Ua tala faamamai le tamaitai Kovana sili o Ausetalia i fesoasoani a lona Malo mo Samoa i le itu tau aoaoga, sa aoaoina ai nisi o le atunuu e pei o le sui Palemia, Afioga Fonotoe Pierre Lauofo.
Na folasia e le kovana o Quentin Brycelea tulaga a o iai i Samoa i lana asiasiga taualoa.
O le a faamauina i talafaasolopito o le tatou Malo ma le atunuu, o ia le isi taitai o se Malo mai fafo ua ave i ai le faaaloalo e saunoa ai i le Palemene o Samoa.
O le a avea foi ma se vaega o tala faamaumau lona faamausaliina pea o sootaga o atunuu e lua e pei ona sasaa mai pea fesoasoani a lea Malo mo le faaleleia o soo se vaega o le atinae o Samoa. O le afioga i le sui Palemia, Fonotoe Pierre Lauofo, o se tasi sa aoaoina i se Iunivesite i lea atunuu i fesoasoani a lea Malo, ma sa agiga i le saunoaga a le tamaitai Kovana sili lona viia o nisi o tulaga tofi maualuluga o le Malo o Samoa e pei o le sui Palemia, le Kovana o le faletupe tutotonu, ma le Pule o le Iunivesite Aoao o Samoa ma nisi o tamafanau a le atunuu sa faaiuina mai o latou taumafai faaleaoaoga i lalo o fesoasoani a Ausetalia.
Na afea e le tamaitai Kovana sili i latou ia ona o lana saunoaga na ia faaalia ai o le itu i aoaoga o se isi lea fatu taua o fesoasoani a lona Malo mo Samoa.
O le aoga mo tagata e iai manaoga faapitoa le SENESE i Vaitele, o le isi lea vaega taua o le fesoasoani e pei ona sa afio le Kovana e fia feiloai i fanau ma i latou o pulea lea aoga.
O se autaalo volipolo o fanau e iai manaoga faapitoa mai le SENESE sa malaga i Ausetalia talu ai nei mo ni taaloga ma sa faamanuiaina ai i ni pine.
O le afea o Samoa e le faiga malaga mamalu sa avea ai foi lo tatou atunuu ma nofoaga e faamautu mai i ai le Kovana sili, mo le faaauau atu i Tonga e auai i toe sauniga o le Tupu o Siaosi Tupou V, ma lona malaga atu i atunuu o Tuvalu ma Kilipati e pei ona aofia i lana asiasiga.
Na faatoa malaga tuusao le Kovana sili i Solomona ma Niu Kaletonia ina ua malaga ese ma Samoa.
O le lua ai lea o Kovana o le Malo Ausetalia ua afea Samoa. O le tausaga e 2007 na afea ai le atunuu e le tasi o Kovana sili o se alii, i le auai i toe sauniga o le Ao o le Malo i lena vaitaimi.
O le vavalalata o sootaga o atunuu e lua o loo molimauina pea e le gata i fesoasoani mo le atunuu ae faapea foi i isi fuafuaga tau le atinae o le tamaoaiga e pei ona tele foi le sao o Ausetalia i le itu i le puipuiga poo le Defence o loo tuusao i le Matagaluega o leoleo ma falepuipui.
