A ta’u loa le maisu poo le fugafuga uliuli pato’i e laupae i le gataifale e le mafai ona ‘aina e o tatou tagata, ona e ‘onana ai, ae o le ma’oi lena o Saina.
I le vaitaimi o fau le fale faamasino fou ua iai nei i Mulinuu, sa toatele lava le aufaigaluega a le malo o Saina na aumai e lalaga le faavae uamea ma fau i luga le fale se ‘ia oo lava ina mae’a.
Peitai ua maitauina le tele o galuega a Saina e faia i Samoa, e aumai lava tagata Saina latou te fausia pei o le falema’i ma isi fale ua uma atu.
Ae o Saina lea na o latou fauina le fale faamasino i Mulinuu, sa fai ma masani le o tae mai fugafuga le ituaiga uli nei e ta’u e tatou o maisu, e la’u mai i taga ma faa lala.
E le faigofie le faavelaina ole maisu
Peitai a uma ona faamamā, (faatiau, faapuna mo sina taimi laititi, faamamago lelei) ona utu taga pepa lea ma teu i le fulisa e auaua’i mai e fai ai a latou taumafa.
A’o lei faia le kuka maisu e fua pe faitau mai lava le aofai o maisu i le toatele o Saina e taumafaina. Ole sakaina o le maisu, e faaaoga ai e Saina le ulo faapitoa, le pressure cooker e matua’i fuli ai lava e saka ma sui vai. Pe tusa o le 10 itula e saka ai ina ia te’a ese le ‘ona. Na ta’ua ese tasi o alii Saina, e iloa gofie lava e lei tea ese le ‘ona, e tofo atu e feū.
O le uma mai ole sakaina o le maisu, toeititi aso atoa, faato’a faaaoga ai loa le maisu i le gaseseina o taumafa lea e masani ai le Saina.
E vela mai se kuka maisu, e galemulemu pei se jelly, e malamalama foi ma maseesee ae ua mimigi ma laititi lava e ofi atoa lava le maisu e tasi i lota gutu.
O lau ma fugalaau faamanogi meaai eseese e togi iai, ma e molemole ma tofo lelei ai le maisu, ete leiloa ose maisu o loo e taumafaina, ma ua e manao ai e toe asu ma toe asu mai le maisu. Ua tai foliga lava ini poloka o le tatou pisua.
Peitai o le maisu lenei, i le taimi o loo ola, ae e vaai iai i lalo o le sami e taufaamata’u lona lanu uliuli pato’i, ma lana taatia gai’o mai le alititai e lagona ai lava lou matafefe. Ae ole taimi e tausami ai, ta’ilo foi i le tofo lelei o le palolo pe tusa o le maisu pe a kuka e le Saina.
Aafia le gataifale o Samoa ua leai ni maisu ma fugafuga
Ua sosolo le vaovao i le oneone o le aloalo ma palapalā nuu sa le masani ona tupu ai sea tulaga. O le fesili tele pe aisea ua mafua ai. I le polokalame a le matagaluega o faatoaga ma faigafaiva ole vaiaso talu ai, na faalauiloa ai le oge o le fugafuga.
Ma o le mafuaaga tonu lava lena o le amata ai nei ona sosolo o le vaovao i le gataifale o nuu sa masani ona lau oneone ma tele le figota sa tufi ai. E aofia ai le panea, o le pipi tala, o le tugane, o le pipi tu, o le ‘asi, o le fole, ole valu, o le sava’i, ole tio, tuitui, ali’ao ma le alili
O na mau taumafa e tele sa faatuatuana’i lava e le tele o tautai figota mai le auaiga o le fugafuga. E aofia ai le maisu, mama’o, fugafuga pa’epa’e, fugafuga pulepule, fugafuga fisi, sea uli, sea amuu, sea lomu, loli aau, loli mumu, peva, o ituaiga fugafuga uma na sa le amanaia lava e o tatou tagata, ona o le tele o isi figota e pei ona ta’ua i luga.
Peitai o le taimi nei, ua molimauina mai faamaumauga a le matagluega o faigafaiva ua faasolo ina mou atu na figota ma le gataifale. Talu ai e lē o mafai lava ona taofia le soona la’u mai i uta e tagata e faatau atu mo tupe maua.
E leai se tulafono e faasa ai le tufi o fugafuga ma maisu
O le lipoti mai Manono tai, “ole matua tele lava o Saina lea e faaaogaina fugafuga.”
Ua faamanino mai e le Susuga i le pule sili lagolago a le matagaluega o faatoaga ma faiga faiva, Magele Etuati Ropeti, “E le o iai se tulafono e faasa ai ona tae le fugafuga. O loo faataga e le tulafono ona faaaoga mo taumafa. Ae le o faatagaina le faaaoga ise isi tulaga pe faaoga foi e gaosi ai se isi oloa fou.
“Afai loa e ova atu ma le paelo se la’uga fugafuga o lona uiga e ese le tulaga e faaaoga iai. Aua e le mafai ona faatusalia le paelo i le container, e ono agai atu iai.
“Mo le taimi nei, o loo lava le aofai o fugafuga mo taumafa, ae le mo nisi mea faapena pei o le la’u paelo ma container mo atunuu i fafo. Na ta’ua e le alii ofisa sili, “Ua iai tagi ua oo atu i le tulafono ona o mea faapena, i le la’u i container i atunuu i fafo figota nei e pei o le maisu.”
