O lea ua atoa lelei le vaiaso talu ona faatea e alii ma faipule o Fusi Safata mai le faiganuu, le tofi Sui tamaitai o le tina ia Malae Tiumalu Vili, ona e faapea se faamatalaga, ua lē usitaia le avea‘i a le nuu e auai ai i se fonotaga sa faia.
O le vaiaso lenei, lea na oo mai ai alii ma faipule o le afioaga o Fusi Safata ma feiloai ma le Matagaluega o Mataupu tau Tina ma Tamaitai Atinae o Nuu ma Agafesootai e tusa ai ma lenei mataupu. Faaalia e Malae, e lei oo atu se avea‘i ia te ia ma e lē sa‘o foi tuua‘iga ua faatea ai o ia ma le faiganuu a o faatino lona tiute Sui tamaitai.
“Ou te talitonu, o le fono sa fai, na talanoaina ai lo‘u tagata ona o se ripoti sa ou tuuina atu i le Matagaluega o Tina ma Tamaitai ma Agafesoota’i e uiga i poloketi ma polokalame o atinae ia o faiganuu lelei ma manuia,” o se faamatalaga lea a Malae.
O lea lipoti o loo ta‘ua ai, le tele o aiga ua faatea ma le nuu, o le lē toe iai o se komiti o faletua ma tausi ma le aumaga faatasi ai ma ni feeseeseaiga a matai i totonu o le afioaga.
Sa oo mai foi le Sui tamaitai i le Matagaluega o tina ma tamaitai ma agafesootai ona o lea tulaga, ae na pau le itu na faamanino i ai e le Matagaluega, o le faaauau ai pea o lona tofi e ala i poloketi o loo galue ai i le taimi nei faapea polokalame o loo lumanai ua tuu atu i ai.
Ua ono nei tausaga o umia e Malae le tofi Sui tamaitai o Fusi Safata, ma o nisi o atinae sa ia faatino a o tulai mai i le tofi, o le faatūina o le fale komiti, o fata lapisi mo aiga uma o le nuu, o le vai ua oo atu i nisi o ituala e lua agai i uta o le afioaga, o moli i le auala mo feoaiga i le po faatasi ai ma le faiga o togalaau faisua e pei o kapisi.
“Sa matou feiloai ma sui o le Matagaluega o tina ma tamaitai ma agafesootai, ona o lea mataupu ma ou te lē iloa poo afea tonu a toe maua ai se faiganuu toafilemu i totonu o Fusi,” o se faamatalaga lea a Malae.
O se tasi o itu e le o fiafia ai le Sui tamaitai, o le lē auai o le faletua o le alii pulenuu i le komiti a faletua ma tausi, ma le taofi o komiti a faletua ma tausi ma le aumaga ae totoe ai na o le aualuma lea ua tautuaina le nuu.
“O la‘u galuega ma le tiute o le pulenuu e o faatasi ma e galulue faatasi auā le lelei o le nuu aemaise lava i le agai i luma o atinae ua tuu atu e le Matagaluega o tina e atinae ai le nuu faapea le atunuu.”
Ua iai le fuafuaga a Malae na te faamaopoopo ai le vaega o faletua ma tausi faapea le aumaga ua lē toe auai i komiti e pei ona aveese e alii ma faipule, ina ia latou galulue faatasi i poloketi o loo faagasolo i le taimi nei ma poloketi o le a tuuina atu i le lumanai.
O loo nonofo pea i totonu o le afioaga Malae ma lona aiga se‘i vaganā ai le lē toe auai i le faiganuu e pei ona iai le iuga a alii ma faipule.
Sa fesiligia le Matagaluega o tina ma tamaitai ma agafesootai i lea mataupu, ae peitai na saunoa le sui pule sili o le Matagaluega, Luisa Apelu e leai se tali mai a le Matagaluega mo lea mataupu ona se‘i mae‘a ona tagatagai i le mataupu atoa na tulai mai.
Na tapa foi se finagalo o le pulenuu o Fusi Safata, Alo Sinapati i lenei mataupu, ae na ia ta‘ua se‘i iai se taimi ona o loo taatia le fuafuaga e fai i ai. O le mae‘a ai ona feiloai sui o nuu ma le pulenuu o le a maua mai ai se tali e tusa ai o le mataupu ua tulai mai i Fusi.
