O la a le Tusi Paia, “O loo saili mai le Alii mo e e tapuai atu ia te ia i le Agaga ma le faamaoni.”
O se finagalo na moe ma se tofa na a‘e i le saili atu a le susuga i le faafeagaiga taulagi ia Jeph Filipaina ma le faletua ia Tino Laulu Filipaina i le Atua, ma amata tofatu ai se faanaunauga e fia tuufaatasi ni aufaipese talavou a ekalesia eseese ae sii faatasi ma osi taulaga o viiga e faaneeneeina ai le suafa manumalo o le Alii faaola o Iesu Keriso.
Na ia amata faasoa ma talatalanoa i nai ana uo faifeau ma paaga i le musika, aemaise o le susuga ia Tua Kaisala o loo faauluulu i ai musika a lana ekalesia, ma faatulaga ai loa le afiafi o le Aso Toonai na mavae atu.
Saunoa Jeph na galulue faatasi ma auauna totofi aemaise o uo musika ma la latou ekalesia atoa e ala i le tulivae atu i le anapogi ma le tatalo ina ia tau lau o le faamoemoe, maualuga ai se viiga o le Atua, ae o le sini ia atili valatalata ai le savaliga ma le mafutaga a aufaipese ma tupulaga ma le Atua o Viiga.
Na ia saunoa foi ua masani i le osi taulaga o viiga na o le Aso Sa ae leai le vaiaso atoa, ae o se toe faamanatu a le “Worshiper Arise” pei ona faaigoaina ai le polokalame i le Aso Toonai, e ao ona osi taulaga o viiga mo le Atua i aso uma o le vaiaso, mai lou loto ma lou soifua auauna i soo se valaauina ma soo se faiva ma tiute ua totofi ai tatou, e lē faatali seia oo i le falesa, auā e iai le Atua i mea uma.
E toatele ekalesia eseese ma aufaipese na osi taulaga faatasi i le faamoemoe ma fai o latou sao i le taulaga o viiga, o le Redeemer Church, Mercy Samoan Christian Fellowship, Tusitala Family, Kingdom Worshipers, Full Gospel ma le sao matagofie o le Unasa Brothers aemaise o le aufaipese malosi a le Arise and Shine.
E maeu foi le agavaa o le tamaitai o Nina Sione na faatautaia le polokalame, na lagona le mamalu o le Atua i lea afiafi, i le vaaia o alo ma fanau lalovaoa a Samoa ua taupati e vivii ma osi taulaga o viiga mai le loto ma le fatu mo lo latou Atua.
Na faamatafi le afiafi i le mafutaga talatalanoa ma faamasani, a o tali le faaaloalo i le malu afiafi. Tatalo ia tapue ma ola, tumau le osi taulaga o viiga ma talosoifua mo lea tausaga i le alofa faasoa o Iesu Keriso.
Ia faalautele e Ieova le faaaliga Ps Jeph ma Tino.
