le silafia o lau afioga i le Palemia, i le tulaga o loo iai le sua o le nonu aemaise o le taofia mai foi o tulaga i maketi i Saina talu ai ona ua molia mai foi Jack Chen e pei ona molia ai i le tulafono.
Talu ai o lea ua amata ona galulue si o tatou atunuu, ua lē iloa poo fea a agai i ai le sua o le nonu, aemaise ua saunoa foi le afioga a le pule o le Pure Pacifika, e umi se taimi o le a faatalitali ai, o le a toe logo atu le atunuu i le taimi o le a faataga mai ai ni maketi i fafo e alu i ai le nonu, ae o lena ua uma ona galulue i ai si o tatou atunuu.
Lau afioga i le Palemia e iai se fesoasoani i le tulaga o le malo i lea tulaga po ua maua foi se lua fesootaiga ma le susuga ia Tupailelei poo le susuga ia Jack Chen i le tulaga lea, ma le agaga faaaloalo?
Palemia: O lea sa fesootai mai ia Jack Chen ma logo mai ai a‘u o loo taumafai pea latou e fofo faafitauli o loo iai nei.
Ae o loo ua faalautele foi le latou talosaga ia i latou o le aufainonu, i le taimi nei a o faafeagai i latou ma faafitauli, ia lava pea le onosai e lē o mafai ona tuuitiitia le tulaga o le telē o le latou foi tupe na alu e faatau ai masini ma faatu ai fale tetele i Saina e gaosi ai le nonu, ae ona o nai to‘a ia o loo feagai ma i latou, ae ia lava a le onosai.
Ae ua uma foi ona faasalalau e le kamupani lea e avatua le nonu i Niu Sila, o loo iai Michael Jones, o loo taumafai foi latou e fai le latou galuega o le saili i isi maketi.
Ae lē o taofia ai lava le tatou aufainonu tuai, o lea lava e faatau pea le nonu ma gaosi ma ave ia latou maketi i Amerika ma Iapani.
O le tulaga la lena i le taimi nei, ia lava pea le onosai. E leai foi se tulaga sa faapea o le a tulai mai se tulaga faapenei i le susuga ia Jack Chen, ia ae lē uma le fai aso o le Atua.
Radio Samoa: O le tulaga manaia o lea ua māua pe afai, ae lē o mautinoa e matou o loo aitaumalele mai pe afai e sa‘o se matou mate, o le tulaga ua ola le araisa i totonu o si o tatou atunuu. Aemaise o tulaga faapena po ua agai i ai faifaatoaga mo lea tulaga pe faamaonia, se‘i faalautele mai lau afioga i le Palemia?
Palemia: O faasalalauga foi lena o lea e iai nei i polokalame foi lea a Saina, ua ola le araisa a o lea e faataitai.
E lē o le araisa foi lea e ola i le vai, a o lea e faataitai e nai alii Saina le araisa. Pau a si faafitauli lea e iai nei, o le Mina Bird foi lea e faafitauli lea e tau fai i ai se fofo. O lea lava o loo iai le tatou polokalame e tape ai le manu lena, ae o le tulaga lava foi leaga ua leva ona iai le manu lea iinei, ua tele foi manu o loo feoai solo, ae o loo taumafai foi i ai le tatou matagaluega o le siosiomaga.
Radio Samoa: Malo faafetai. Talosia ai ia taunuu lea faamoemoe, ia auā ua taugata tele le araisa ia tatou.
Ae a manuia, ia faafetai i le Atua ona o mea silisili o loo faapena ona faataunuu mo si o tatou atunuu.
Momoli le faafetai tele lava i la outou foi pitolaau mo le filimatai‘a foi e talitonu lava le faamoemoe, ia o le upu a le tusi, ‘tatou te lē filifilia o ia, ae o ia e filifilia tatou’.
O lea ua māua ua filifilia Fred Amoa mo le CEO fou a le Iuni lakapi a Samoa. Ae ou te talitonu e lē faigofie sa outou filifiliga ma taumafai, aemaise o loo faapena ona aitaumalele atu iinei le susuga i le loia ia Fred Amoa.
Ia ae o lea e lē o mautu mai le latou pitolaau, poo afea e mautu ai uma le pulega a le laulau, poo iai se taimi o i luma o le a faapitoa ona fofogaina ai atoa le laulauafono a le asosi lakapi a Samoa, faamolemole lau afioga i le Palemia? … Le vaega e atoa mai, auā o lea ua filifilia le CEO, lea ua manino mai Fred Amoa, ia ae o le tulaga la o le Coach ma tulaga faapena e pei ona masani ai le management o le Iuni lakapi a Samoa, po ua maua se taimi e atoa mai ai le filifiliga ona fofoga aloaia mai foi lea?
Palemia: Ia manatua foi e eseese mea. Ua uma ona fili le Coach ma le Management o le Taitoafitu.
Ua uma ona saili le Coach ma le Management o le tatou ‘au foi lea tulaga lua, le A, ae totoe la o le tatou Coach ma le Management o le tatou ‘au taitoa sefululima, ‘au tele a le Manu Samoa. Lea la e iai le faamoemoe pe toe lua i le tolu vaiaso ona agai foi lea iina. E faapena lava se mea, e faasolosolo le faatulagaga o le tatou galuega.
Lea la e iai le faamoemoe, e lua i le tolu vaiaso faato‘ā tagofia loa lea o le tulaga lena. O lea foi la e toe talosaga foi le afioga ia Fuimaono, ia ae fai a si feololo o i latou mai fafo.
O le tele ia o laui‘a ia e iai i i talosaga ia na aumai. Ia o le tali puupuu atu lena, ae onosai mai, a oo a foi i le taimi e faatino ai le faamoemoe ia ua logo atu outou.
Radio Samoa: Lau afioga i le Palemia, ou te talitonu o loo iai ni aitu i totonu o faamasino iina, ae o matou ou te talitonu e lē o iai ni aitu faitatala foi ia i nusipepa. Poo silafia e lau afioga i le Palemia lea tulaga?
Palemia: Ioe. E faapena a le tulaga. O le ala foi lena o lea e ala ai ona tele tusitusiga i mea faapena ia ma o loo lē moe foi i latou o aafia i ia mea, o loo fai ma lagalaga mai pea, ia ma fai foi i ai faaiuga.
Radio Samoa: O le ā se tala mai mo se taupati mai o le faamoemoe ia a o loma foi le faamoemoe o le 50 o le a faamanatuina o le Tutoatasi o si o tatou malo. O iai ni polokalame ua faapena ona silafia e lau afioga i le Palemia ua faatulaga i lenei taimi, lau afioga i le Palemia?
Palemia: E tele a mau polokalame o lea ua faataatia. O polokalame masani lava a foi o savali, o pese ma siva, tuugavaa, taaloga; o polokalame tuai ai a i lea aso ma lea aso.
Ae aua foi tou te popole, pau a le mea o le tapena mai o outou ia a oo mai a iinei ua silasila foi a i ai i le taimi e faasalalau ai. Ae ua uma a ona faataoto le polokalame mo le vaiaso atoa.
Radio Samoa: Malo faafetai. Ua toe māua o lea ua manaia foi le faafofoga ma le faalogologo atu a le atunuu foi e pei ona ta talanoa foi ma e saunoa i tulaga uma lava o le Maota fono lea ua tuu i lalo, ia malo faafetai, ou te talitonu o le toatele lava o tagata lea ua feedback mai, ua manaia foi le faaiuga mo le saogalemu foi o le soifua o alo ma fanau, aemaise foi o mea o loo faia ai.
Ae ou te talitonu e leai a se mea o le amataga lava e faapena lava le lūgā lālō, ia e pei lava o le upu masani a le atunuu, e tetele lava timuga ae tua lava i le oo.
Ae momoli le faafetai tele lava, o loo e taimatalii pea i polokalame uma, ia viia le Alii i mea uma lava.
Ia lau afioga i le Palemia, lafo atu ia poo iai sau saunoaga e fia saunoa ai i lenei po, a o ta te lei taumavae, o lena foi e tuatuagia le afiafi.
Palemia: O lea o loo faagasolo mālie lava galuega foi o le teuteuina o le tatou aai. Ua tele a ina uma ona teu lelei auala i totonu o le taulaga.
O le taimi nei foi o lea e faagasolo le auala lea e alu atu ii i le Tusitala agai atu i Mulinuu, toe faalautele ina ia tolu lanes, auā le faamoemoe i le tumutumu foi i le aso o le Fu‘a.
O lona uiga o le taeao ua lua lanes i le o atu i tai ae tasi le foi mai tai, ae a oo i le taimi ua tuua mai le aoauli ua tuua mai tai, ona lua lea o lanes i le sau mai tai ae tasi le alu atu i uta.
O lea foi, masalo pe oo atu a i ai i le taimi lena, ua mae‘a le auala ‘alo lea e alu atu a i Savalalo alu atu a faasasa‘o atu a agai mai i Mulivai, i le magafa foi lea e i tafatafa o le McDonald, faasasa‘o mai a lea i tua o Makesi ma tua ane o le Ekalesia Katoliko ma faasasa‘o atu a i le Malisi ma faasasa‘o atu a i Tauese, ua matuā sua ese uma a le mea lena ae faasau ai alāvai tetele sima, ina ia aua ne‘i toe to‘a ai le vai.
O ia sauniga o ni taumafaiga ina ia faaleleia uma alatetele mo femalagaiga i taimi o le Fu‘a mo le tumutumu mai foi o le tatou atunuu.
Ae o lea foi ua uma ona faamanatu pea lava pea i le aufai pisinisi, le Team of Commerce se‘i alolofa ia e feiloai i o latou sui, e tatau ona taumafai e vali fou uma fale. A leai ni vali, fufulu faamamā.
E matagā le tumutumu mai o tagata mai fafo ae silasila mai e faaletonu e palapalā fale e lē faafoua.
Ia ma tatou polokalame masani foi i nuu i tua, i teuteuga aai ina ia faamatagofie ma faaaulelei atili ai le tatou atunuu, o le taimi lea ua tumutumu mai tagata i fafo, ia ma fesoasoani foi o se tala ave e faasalalau atu i atunuu i fafo i le tumamā o o tatou tagata.
O nai faamatalaga faaopooopo na, ae iai le tala na maua nei faapea o loo iai nisi mai foi iinā sa omai iinei mo ni taga tatau, ae ai sa taeele i le aoauli le Loto o Samasoni, ia ae o lea e la Apia ae ai o timu utā, ia pa mai loa le vai ma tafefea ai, ma faapea o loo iai se isi ua maliu, ae faatoa iloa taeao le tulaga lena.
Ae ua te‘i ai la ua palā le sami, ae o lea e la le taulaga, ae o uiga na o le tau o loo tatou iai, lona uiga o loo matuā timu a uta i atumauga ua te‘i a ua pa mai ai le vaitafe ma faaletonu ai foi ma i latou sa ‘au‘au i le Loto o Samasoni.
O lea la e faatalitali le tulaga sa‘o o le faalavelave. Ia na o le pau na o nai faamatalaga i lenei po, ae faamalo Taito i lou valaau mai. Ia e maua pea le avanoa i le vaiaso fou, toe talatalanoa ai foi i nisi o mataupu o le a lagalagā foi i lena vaiaso, ia o loo manuteleina a le tatou atunuu nei.
E lē o tele ni mea o faaletonu, e pei ua aafia uma a tagata i le tulaga foi o le vaavaai mamao atu ua tuai ona oo mai le aso muamua o Iuni, auā tulaga foi o taga ma aga o tatou faafiafiaga o aso faamanatu o le tatou Tutoatasi.
Ia avea ia lenei avanoa ou te faamalo atu ai, ia faatalofa atu foi i le mamalu o le atunuu o faafogafoga mai e lē uma le faiaso a le Atua, maua se isi avanoa i le vaiaso fou, talo soifua le ola, ia ona tatou toe feiloai foi lea i le alofa o le Atua, Soifua ia.
