E ui sa ta’utino e se teineititi i luma o le faamasinoga ni faiga matagā a se tasi o tama tane o lona aiga 52 tausaga le matua na faia ia te ia, ae na toe tulai le teineititi i le faamasinoga o talosaga apili ma faia se isi ta’utinoga e sese uma ana tuua’iga ma e leai se moni.
E talia le apili ae o loo tuli le faasalaga 13 tausaga o le tama tane na faamaonia e se laulau o faatonu ona moliaga o le faiaiga faamalosi ma le faia o ni fesootaiga tau feusuaiga matagā ma le teineititi. Na manaomia e faamasino e toatolu o le faamasinoga o talosaga apili le valaau o le teineititi mo lana molimau faapea nisi o molimau a leoleo sa suesueina i le faamasinoga maualuga.
E lei faigofie i alii faamasino le toe oo atu o le teineititi e fai sana molimau peitai na tapena e le ofisa o faamasinoga vaega uma mo le faia o le molimau, lea na pupuni atoa le vaega na faia ai le molimau ina ia taofia ai le iloa o foliga o le teineititi e tusitala ma ē na auai e faafofoga.
Na ta’utino e le teineititi e sese uma ana tuua’iga ae o lona fefe i leoleo i le avatu o faamatalaga tau faafefe na mafua ai ona ioe sa aafia ini faiga matagā a lē ua molia. Na alualu le suesuega a le faamasinoga o talosaga apili ona valaau lea o le molimau a se ulugalii na vaaia le teineititi.
Na valaau foi le molimau a le tina moni o le teineititi. O molimau ia na silasila ai alii faamasino i le feteena’i o mau mai le taimi muamua na suesue ai e leoleo tuua’iga.
Ina ua mae’a ona silasila le faamasinoga i molimau tuu fofoga ma molimau faatauto, na taunuu ai i le faaiuga o le tumau pea o le faaiuga ua faamaonia ai moliaga o le faiaiga fai faamalosi ma le faia ose fesootaiga tau faigaaiga faasaga i le alii 52 tausaga le matua.
Ua taunuu foi le faamasinoga ise faaiuga ua iloa ai sa taumafai le tina moni o le teineititi e taavili se gaioiga e toe suia ai le faamatalaga a le teineititi ina ia faasao lē ua molia mai le solitulafono na ia faia. O le faanoanoaga tele lea o alii o le faamasinoga o talosaga apili ona sa tatau i le tina ona tu malosi i lona tulaga o le puipuia malu o lona alo teine.
O le solipala e le faamasinoga apili o le toe suia o le faaiuga a le faamasinoga e lē o tuua’ia ai le teineititi na aafia, ae o se mataupu ua manino ai le malosi o le faalavelave o ni tagata o se aiga i le faia o le amiotonu a le faamasinoga.
O le tausaga ua mavae na faia ai le iuga e faamaonia moliaga ma amata tuli ai le faasalaga 13 tausaga i le falepuipui o lana susuga na faia le solitulafono i le teineititi.
