Ua taoto nei i le Faamasinoga Maualuga i Mulinuu se tagi a se tasi o tamalii o le atunuu ua lauiloa i lana taleni o le musika ma le lagiina o pese, susuga Asuao Lealaitagomoa Felise Mikaele, ua tuuaia ai le kamupani fai ata tifaga o le South Pacific Pictures o loo faagaioia ma pulea e le susuga Tanupo Aukuso ma lona faletua o Taufau Gardenia Aukuso.
O faamaumauga a le faamasinoga ua taulimaina e le tusitala o lenei lipoti mai le itu tagi o loo faaalia ai le faaaoga i se DVD ata pue a le kamupani o le South Pacific Pictures na amata faatau i tua i le masina o Setema o le tausaga ua mavae 2011. O le DVD ua faaigoaina o le “Samoa Fiafia” o loo faaaoga ai le pese a Asuao Felise o le “Tama Samoa” o loo usuina e le faaili o le RSA Band.
O le tasi o pese ua faaulutalaina o le “Sau Ia”, o loo faaaoga foi i le DVD lava lea o se backround music.
O ia pese e pei ona faaalia i le faamaumauga o le tagi ua faaulu i le faamasinoga, ma ua mae‘a ona valaau ia Mati ma le masina nei o Aperila, e faapea na faaaoga e le kamupani fai ata tifaga ma ona faatonu e toalua e aunoa ma le tapa muamua o le e ana le meatotino mo se faatagaga.
O loo faaalia foi i le pepa o faamaumauga o lenei mataupu sa iai se fetusiaiga na faia i le va o Asuao Felise Mikaele ma faatonu o le kamupani ina ua maua le DVD o loo iai ia pese e lua, ma sa ave ai se faamaulaloga i le faaletonu ua tupu.
Peitai o loo ta‘ua i le tagi e lei iai se taumafaiga a le kamupani ma ona faatonu e soalaupule i tua i se auala i tua toamalie le mataupu, o le mafuaaga lea o le faaulu o le tagi a le alii pese.
O le aotelega o le tagi o loo talosagaina ai le faamasinoga mo ni vaegatupe e totogi atu e le kamupani ma ona faatonu ona ua afaina tupe maua a le alii pese i sana CD na faatau i tua o loo iai le pese o le “Sau Ia” e mafua i le DVD a le kamupani pue ata tifaga o le South Pacific Pictures.
Ua talosagaina le faamasinoga mo se totogi e $150,000 mo vaega ua faaletonu poo damages, o se vaegatupe e $50,000 mo punitive damages, $10,000 mo le tupe alu a le itu tagi na malaga mai ai i Samoa e tapena le tagi ma fesootai i loia, ma le $8,000 o le totogi o le loia a le itu tagi. O le Aso Gafua, 16 o Aperila na toe valaau ai le mataupu i luma o le Faamasino sili. E lei oo atu le loia a le itu o loo faasaga i ai le tagi, e oo foi i se isi o faatonu mai le kamupani.
Ua na o le alii loia o Alex Su‘a na tulai mo le loia a le itu tagi ona sa tuatuagia le tamaitai loia o Maiava Visekota Peteru i se isi mataupu i le faamasinoga i le taeao lava lea.
O le tuutuuga ua iai ua toe tolopo le mataupu i le aso 14 o Me 2012, ina ia mafai ona tapena atu ai le itu o loo faasaga i ai le mataupu ma ana loia, ma o le fautuaga lea a le Faamasino sili Afioga Tiavaasue Falefatu Sapolu, sa talia e le alii loia o Alex Su‘a.
