Manaia tele pe a e faitau atoa mataupu e fa o le tusi a Iona. E tele nisi aoaoga lelei e te maua mai ai e tusa ma le faauuga a le Agaga Paia, ae ou te momoli atu se isi feau e fai ma Luitau mo tatou.
O le finagalo o le Atua, ia salamō ma liliu ese tagata Nineva mai le agasala. Sa lē fiafia Iona i lea avea‘i, ona ua manatu i le matagā o amioga a Nineva, ma uiga faapaupau o loo ola ai tagata.
O le manatu o Iona, na o Isaraelu e tatau i ai le alofa tunoa o le Atua, a o nisi e pei o Nineva, e leai, e matuā leai lava.
Mafuaaga lea o le sola o Iona i Tasesa, e lei fia usitai i lana misiona. Ae lei mafai na sola ese ai mai le Atua. Sa tulituliloaina o ia, ma faaaogā e le Atua le malosi faanatura o le siosiomaga e taofi ai lana solaaga.
Ua sou le sami, a o moegase le perofeta i le ana o le vaa. Ua ou mafaufau, pei se Samoa Iona, auā e pisi uma tagata e fia feola, ae moe pei lava e leai se mea o tupu.
Atonu e iai ni tagata faapea o le tou aiga, e fai se taupulega o se faalavelave, ae momoe e lē kea, pei o nisi ekalesia, e galulue isi ae tafafao isi.
Sa tautino Iona o ia le pogai o le matagi, ia lafo ia i le sami, e malū ma saogalemu ai le faigamalaga. Sa musu le kapeteni, peitai ua fiu e taualo, seia oo lava ina lafo Iona i lalo, faatoa malū lea. Ae lei tuulafoaina lava e le Atua le tagata filifilia. Na faatonu e le Atua le i‘a, ia folo Iona ma toe momoli faalelei i le mea na sau ai.
Ina ua puapuagatia, na salamō ma tatalo faatoese i totonu o le manava o le ia. Pei o tatou, seiloga e maua e faafitauli ona tatalo lea. A afaina loa, faatoa toaga e lotu, a sologa lelei foi, ona toe foi lava lea i le mea tuai.
Ua toe valaau le Atua ia Iona e tala‘i le faamasinoga ina ia salamō Nineva. O le natura alofa o le Atua, e aumai pea avanoa. Avanoa mo Nineva, avanoa mo Iona, ma avanoa mo tatou ia salamō.
E faaalia foi natura faaletagata i le tala ia Iona. Le tagata loto mimilo ma le lē usiusitai, e salamō nei, toe fulitua taeao. E manatu faapito ma fia tauimasui.
O uiga ia o le tagata na te lē faatāua mea e tāua. E manatu lava ia mo ia, ae lē manatu poo fea o iai moni le finagalo o le Atua.
O le tusi a Iona, o le tusi o vavega. O vavega ma le pule tutoatasi a le Atua e galue ia faataunuu lona finagalo. Faataitaiga: O le matagi tele. Faasaga le vili ia Iona. Faatonu le i‘a e folo Iona ma toe luai i le eleele matutu. Faatupu le kikaiona. Poloai le anufe e ‘aina le laau. Saunia le matagi vevela mai Sasae. Faaolaina le nuu i si tamai lauga a Iona, na o le iva upu.
Ia manatua, e lē valea Iona. O Nineva, o le laumua o Asuria i ia ona po. Sa malosi Asuria faafitafita, ma faapologa Isaraelu i nisi taimi, sa vete lona tamaoaiga ma amioga faanuupo sa fai i le nuu o le Atua.
E valaau la le Atua ia Iona, o loo tiga Iona i amioga a Nineva. Sa faamoemoe i le Atua, na te taui a latou amioleaga, ae sau le avea‘i a le Atua i le perofeta; tala‘i i ai le faaolataga.
Oka, se mea ina a lē fetaui, e agaleaga mai, ae ia faamanuia atu i ai? E tatau le oti i le tagata agasala, o mafaufauga ia o Iona. O le manatu taatele foi lea faatagata e pei o tatou. O le mea lea na sa‘i ai Iona i le Atua ina ua faaolaina Nineva, sa ita, ma manatu e sili ai na oti.
Ona fesili lea o le Atua ia Iona, e lelei ea lou ita? Fai atu lea o le Atua ua e alofa i le kikaiona, a o a‘u ou te alofa i le silia ma le 120 afe, o ē leiloa o latou lima taumatau poo latou lima agavale.
E lē o faatāuaina e Iona mea e tāua. E tāua ia Iona le malaia o Nineva, e tāua ia Iona lona ita, ae faatuatunai le Atua ma lona alofa mutimutivale.
O le uiga o le finagalo o le Atua, Iona, e te ita ma e inainā i mea faatauvaa, ae o le a fano agaga e toatele ona o le agasala? E te manumanu i le kikaiona, ma ua e ita ina ua mate, o sau mea na fai? Ua e ita i le faaolaina o Nineva, se mea leaga ea lea mea? E te manao e faatāua lou ita, pe faatāua le ola o tagata? Ona toe fetalai lea o le Atua, ou te alofa i tagata o Nineva ma le faafanoga e iu i ai pe a lē tala‘i i ai le faaolataga, o le mea tāua lea.
Pei o faigalotu a tatou, e feita ma fefulituaa‘i i mea vaivai, e tauaimisa i mea lē aogā. E misa isi ekalesia i le faasoaina o se pusa pisupo, e misa i meaai.
E teva le isi toeaina ma lona aiga i tofiga a le ekalesia, e fia matamuamua. E faamasino tagata i laei ma pulou. Ua fefaasalaa‘i ma felu‘ia‘i i talitonuga, ae o loo malaia ma fano aiga ma fanau ona o le agasala.
O le finagalo o le Atua, ia fai le mea tāua ma mea tāua. O le mea tāua, ia faaolaina agaga ma laveai tagata mai le malosi o le tiapolo, ae lē o le faatāua o mea vaivai ma mea lē aoga e tupu ai le feitagai ma leiloa ai le finagalo alofa o le Atua i tagata. Soifua.
