O le taimi nei, oloo galulue malosi le Matagaluega o Pasefika i le Ofisa o Aoga i le tapenaina o le Taiala mo le Aoaoga o fanau Pasefika i Aotearoa. O lenei lava faamoemoega ina ia siitia le tulaga o fanau Pasefika i totonu o aoga ma ia faamanuiaina.
Atonu e manatu ane e tai foliga tutusa lava mataupu faatalanoaina i vaiaso taitasi, ma e moni ma faamaoni lea finagalo.
Peitai, o naunautaiga o le tusitala, ina ia matua malamalama, vaega oloo faamamafaina i le taumafai o nai fanau, ina ia avea ma ni tagata aoaoina lelei, ma le fiafia i le 21 seneturi, ona ua le o toe faigofie lenei vaitau o le soifuaga.
O vaega oloo maualuga iai le silasila a le malo i lenei foi vaitau, o le faateleina lea o le numera o tamaiti Pasefika e auai ini polokalame anagata i aoga amata, e tapena ai mo le agai atu i aoga tulagalua, ma faasolosolo atu ai i vaega maualuluga.
O lenei lava vaitau, ua matauina gofie fanau e lei lava tapena i aoga amata, poo le le auai foi ini aoga amata.
Ma ua faamaonia, o le tasi lea vaega oloo faaletonu ma maualalo ai pea le tulaga o aoaoga o fanau Pasefika, ona e pito i toatele foi, e le auai i aoga amata.
O se tasi o faamoemoega, ia lelei ma malamalama i le faitau tusi, ma le tusitusi, faapea foi ma le numera i laasaga uma o le aoaoga. Afai e lelei ia vaega, o le a faigofie foi ona aoaoina i isi mataupu o le Taiala mo aoga.
O le faamoemoe lea o Matatia mo Tamaiti i Niu Sila atoa [National Standard], mo tamaiti i le Tausaga 1 i le Tausaga 8, ina ia solo lelei ai le taumafai mo le faasolosolo atu i aoga maualuluga.
Ua taua foi i le Taiala mo fanau Pasefika le taua o le ausia o le Laasaga 2 i le NCEA, poo nisi tusipasi e talafeagai ma le Laasaga 2 i le 2016, ma ia oo atu i le 100 pasene i le 2023.
Afai e manuia lea taumafai, o le a faigofie ona faaauau le taumafai ina ia maua ni tusipasi maualuluga. Peitai, e matua manaomia le faaitiitia o le tiai aoga, ina ia mafai ona ausia ia faamoemoega.
Oloo faamamafaina i le Taiala fou mo fanau Pasefika, le amanaia lea o faasinomaga, gagana, tu ma aganuu. O se vaega taua tele lea ma le faagaeetia ona e mautinoa ai, le faatauaina ma le amanaia o fanau Pasefika, ma o latou aiga.
Ua le tulimatai na o le aoaoina o le atamai, ae ua aofia ai ma faalogona o le tamaitiiti, i le atinaeina o lona mafaufau, o le tino, o le agaga, va fealoai, ma lagona.
E pei lava o tulaga masani o le soifuaga, poo le a le faigata, ae a fiafia ma mautinoa le faatauaina, amanaia ma le taliaina, e faigofie mea uma.
Ua faamoemoe foi le malo ina ia matua faatinoina ni polokalame Mautinoa mo le Autalavou Pasefika, ma saunia ni auala ina ia iu manuia o latou taumafai, ma maua ni tomai e mafai ai ona maua ni galuega lelei mo ni lumanai manuia.
E pei ona taua i luga, o nei lava mataupu oloo faatalatalanoaina i vaiaso taitasi, peitai ua manatu e taulogologo pea Samoa mo lou silafia, ina ia malamalama o tatou tiute, aua ni manuia o alo ma fanau mo a taeao.
E manatu lava le tusitala o le a le afaina i lou finagalo le faamanatu pea, ina ia tatou mautinoa a tatou matafaioi mo le tapenaina o nai fanau ina ia avea ma tagata aoaoina lelei o le 21 seneturi.
A tatou malamalama lelei i le tulaga o aoaoga a le fanau, e le taumate le maua o lagona o le lototele, e fesiligia ai aoga, komiti faafoe, puleaoga ma faiaoga, i le faatinoina o o latou tiute, aua le agai i luma o le taumafai o fanau.
Oloo tele lava ni poloketi e amata mai Aoga Amata seia oo atu i Iunivesete ma Matata Eseese, oloo faatinoina e le tele o faalapotopotoga oloo aofia ai le SAASIA [Sosaiete mo Aoga Amata Samoa i Aotearoa], ma le Teuila Consultancy, e tapena ai le faaleleia o le Taiala mo Fanau Pasefika, ina ia mafai ona faamalieina manaoga e le gata i fanau, ao matua ma tagata lautele.
O nei lava poloketi oloo laualuga ai le taua o le galulue vavalalata o aoga, matua, taitai o le Pasefika, ekalesia, ma saofaiga eseese a tagata lautele, ina ia ausia faamoemoega mo fanau Pasefika – O NI TAGATA AOAOINA LELEI O LE 21 SENETURI.
Ae manaomia lo tatou galulue, fefaasoaai, felagolagomai, fesoasoaniai, fetalitonuai, i le faamaoni, faaaloalo, alofa ma le lototele, i se siosiomaga mafanafana, toafilemu ma le saogalemu.
Manuia tele fuafuaga o lenei vaiaso, tatou feiloai i le vaiaso o muamua.