O le Tausala Samoa Niu Sila, poo le Miss Samoa NZ e pei ona faapaleina talu ai nei, le tamaitai lalelei o Metotisi Komiti-Faalavaau, o le a lē tauvā i le Sailiga o se Tausala Samoa, i le Faaaliga o le Teuila i Apia. O se pepa o faamatalaga na tuuina mai ai lenei lipoti mai le ofisa o le Miss Samoa NZ, ua faailoa mai ai lenei suiga e pei ona faamaonia e le latou ofisa.
Atonu o se faaiuga e sala ese mai le tulaga ua masani ai lenei polokalame i tausaga taitasi, peitai o le silasila a le Faatonu fou ua seei nei i le tofi, le tamaitai o Te‘evā Matāfai Tagaloa-Leniu, ua faia ai lenei faaiuga, lea o le a lē tauvā ai le Tausala Samoa NZ i le Tauvaga Tausala Samoa i le Teuila.
Ua uma ona logoina le komiti o le Tauvaga Tausala o le Teuila e tusa o le faaiuga a le komiti i Niu Sila nei, aemaise le faailoa o le sauni pea o le Tausala Samoa NZ e faatino lana lagolago i le Tauvaga o le Teuila, e ala i lona auai atu i le Tauvaga e ui o le a lē tauvā. E lē gata i lea o le a lagolago atu foi i se faailoga mo se tasi o vaega o le tauvaga, poo nisi vaega o loo moomia e le komiti.
O le a tuufesili le toatele pe mafua i se ā lenei faaiuga faafuasei. Peitai e tusa ai ma le pepa o faamatalaga, o le Tausala poo le Miss Samoa NZ mo le 2011-2012 – o Metotisi Komiti-Faalavaau, ua tatau ma onomea le faapaleina o le Tausala e fai ma sui o le mamalu o Samoa uma e tusa lo latou faitau aofai ma le 131,103+ (Tusiga igoa 2006) o loo papaaao i Niu Sila nei.
O le silasila a le Faatonu, atonu e lē o se mea talafeagai mo le Tausala ua filifilia mai se tauvaga faalemalo (national), ona toe agai ifo e tauva i se tauvaga faalotoifale (local) o loo tauvā ai tamaitai mai na o totonu lava o Samoa. E lē gata i lea, o loo ta‘ua foi i lea lipoti, pe a fua atu i aiaiga ma tuutuuga o loo fua i ai le tauvaga i le Teuila, e iai nisi tulafono ma aiaiga e lē ogatasi ma taiala ma talitonuga ua limataitaia ai le faatautaiga ua toe lauliliu i ai le Miss Samoa NZ Trust.
Peitai e ui o le a lē tauvā Metotisi i le Tauvaga o le Teuila, ae faaauau pea ona faatino ona tiute faatamaitai Tausala, o le a malaga faasolo atu ai i Samoa ma Amerika Samoa. O le a ia asiasia foi maota gasegase i Samoa uma e lua, o aoga, Ekalesia, ma faia ni foai meaalofa i nisi o faalapotopotoga o loo faatinoina galuega alofa, aemaise ai lona molimauina o vaega eseese o le aganuu ma le siosiomaga o Samoa.
O le auga o lenei fuafuaga, ina ia atili tapu‘e ai pea ma faamausaliina lona faasinomaga, o ia lava o le Tamaitai Samoa o loo aumau i Niu Sila.
Saunoa Te‘evā, ‘ua oo i le taimi ua tatau ona tatou laa atili atu ia malamalama ma maua le aano moni o le uiga o le upu Tamaitai Samoa, nai lo le silasila pitotasi i vaega o loo tele ina fua i ai le lalelei e pei ona sau a‘i; aemaise ia avea o se faataitaiga lelei mo tamaitai talavou o loo tauivi ma le tele o faigata i lenei vaitau o le saosaoa o le soifuaga.’
