O le agalelei o Malo o Niu Sila ma Ausetalia ua mafua ai se polokalame fesoasoai a ia Malo e lua ua totogi ai pili o fanau aoga i aoga tulagalua a le Malo, aoga a ekalesia ma aoga mo fanau e iai manaoga faapitoa. E lē tau fesiligia o se faamāmā avega sili mo mātua i le itu tau tupe mo pili ma meaaoga.
Peitai talu ona amata lea fesoasoani ma tufatufa atu seleni i komiti ma Uluaoga mo le faasoasoaina tatau i vaega ua aiaia e faaaogā i ai seleni e aofia ai ma pili, ae sa tele pea faitioga sa tulai mai. O nisi o ia faitioga e faasino i le totogi pea o tupe o lesitala mo fanau, aemaise o isi saoga tupe mo fanau.
Peitai o lea ua alu alu le polokalame ma faitioga atoa ai ma masalosaloga, ae ua faamaonia i se suesuega faalotoifale a le Matagaluega o Aoga, ua faaaogā sese tupe o le fesoasoani. E lei mafai ona auiliili mai e le Pule Sili o le matagaluega le afioga Matafeo Tanielu Aiafi, poo ā tonu mea na faaaogā sese i ai seleni, ae ua ia faailoa e tusa ma le sefulu afe ma ona tupu ua aafia ai.
O le mafuaaga lea o le faaiuga e faamalolo ni Uluaoga se toalima o ni aoga tulagalua i Savaii ma Upolu ona ua latou faaaogā sese seleni o le polokalame. Fai mai le Pule Sili i se talanoaga i le telefoni, o mea lava tau i faiaoga (Uluaoga) na faaaogā i ai seleni ua lē alu tonu i le fesoasoani ae ua alu i isi mea e lē fetaui ma aiaiga o le fesoasoani.
“O le tele o faitioga mai le atunuu na mafua ai ona ou faatonuina e fai se suesuega”, o le saunoaga mai lea a le Pule Sili. Ua ia faaalia foi e ui o loo feagai le matagaluega ma faaletonu i le manaomia tele o ni faiaoga, ae e lē mafai ona tuua ai le faaiuga ua tatau ona fai.
“O le mea lava lena o loo vaai pea i ai le matagaluega o le toagaogao o faiaoga, ae a e faaletonu loa aemaise le itu tau tupe ua faaaogā sese, e leai lava se isi faaiuga fetaui o le faamalolo”.
Ua lē mafai e le Pule Sili ona faailoa mai aoga tulagalua ua aafia ma suafa o Uluaoga, ae o lana faamatalaga ua fai le faaiuga a le matagaluega ae ua toe ave le lipoti o a latou suesuega i le Komisi e pulea tagata faigaluega a le Malo mo se isi a latou faaiuga.
O le a iloa ai foi pe tuuina atu e le komisi le mataupu i leoleo mo nisi sailiiliga ma faia ni moliaga faasolitulafono o Uluaoga ua tutuli ma faamalolo mai o latou tiute. O le masina fou o Iulai e amata ai le isi fesoasoani tau pili mo fanau aoga, ma o Niu Sila ua ofo na te totogi pili o fanau aoga i Kolisi ma aoga maualuluga e faapitoa i le vasega iva poo le Year Nine i le vasega tausaga 12 le year twelve.
Ua faataoto foi e le matagaluega aiaiga mo lea fesoasoani ma ua na o aoga maualuluga ma kolisi o aoga a le Malo, ekalesia e lavea i totonu o le fesoasoani tau pili aoga a le malo Niu Sila. O se isi foi lea faamāmā avega mo mātua ma ua faailoa e le Malo o le a taumafai e faaauau lenei polokalame i se taimi o le a faaono faamuta ai e lea malo.
