Ia manuia le tausaga fou!
Ona o le tusitusiga muamua lenei mo lenei tausaga fou, ua lāga ai se manatu e faamanatu atu le tāua o le puipui o aiā tatau i le amataga, ae lē o le faatamala; ona tutupu lea o faafitauli faato‘ā sue se fesoasoani.
E tāua le nofo puipuia ona malamalama ai lava lea mai i le amataga tagata uma, i aiā tatau e puipuia faaletulafono. E tāua foi le malamalama i tiutefai i le va faaletulafono.
O le vaiaso nei o le a talanoaina tiute ma aiā i totonu o Ekalesia faapea foi ma falefaigaluega.
RIGHTS AND DUTIES WITHIN A CHURCH:
Aiā tatau ma titute i totonu o Ekalesia e tatau ona nofo malamalama i ai.
I luga o le tulafono, poo Niu Sila poo Samoa e iai aiā tatau a tagata uma lava e puipuia e le tulafono. E amata mai i tamaiti laiti e oo i tagata matuatua. Poo lou faigaluega, poo lou lē faigaluega; pe ete fai auala poo se fai faatoaga; e tutusa i le tulafono aiā tatatu a tagata uma. E tusa poo le ā lou tulaga o umia poo lau galuega, e lē sili a‘e se aiā tatau a se isi ona o lona tulaga poo lana galuega fai, i se isi lava tagata.
E lē gata i aiā tatau, ae e iai o tatou tiutefai i isi tatou te feagai, e puipui foi i le tulafono.
E te lē soona faia se mea i se isi tagata poo nisi tagata, e soli ai lou tiute i le tulafono i le va ma isi tagata.
I totonu o Ekalesia ma aulotu, tou te faaaloalo i le faifeau ma lona toalua, ona e iai le aiā tatau a le faifeau ma lona toalua e puipuia i le tulafono i le va ma tagata o le Ekalesia. E faapea foi ona faaeteete le faifeau i le va ma tagata o le Ekalesia. E iai aiā tatau a tagata o Ekalesia e lē solia e le faifeau poo lona toalua.
E iai foi tiute o le faifeau e iloa lona tulaga ma lana galuegafai i totonu o le Ekalesia e faatapulaa ai le faiga o galuega a le faifeau ma lona faletua i le va ma le Ekalesia. E faapea foi ona iai tiute o le Ekalesia i le faifeau.
O nei aiā tatau ma tiute faaletulafono, e tatau lava ona talanoaina malamalama i le amataga o se feagaiga a le faifeau ma le Ekalesia ona tusia lea i lalo i se feagaiga tusitusia, ona sainilima ai lea o le faifeau ma le Ekalesia. A mautu feagaiga e leai ni finauga e talepe ai Ekalesia, ma alu ai tupe i fale faamasino.
E taugofie mamao atu lava le saili o le fesoasoani a se loia e faaupu se feagaiga e sainilima ai le faifeau ma le Ekalsesia i le amataga o le galuega, i lo le faatali se‘i tupu
se vevesi i totonu o le Ekalesia ona faato‘ā tapa lea o se fesoasoani faaletulafono.
Afai e leai se feagaiga tusitusia o iai i le taimi nei, e tatau ona saili se fesoasoani i le tulafono e talanoa le faiga o le galuega a le tou Ekalesia ona tusi pepa lea o se feagaiga a le Ekalesia ma le faifeau. E puipui le faifeau, puipui le Ekalesia.
E iai le isi aogā tele o le tāpa loa o se fesoasoani e faamalamalama aiā tatau ma tiutefai i totonu o Ekalesia i le taimi nei ma tusi pepa feagaiga, ona o le tele o a tatou Ekalesia, e iai Ekalesia Aoao e iai tulafono e tatau ona iloa e le faifeau ma le Ekalesia. O ia tulafono e tatau ona faasa‘o a o lei tusia i totonu o le feagaiga a le aulotu, pe a iai ni tulafono e lē talafeagai ma le tou aulotu. A iai ni tulafono a le Ekalesia Aoao e lē sa‘o i le silafia a le aulotu, e tatau ona fesili tusitusi i le ofisa o le Ekalesia Aoao, ona iloa lea e le Ekalesia Aoao, e tatau ona faasa‘o a latou tulafono auā e lē sili a‘e tulafono a Ekalesia Aoao a Ekalesia Aoao taitasi, i tulafono a le malo a Niu Sila.
E tutusa Ekalesia uma lava i lalo o le tulafono a Niu Sila. O le tiute a le aulotu o le saili o se fesoasoani nei, e tapena ma tusia i lalo feagaiga aloaia e sainia e faifeau ma Ekalesia, ia aua ne‘i iai ni faafitauli i le lumanai.
Tusa lava pe iai ni faafitauli e tulai mai, e faigofie ma taugofie ona fai se iuga, pe a ma‘oti tulafono tusitusia a aulotu ua sainia.
E laititi mamao taimi ma tupe e alu i le saili o ni puipuiga i le taimi nei, ma faasa‘o le faiga o galuega, i lo le faatali se‘i tupu mai se faafitauli.
RIGHTS AND DUTIES AT WORK:
E oo i totonu o falefaigaluega, e faapea foi ona fautua atu i tagata faigaluega, e vaai lelei ‘Employment Contracts’ ia puipuia aiā tatau a outou faigaluega, ma malamalama i tou aiā tatau i totonu o falefaigaluega faapea foi ma tou tiutefai.
O le taimi nei ua lē faigofie ona maua galuega. Ua tele tagata sue galuega ae laiti avanoa o galuega. Afai ae maua sau galuega, ia muamua lava tausisi e fai se feagaiga tusitusia e te malamalama ai a o lei sainia.
Ona o le lumanai o lou aiga ma lau fanau lau galuega, e tāua tele le nofouta e vaai faaupuga i totonu o feagaiga tusitusia e ave ane e pule o galuega e saini i le taimi e te amata ai.
E iai le tiute o le tagata e ona le falefaigaluega, e tuu atu ia te oe se avanoa e saili ai se fesoasosani i le tulafono e faamalamalama ai ia te oe le feagaiga, ia e iloa uiga o upu tusitusia i lau Contract a o e lei sainia.
O le tiute o oe o le tagata sue galuega o le saili o le fesoasoani ia e malamalama a o lei sainia le Contract.
E tāua le puipuia i lo le togafitia. E laititi le tupe ma le taimi e alu i le puipuia o aiā tatau ma faama‘oti tiute o tagata uma i le amataga i totonu o aulotu. E leaga le faatali se‘i malepelepe le Ekalesia, ona faato‘ā saili lea o se fesoasoani.
Afai o lau galuega, e tatau lava ona puipui lau galuega i se Employment Contract e te sainia ua e malamalama atili i tusitusiga.
Manatua, e ese lava lou malamalama i le uiga o upu faaperetania, ese uiga o upu faaperetania i le tulafono. E tele foi upu faasamoa e leai se upu peretania e faaliliu tonu i ai.
O le tiute o loia e malamalma i le faasamoa ma le faaperetania, ma ua lava tausaga i le tomai faaloia, o le a‘ia‘i o upu e faaaogā, ia aua le faaaogāina ni upu lē sa‘o, e afaina ai oe poo outou i se taimi o i luma.
