Tauvaga solo ma pese a le auaunaga a le Mapu Maia ma le Problem Gambling Foundation o Niu Sila

E tusa ai ma faamaumauga a le Mapu Maia Service, e 151 le aofai o alo ma fanau Samoa i Aukilani na mafai ona faaoo mai a latou solo i le ofisa, ae lē o faitauina ai nai fanau na lauina a latou solo i le ea i le masina o Aokuso, ae lei mafai ona faaoo mai i le ofisa mo le togiina.

E toa 8 nai fanau sa mafai ona faaulu mai a latou pese i le tauvaga, ae e iai foi nai isi alo ma fanau e lei oo mai le kopi o a latou pese i le ofisa e togi.

O loo matauina e le Mapu Maia, o loo faasolosolo lava i luma le faatāuaina e lo tatou atunuu o lenei foi auaunaga e ala i le galulue faatasi o mātua ma fanau, ina ia faaleo mai lagona o tamaiti ma le atunuu, e sailia ni auala e faaitiitia ai le ogaoga o taaloga faitupe ma petipetiga, o loo aafia ai le lotoifale o aiga.

Sa iai ni pepa fesili (surveys) sa fesiligia ai le mamalu o le atunuu pe finagalo e toe faaauau lenei polokalame i le 2013 ma aumai ni mafuaaga e afua ai lo latou finagalo.

O nisi o finagalo sa tusitusia o le:

Faatāuaina ai o leo o fanau ina ia amanaia e mātua, la latou talosaga vaivai ina ia faamuamua latou ae lē o taaloga faitupe.

E faatāuaina ai pea le tautatala o fanau i le gagana Samoa. E faamalosia ai le galulue faatasi o mātua ma fanau i tusigasolo ma pese.

Feiloai ai mātua ma fanau Samoa mai isi vaega o Aukilani. Tauave ai e fanau igoa o a latou aoga ma vaega o Aukilani o aooga ma a‘otau ai. E maua ai le lototetele o fanau e tautatala i le alaleo a o faafofoga le atunuu.

Polokalame e fesoasoani e taulogologo ai i aiga ina ia faaitiitia ma taofia taaloga faitupe.

E aoga tele lenei polokalame mo aiga Samoa i Aukilani, ua mafai ai ona faasoa mai le tele o aiga ma mātua i faafitauli o manaomia ai la matou fesoasoani. Ua silia ma le 30 aiga ua mafai ona faasoa mai, ma oo i ai le auaunaga, talu ona mae‘a le tauvaga solo ma pese a le fanau.

O se faafetai tele a le auaunaga a le Mapu Maia ma le Problem Gambling Foundation o Niu Sila i le mamalu tele o mātua ma le atunuu, ma i latou na fai lo latou sao i lenei polokalame a le fanau i le tausaga 2012.

O le manatu maualauga i lenei auaunaga ia lagonaina e le mamalu o le atunuu o Samoa, o taaloga faitupe ma petipetiga e faafiafia loto, na o se taimi puupuu lava, ae tatou mautinoa lelei, o a tatou tupe ma o tatou afu liligi lenei lava ua mauoloa ai tagata maualuluga ma i latou o loo faia nei pisinisi.

Faafetai tele foi i le galuega lagolagosua a le alaleo o le Samoa (Radio Samoa) ua mafai ai ona faataunuu lenei polokalame i lenei tausaga.

A manaomia lava le fesoasoani ia valaau mai le telefoni 0800 664 262.