O le lauga faapitoa a le afioga i le alii Faipule Samoa ia Peseta Sam Lotu-Iiga, e pei ona ia tatalaina ai le fono tele faaletausaga a le FAGASA mo aso e tolu (10-12 Aperila) e pei ona usuia i le aai o Dunedin, sa ia saunoa ai i le tāua o le galuega o loo faatinoina e lenei faalapotopotoga, le FAGASA, i le uunaia o polokalame auā le aoaoina o fanau a Samoa i la latou lava gagana muamua poo le gagana Samoa i totonu o aoga i Aotearoa, ina ia mafai ai ona tapenaina i latou e avea o nisi e taulau manuia i o latou soifuaga i totonu o lenei lalolagi.
Sa auai atu le alii faipule e avea o se sui auai o le Faigamalo a le National, ae o se fofoga taumomoli foi mo le tamaitai Minisita o Mataupu tau Atu Motu o le Pasefika, Hon Hekia Parata.
Saunoa Lotu-Iiga, ua matuā talafeagai le fonotaga o lenei tausaga a o sauni atu ai Samoa mo le faailogaina o le 50 tausaga o lona tutoatasi i le aso 1 o Iuni.
Saunoa Peseta, ‘E tāua tele le galuega o loo faatino e le FAGASA, i le unaia ma faatāua le gagana Samoa ma faaleleia atili tomai o fanau e faitau ma tusitusi ai i gagana uma e lua, faa-Samoa ma le Igilisi, aua o le auala lea o le a siitia ai ma maualuluga ni ausiaga i itu tau aoaoga, ma faaleleia atili ai foi le tulaga lelei i totonu o komiuniti’.
‘A o tatou faamanatu le 50 tausaga o le saolotoga ma le sainiga o le Feagaiga o le Faauoga i le va o Samoa ma Niu Sila, o se taimi lelei la lenei e toe sasaa ai le fafao e pei o ia upu, ma toe manatunatu ifo poo a ni mea e mafai ona tatou faia e faamalosia atili ai o tatou tagata Pasefika ma fesoasoani i o tatou tupulaga faia‘e ina ia taulau manuia i le olaga.”
E toetoe lava o le ‘afa o le aofaiga o tagata Pasefika i Niu Sila nei, o tagata Samoa. E iai le faatatauga, e oo atu i le 2026, o le a tulai mai ai, o le tagata e toatasi mai tagata e toasefulu i Niu Sila, o se tagata e tupuga mai ni matua Pasefika.
Na ta‘ua foi i le lauga a le alii Faipule, o loo vaaia le matua tele o le aafiaga lelei ma le tulaga manuia o tagata Pasefika i le itu tau taaloga ma isi tomai e pei o le tomai faatufugaga (arts).
O le naunautaiga la o lenei faalapotopotoga faapea foi le malo, ina ia faaauau ai pea ona unaia atili na aafiaga lelei o fanau a le Pasefika i aso a sau. Ma e telē le aafiaga lelei o le unaia malosi o le faaaoga ma malamamalama o fanau Pasefika ia latou lava gagana muamua poo gagana a o latou tupuaga, i le faataunuuina o nei ausiaga.
O le lagolagoina o gagana ma aganuu a le Pasefika, o loo avea o se tasi o mataupu o loo ave i ai le faamuamua a le Matagaluega o Mataupu tau Atu Motu o le Pasefika, ma o loo taulamua ai foi le afioga i le alii Faipule i le atinaeina, e pei ona galulue ai faatasi ma le Matagaluega faapea foi i le faafaletui lava ia a le National i Ueligitone i lenei lava polokalame.
Saunoa Iiga, e ala i ni suesuega maeaea na faia ua iloa ai, e mafai e aoaoga e faaaoga ai gagana e lua ona fesoasoani i le faamalosia o le faasinomaga o se tasi ma ni ona tomai, aemaise foi le faaleleia atili o ona tomai faalemafaufau.
O le iuga, o le a atili ai foi ona telē se avanoa e ono maua ai ni galuega lelei ma ni totogi lelei, o ni aoga sili na ona taua mo tagata Pasefika uma o loo i lenei atunuu.
O le FAGASA, o se faalapotopotoga tumaoti a tagata Samoa, e faapitoa a latou polokalame i le faatāua o le gagana Samoa, ma galulue ia faaleleia atili tomai o fanau Samoa o loo aooga i Niu Sila, ina ia lelei lo latou malamalama e faitau ma tusitusi i gagana uma e lua, le gagana Samoa ma le Igilisi.
