(samaria Tauile‘ave & Sevaaetasi Togia Foua)
O le silafia atili ma le tele o le iloa o le tagata, o le mafai lea ona faia se galuega fesoasoani e laveai ai le soifua o se isi tagata. Ua 3 masina talu ona faagasolo le Zumba poo faamalositino e faia fua mo nisi i le pitonuu o Inala.
O le toatele o i latou na lolofi atu ma opogi lea faamalositino, auā e faia fua ma sa faatupeina e ala i le fesoasoani a nisi o le aufaipisinisi. Faafetai i le latou lagolago mai, ua mafai ai ona faatinoina lea tulaga e fesoasoani ai e faia sina faamalositino.
O nisi e atoa le vaiaso o koleni i isi falekoleni ae faaavanoa po nei e lua mo Inala (Aso Gafua & Aso Lulu). E momoli pea le agaga faafetai i le afioga i le aloalii ia Galumalemana Naea Harry & Apu Timoteo o le Enichiro Laei & Containers, Tavita & Logo Sione o le Panel & Paint, Leu & Vai Liu o le Leu Liu Transport, Lealaifola Lui & Leigh o le ABPS & Top Fencing, faapea Dean o le faletaavale a le PrimOz.
O le tamaitai fomaipasi le faletua ia Tauile‘ave (Luatuanuu) ma si ona alii ia Sevaaetasi Togia Foua (Mulifanua) o ni samaria agalelei na tuu mai foi o la tau‘au e ala i le faia fua o aoga ma maua tusipasi o le CPR e pei ona o la aumaia ai le vaega mai le St John (Ambulance).
Na o la totogiina se vaega tupe tele e faia ai le course i le po o le Aso Lulu 25 o Iulai ma maua ai tusipasi mo tagata e to‘a 30 lea o le a tauaaoina i se aso o lumanai.
Na ta‘ua e le tamaitai fomaipasi ia Tauile‘ave, e fiafia tele o ia e fesoasoani i tagata Samoa auā o le tele o gasegase e maimau soifua o le lē maua lea o se agavaa e faia ai galuega fesoasoani a o tālia taavale a le falemai poo ambulance.
O loo sologa lelei pea lea taumafaiga i lenei faamalositino e ala i le lagolago a le susuga ia Opetaia ma Rosita Sione o le Monavie ma le Frank Frost Taekwondo (Faalavelave Frank Frost).
O loo faia lava ia faamalositino i afiafi o Aso Gafua ma Aso Lulu amata i le ‘afa o le 6 i le afiafi i le tulimanu o Abelia ma Rosemary Street i Inala.
