Radio Samoa: Ia ua soona olioli auā o lea foi ua maua le avanoa ma le afioga i le Palemia o le tatou Malo, Tuilaepa Lupesoliai Sailele Malielegaoi i lenei afiafi, ina ua toe 20 minute ona ta lea o le 9. Ia e faatalofa atu i lau afioga i le Palemia i lenei afiafi. Ia ua matagofie foi lenei avanoa ua ta feiloai ai Tuilaepa.
O le afiafi nei pei e manaia pe a ta amata, auā o lea faatoa maua se ta avanoa i lenei tausaga. Ta see mai i le tulaga lea o tusitusiga, aemaise foi o tala e agiga i luga o le ea, aemaise foi o tusitusiga i le amataga o lenei tausaga, i lau afioga foi i le Palemia ma le tulaga foi o le faiga palota, lea ua faaleo ai se lagona o le vaega faaupufai o le Tautua, o le a matuai sauni e faavavai le vaega a le HRPP i le faiga palota o le tausaga nei, ina ia suia le malo i le tausaga e 2011?
Palemia: Ou te fiafia ona o loo iai se fuafuaga faapena. E manatua foi ua leva ona iai le faanaunautaiga ina ia tulai mai se vaega faaupufai e agaiga le tatou Malo ina ia malosi.
O le vaivaiga tele a i le Itu Agai i le taimi lenei, ona e taufai mananao uma a e taitai. Pau a la le itu tāua, ua tafa se finagalo i vaega eseese e 6, e faataitai le afioga ia Vaai, o le itu tāua lena.
Atonu i le faanaunautaiga o a‘u nei ma le matou vaega, a uma le palota, e tumau ai pea le taitaiga ia Vaai, auā e uma foi ona toe feiloai lea o latou, ma toe fai le palota pe tumau ai pea le lagolago.
Ae a mafai ona onosai le fia taitai, ou te manatu o se itu tāua lena o se laasaga muamua e mafai ai ona tulai mai se Itu Agai e malosi, ia matou iloa ai foi le tulaga o latou i le itu lea o le aloaia lelei, o se vaega e agaiga i matou.
O le tulaga i le matou vaai taulai i le malolosi o sui o loo faatulai e le HRPP i le taimi lenei, o lea ua iai le matou lava matematega e tatau ona matou maua nofoa e lē i lalo ifo o le 40 i le Palemene. Lona uiga la ona totoe ai lea o le 9, ae o le 40 a nofoa ia matou te taumafai i ai.
Sa fesiligia foi a‘u i le tulaga o le matou foi fuaitau o nofoa matou te ono maua, ia na o le pau a le mea sa ou faamanatu foi i le atunuu, a o alofaiva le atunuu foi i le faiga palota o le 2006, ia sa fesiligia foi a‘u i se matou foi mātau pe fia ni sui matou te ono maua.
Ia lea foi sa ou faasalalauina i le taimi lena e 35, ia lea lava na maua le matou 35.
O le tulaga la iai i faiga faavae a le matou vaega ma fesootaiga foi maumaututu ma afioaga i tua, o lena ua iai le matou faamoemoe e tatau ona matou maua le aofaiga lena o nofoa e 40. E lelei tele a matou contacts, o lona uiga o fesootaiga ma itumalo ona o se pati ua leva, ia ma o i latou lava nei o loo avea ma taitai o Itumalo ma Nuu.
O i latou lava nei sa matou galulue faatasi mai lava i le amataga i le faatuina o le vaega faaupufai lenei. Ia ua uma foi la ona ou faasalalauina i totonu o le atunuu le faamoemoe lena o le vaega, e tatau ona lē i lalo ifo o le 40 nofoa matou te maua, ia ma o se luitau foi lena mo le Itu Agai e fuafua i ai a latou foi taumafaiga.
Ae sa ou faasalalauina foi i le vaiaso talu ai, nisi o sui sa latou faasalalauina, ua fesootai mai ia te au ma logo mai, e lē sa‘o le faasalalauga lea sa fai.
Ona e lei faapea ua mautu se talanoaga ae ua tei i le faalogologo mai, ua faaalu e le Tautua o latou suafa. Ia o lena la sa logo mai ai a‘u e lē sa‘o, ma o lea foi ua faasalalau i nusipepa ma TV ia matai o afioaga, e soloia ese sui o o latou itumalo ia e ta‘u atu, ae lē o iai se agaga faapena.
Pau a la le mea lea ou te naunau i ai, ia lē tele nisi e tupu ai se tulaga faapena, ona o lo matou foi naunau ia tulai mai se Itu Agai mautu ma le maopoopo. O le tulaga la lena o le faafesili mai.
