O taleni ma agavaa o nisi o faamanuiaga e talitonu le toatele, o nisi o meaalofa tuufaasolo, e lē gata i tamā ma tupuaga ua fai i lagi le folauga, peitai o loo faamaonia i le augatupulaga o loo iai nei.
O siva ma pese ma soo se faafiafiaga, o se tasi o taleni e lē o matineia, ae ua faatupulaia ma lauolaola le tupu ma le fiafia i ai o alo ma fanau a le atunuu.O le faamoemoe o le au siva a Le La o Samoa mo le faalauiloaina o le latou DVD lona lua o pese ma siva, o le ata ma le faamaoniga lea o le agai pea i luma, ma savali pea le atina‘eina o le taleni a alii ma tamaitai o loo faagaioia lea foi taleni ma avea o ni faafiafiaga mo le toatele.
O le saunoaga a le tamaitai sa uluai tapenaina ma faataunuuina le faavaeina o Le La o Samoa, ia Sia Su‘a, sa ia faaalia ai le fiafia tele ona o le taumafai o le fanau ma le naunau e faaauau pea le atina‘eina o le taleni i auala eseese. O lenei vaitau e lē toe faigofie le tulaga o le soifuaga i vaega uma lava, peitai o siva ma pese, o se tasi o maunu aogā tele ua mafai ona fesoasoani i mafaufau o tupulaga talavou.
O le tasi lea o autū ma faapogai o lenei faamaemoe mai lava i lona afuafua mai. E le gata i le faaalia ma faagaioi ai taleni ma meaalofa, ae iai foi sona taua ma sona aoga mo alo ma fanau. O le itu taua o le maua ai o avanoa e faasoa ai taleni, ma taofiofi mai ai le fanau ma i le soona agai i nisi o tafaoga ma manaoga faaletalavou e ono afaina ai i le mau faaitauli.
O le aso 23 o le Aso Toonai o le vaiaso nei, o le a tatala ma faalauiloa ai le DVD lona lua a Le La o Samoa ua mae‘a ona saunia ma tapenaina. O le faamoemoe o le ausiva o le a faataunuuina i Malaeola i Magele. O le a faamanatu ai foi ma le tolu tausaga talu ona amata ma faave Le La o Samoa.
O le taimi nei ua toaluasefulu le ausiva, e toasefulu alii ma tamaitai e toasefulu e pei ona sa naunau i ai. E tele nisi o faafiafiaga o le a faaalia ai i lea po, e aofia ai nisi pepese ta‘uta‘ua o alo lava ma tamafanau a Samoa. O valaaulia faapitoa o le tamaitai o Annie Tinomaalii, Kas The Feelstyle Futialo. Sa faamaonia e Sia e faapea ua lē mafai ona lava mai le susuga ia Toluma‘anave Misiluki Su‘a ona o nisi o tulaga lē maalofia ua lē avanoa mai ai.
O le a faaopoopo i ai nisi e pei o le aufaafiafia a SaMove Dance, o le a fesoasoani i Le La o Samoa i le tulaga tau faafiafiaga. O nisi tamafanau iloga o le a pepese ai i lea po, o Pagamalie Iopu Faivalu, Eterona Ioasa, Joe Failua ma Mautoatasi Asuao.E $20 le ulufale e pei ona faatulagaina, ae o le a mafai ona maua ai le taumafataga mamafa ua saunia. O le faaili a le Malaeoletalu ma le Seki a Family Club o le a faapea foi ona auai ma faafiafia ai.
O se tasi o aufaafiafia o le a vaaia i le state i lea afiafi o le Dee-licious Dance Cru, o se vaega ua vaaia foi le a‘e mai lenei vaitaimi ma tosina i ai le toatele o le tupulaga ona o le matagofie ma le mālie o aga faafiafia a nei alii.
Sa faamaonia mai foi e Sia Su‘a e faapea ua lē mafai ona auai atu i Samoa i le Teuila o lenei tausaga mo le faatinoina o le latou valaaulia, ona ua leai se avanoa ma ua fetineia‘ina i le tele o vaalaulia ua leva ona faatonuina. E faapea foi ona lē mafai ona auai atu i le isi valaaulia mai Pago Pago Amerika Samoa ona o mafuaaga lava e pei ona ta‘ua.
