E malie lava le nofo ma matau le tulaga o iai tala o le vaiaso. O isi vaiaso i Samoa e leiloa le mau lipoti e fia faalauiloa ae o isi vaiaso e matua tele le galuega o le tau saili o ni lipoti.
O le vaiaso la lea a o agai Samoa ma le lalolagi e faamanatu le Aso na maliu ai le Faaola, e filemu lava ma tau leai ni lipoti.
O le vaiaso o le Suavai a le lalolagi na agai ai le Malo ma le lautele i Togitogiga lea na toto ai laau i augutu o vaitafe ina ia taofiofi ai le solo o le eleele ma faaitiitia le suavai maua.
O se faafitauli lava lea o le a vaaaia i Samoa i tausaga uma ona o le toatele o tagata ua faaopoopo ae ua laititi le suavai maua.
O le vaiaso foi na tea nei lea na sau ai le faamatalaga i le fa o vaiaso o faatali se taotoga faapitoa o Teuila Fuimaono lea na masalomia le maliu ina ua fasi e le faiaoga, e leai se fesootaiga o le oti o Teuila ma le fasi e le faiaoga.
Ae na fasi, peitai e masalomia o le fatu o Teuila e faaletonu na mafua ai lava lona oti. O loo tumau lava la le moliaga o le faaoolima o le faiaoga ae o se moliaga maualuga atu ua leai se mea.
Na faamavae atu foi le Alii Palemia ma le atunuu i le ogatotonu o le vaiaso i le teineitiiti e ono tausaga lea na maliu ona o se kanesa ua lē mafai ona togafitia na aafia ai, ma o le Aso Toonai o le vaiaso na tea nei na faataunuu ai lona manaoga e fia feiloai i le Palemia o Samoa ae oo i le Aso Sa na sosoo ai ae uma lona ola.
O le faafetai a le Alii Palemia ona o le maua o le avanoa e feiloai ai i le agelu lenei, le tamaitai o Tapaau Manuo a e lei amia e le Atua, ma na maea le feiloaiga a le alii Palemia ma lea teineititi, lea na faatautaia e le Make Wish a Niu Sila, ae malaga le alii Palemia i Niu Sila foi mai i le amataga o le vaiaso ua uma le ola o Tapaau. Na toe agai lava le alii Palemia ma saunoa i toe sauniga o lea alualutoto i ona toe sauniga i Lufilufi.
O le vaiaso foi na tea nei e lua lava faalavelave na matua faafetaia le le uma ai o se ola o se tasi.
O le faalavelave muamua o se fuagafanua na faatautaia i le Aso Gafua i Vaovai Falealili, na agai ai se vasega o Faamasino o le Faamasinoga o Fanua ma Suafa i se fuagafanua ona ua moomia lea tulaga i se iloiloga na faatautaia ai.
E saofafai la le vasega o alii ma tamaitai faamasino i se tasi o maota i lea afioaga ae faalogoina loa le agai mai o ni alii se toalua e faaaupegaina i sapelu ma maa.
O laulauvavale na faafeiloai ai le potopotoga i lea fanua ae ua faafetaia lava e i latou sa iai i lea nofoaga ona o le leai o se isi na faamanualia. Na vevesi le potopotoga ona ua agai mai i fafo le isi itu o le faamasinoga ma faapea ai loa tau taofiofi fusuaga na tulai mai.
“See lava le sapelu i le ulu o le isi alii na tu i fafo o le fale, misi le ulu ae lalo le fai na tu ai i luma,” o le molimau lea a le isi sa iai i le potopotoga lenei. Na feosofi sui o le afioaga ma tau vaovao tagata nei ae sa vave foi ona aveese faamasino.
E le gata i lea o se galuega o le ana o Maria o loo faia i luma ane o le Malumalu o le Ekalesia Katoliko i Moamoa, na tuu lelei ae fai tauga upu ma fetauiga a ni sui o le Aulotu.
E fai lava nei vevesi o iai le Afioga i le Patele o loo ua tuu i ai le vaaiga o lea matagaluega. E liliu atu le pasi a Moamoa i lea nofoaga ae lavea loa se isi o taulealea i se agaese ua ta ai e se isi foi taulealea, ae ua tau vaovao mai sui o le aulotu ua agai atu i isi sui.
Na vave ona ave i le falemai le sui lea na lavea i le agaese mo togafitiga.
O lea lava foi o loo faaauau finauga a le toatele i le Kirisimasi e pei ona iai ni lauga ua faalauiloa e sui o le Aso Fitu Tutoatasi (SISDAC) i luga o le televise. Faaopoopo i ai ma le faiaina mai o le Manu Samoa taitoa 7 i taaloga i Iapani – faafetai i le fesoasoani a le laufali.
O le maea la o le vaiaso ua taunuu mai le Aso Maliu e mafaufau lava i ai i le tele o le mau faaosoosoga ma ua le asa le taa o le tiapolo i lagona o le atunuu.
Sa laga foi e le tusitala faapea e filemu le vaiaso na tea nei? Ia atonu o le tele o lipoti na faalauiloa e lei iai ni itu ogaoga e lamatia ai se soifua e pei ona tamomoe tusitala e tuliloa.
Ae e lua lava faalavelave ia na maua e lo tatou ofisa na semanu lava e iu leaga ai le vaiaso paia o le Maliu ma le Toetu o le Faaola.
E ui o lea ua toe foi i le filemu ma ua faafetaia ai foi le itu fetufaai o o tatou tagata ma le va fealoai e tafiesea uma ai soo se faafitauli.
Na malosi leoleoga a le Matagaluega o Leoleo ma Falepuipui e taofia ai i latou e agai foi i le ava malosi e famanatu ai le vaiaso paia ma na taua le filemu o le vaiaso na tea nei.
O le Ekalesia Katoliko na vaaia lava le amata o le vaiaso i sauniga eseese a o agai atu ai le Aso Maliu ma le toetu, ma o isi Ekalesia o polokalame na faatautaia e autalavou ma aoga Aso Sa na faamanatu ai le vaiaso paia lenei o le maliu ma le toetu o le Faaola.
E ui lava la i le tele o faafitauli, le taa o le tiapolo i loto ma finagalo i le vaiaso ua tuanai, o le manumalo lava e toe agai i ai o le toetu o le Alo o le Atua e faamama ai agasala ma faaletonu o le lalolagi atoa e oo foi ia i matou i Samoa nei.
